រដ្ឋធានីអ៊ិស្លាមបាដ៖ រហូតមកដល់ពេលនេះ ប៉ាគីស្ថាន កំពុងតែប្រឈមមុខនឹងវិបត្ដិសេដ្ឋកិច្ច នយោបាយ និង ការជ្រៀតជ្រែករបស់យោធា ចូលក្នុងកិច្ចការនយោបាយ ទើបមានការទាមទារឲ្យស្ថាប័នដ៏មានអំណាចបំផុតរបស់ប្រទេសអាស៊ីខាងត្បូងមួយនេះ ត្រូវតែនៅឲ្យឆ្ងាយពីបញ្ហានេះ ដូចបណ្ដាប្រទេសបស្ចិមលោក។
សារព័ត៌មានឥណ្ឌា NDTV បានចេញផ្សាយ កាលពីថ្ងៃពុធ ទី២៣ ខែវិច្ឆិកា ថា លោកឧត្ដមសេនីយ៍ ហ្កាម៉ា ចាវេដ បាចាវ៉ា (Qamar Javed Bajwa) មេទ័ពកំពូលរបស់ប៉ាគីស្ថាន ដែលនឹងចូលនិវត្ដន៍ ចាកចេញពីតំណែង ក្នុងពេលឆាប់ៗនេះ បានថ្លែងសុន្ទរកថាចុងក្រោយរបស់គាត់ កាលពីថ្ងៃពុធ ថា ទាហានបានជ្រៀតជ្រែកដោយខុសច្បាប់ ចូលទៅក្នុងកិច្ចការនយោបាយ រាប់ទសវត្សរ៍កន្លងមកហើយ។ បញ្ហានេះ នឹងមិនត្រូវឲ្យកើតមានបន្ដទៅទៀតនោះឡើយ។
ទោះជាយ៉ាងណា លោកឧត្ដមសេនីយ៍ បានការពារដល់ស្ថាប័នដ៏មានអំណាចបំផុតរបស់ប្រទេស ខណៈមានការរិះគន់ខ្លាំង មកលើកងទ័ព ជាពិសេស អតីតនាយករដ្ឋមន្ដ្រីប៉ាគីស្ថាន លោក អ៊ីមរ៉ាន់ ខាន់ (Imran Khan) បានចោទប្រកាន់ដល់កងទ័ព អំពីការប្រើប្រាស់តួនាទី ដកហូតគាត់ ចេញពីតំណែង កាលពីខែមេសា ឆ្នាំ២០២២។
ថ្លែងនៅក្នុងព្រឹត្តិការណ៍មួយ នៅក្នុងបញ្ជាការដ្ឋានកងទ័ព នៅភាគខាងកើត ទីក្រុងរ៉ាវ៉ាល់ភីនឌី (Rawalpindi) លោកឧត្តមសេនីយ៍ វ័យ៦២ឆ្នាំ រូបនេះ បានកើតការងឿងឆ្ងល់ ថា ហេតុអ្វីបានជាកងទ័ព នៅក្នុងប្រទេសឥណ្ឌា ដែលនៅអ្នកជិតខាង មិនរងនូវការរិះគន់ ពីសាធារណជន។
លោកឧត្ដមសេនីយ៍ បានបញ្ជាក់ ថា «បើតាមគំនិតខ្ញុំ ហេតុផលនេះ គឺការជ្រៀតជ្រែកឥតឈប់ឈររបស់កងទ័ព នៅក្នុងកិច្ចនយោបាយ អស់រយៈពេល៧០ឆ្នាំចុងក្រោយនេះ មិនស្របតាមរដ្ឋធម្មនុញ្ញនោះឡើយ។ ហេតុដូច្នេះហើយ ទើបចាប់តាំងពីខែកុម្ភៈឆ្នាំមុន កងទ័ព បានសម្រេច ថា ពួកគេនឹងមិនជ្រៀតជ្រែក នៅក្នុងកិច្ចនយោបាយ»។
លោកមេទ័ពកំពូលរូបនេះ បានបន្ថែម ថា «កងទ័ពចាប់ផ្តើមរៀបចំខ្លួនឲ្យល្អ ហើយមានក្តីសង្ឃឹម ថា គណបក្សនយោបាយ ក៏នឹងពិនិត្យមើលអាកប្បកិរិយារបស់ទាហានផងដែរ។ វាជាការពិតណាស់ នៅក្នុងប្រទេសប៉ាគីស្ថាន ស្ថាប័ន គណបក្សនយោបាយ និង សង្គមស៊ីវិល បានប្រព្រឹត្ដកំហុសឆ្គងទាំងអស់នេះ។ ឥឡូវវាជាពេលវេលា ដែលយើងត្រូវរៀនសូត្រពីបណ្ដាប្រទេសជឿនលឿន ដើម្បីធ្វើដំណើរឆ្ពោះទៅមុខ»៕