រាជធានីភ្នំពេញ៖ ប្រមុខការពារជាតិសហរដ្ឋអាមេរិក និង ចិន បានបើកកិច្ចប្រជុំទល់មុខគ្នា នៅខាងក្រៅកិច្ចប្រជុំរដ្ឋមន្ដ្រីក្រសួងការពារាតិអាស៊ាន-បូក នៅខេត្ដសៀមរាប ប្រទេសកម្ពុជា ដោយផ្ដោត លើបញ្ហាសំខាន់ៗជាច្រើន។
សារព័ត៌មាន The Jakarta Post បានចេញផ្សាយ កាលពីព្រឹក ថ្ងៃអង្គារ ទី២២ ខែវិច្ឆិកា ថា លោក ឡយ អូស្ទី (Lloyd Austin) រដ្ឋមន្ដ្រីក្រសួងការពារជាតិសហរដ្ឋអាមេរិក បានជួបជាមួយសមភាគីចិន លោក វ៉ី ហ្វឹងហឺ (Wei Fenghe) នៅថ្ងៃអង្គារ ដើម្បីបន្ធូរបន្ថយនូវភាពតានតឹង រវាងប្រទេសទាំង២។
លោក ផេត រ៉ៃដឺ (Pat Ryder) អ្នកនាំពាក្យ ក្រសួងការពារជាតិអាមេរិក បានបញ្ជាក់ ថា លោក ឡយ អូស្ទីន (Lloyd Austin) រដ្ឋមន្ត្រីការពារជាតិសហរដ្ឋអាមេរិក កាលពីព្រឹក ថ្ងៃអង្គារ បានជួបទល់មុខជាមួយសមភាគីចិន លោក វ៉ី ហ្វឹងហឺ (Wei Fenghe) ដោយជជែកគ្នា អំពីទំនាក់ទំនងលើការពារជាតិរបស់សហរដ្ឋអាមេរិក និងចិន ក៏ដូចជា បញ្ហាសន្តិសុខ ទាំងនៅក្នុងតំបន់ និង សកលលោក។ នៅក្នុងជំនួបនោះ លោក អូស្ទីន បានសង្កត់ធ្ងន់ អំពីតម្រូវការចាំបាច់ នៅក្នុងការគ្រប់គ្រងការប្រកួតប្រជែង ប្រកបដោយការទទួលខុសត្រូវ និង ការរក្សាឱ្យបាននូវច្រក សម្រាប់ទំនាក់ទំនង។
ប្រមុខការពារជាតិសហរដ្ឋអាមេរិក បានជជែក អំពីសារៈសំខាន់ នៃការជួបសន្ទនាគ្នា ឱ្យបានស៊ីជម្រៅ សម្រាប់កាត់បន្ថយហានិភ័យជាយុទ្ធសាស្ត្រ, ការបង្កើនទំនាក់ទំនង ខណៈមានវិបត្តិ និង ការពង្រឹងសុវត្ថិភាពប្រតិបត្តិការ។ ជាមួយគ្នានេះ លោករដ្ឋមន្ដ្រី ក៏បានសង្កត់ធ្ងន់ អំពីអាកប្បកិរិយា ប្រកបដោយគ្រោះថ្នាក់មួយចំនួន ខណៈបង្ហាញពីយន្តហោះយោធាចិន នៅក្នុងតំបន់ឥណ្ឌូ-ប៉ាស៊ីហ្វិក ព្រោះបញ្ហានេះ អាចបង្កើនហានិភ័យជាយថាហេតុ។
លោករដ្ឋមន្ដ្រីសហរដ្ឋអាមេរិក បានបញ្ជាក់ឡើងវិញ ថា សហរដ្ឋអាមេរិក នឹងបន្តហោះហើរ ឬ ធ្វើនាវាចរណ៍ ហើយធ្វើប្រតិបត្តិការ នៅគ្រប់ទីកន្លែង ស្ថិតក្នុងដែនទឹកអន្តរជាតិ តាមច្បាប់អនុញ្ញាត។ ក្រៅពីនេះ លោក ឡយ អូស្ទីន ក៏បានពិភាក្សា អំពីសង្គ្រាមឈ្លានពានរបស់រុស្ស៉ី នៅក្នុងអ៊ុយក្រែន ដោយបានគូសបញ្ជាក់ អំពីគោលជំហរ ដែលក្រុងវ៉ាស៊ីនតោន និង ក្រុងប៉េកាំ ប្រឆាំងចំពោះការប្រើប្រាស់ ឬ ការសម្លុតគំរាមប្រើប្រាស់អាវុធនុយក្លេអ៊ែរ ព្រមទាំងបង្ហាញ អំពីក្តីព្រួយបារម្ភ ជុំវិញការបង្កហេតុ កាលពីពេលថ្មីៗនេះ ដោយកូរ៉េខាងជើង និង អំពាវនាវឱ្យចិន អនុវត្តឱ្យបានពេញលេញតាមសេចក្តីសម្រេចនានារបស់ក្រុមប្រឹក្សាសន្តិសុខ អង្គការសហប្រជាជាតិ ពាក់ព័ន្ធនឹងកម្មវិធីអាវុធខុសច្បាប់របស់ក្រុងព្យុងយ៉ាង។
លោករដ្ឋមន្ដ្រីក្រសួងការពារជាតិអាមេរិក បានបន្ថែម ថា សហរដ្ឋអាមេរិក នៅតែបន្តប្តេជ្ញា ចំពោះនយោបាយចិនតែមួយជាយូរអ្វែងរបស់ខ្លួន អនុវត្តតាមច្បាប់ទំនាក់ទំនងតៃវ៉ាន់, សេចក្តីថ្លែងការណ៍រួមរបស់សហរដ្ឋអាមេរិក-ចិន ទាំង៣, និង ការធានា៦ចំណុច។ ស្របគ្នានេះ លោក ឡយ អូស្ទីន ថែមទាំងបានលើកឡើង អំពីសារៈសំខាន់ នៃសន្តិភាព និង ស្ថិរភាព នៅតំបន់ច្រកសមុទ្រតៃវ៉ាន់។
ទោះជាយ៉ាងណា លោក ឡយ អូស្ទីន រដ្ឋមន្ដ្រីក្រសួងការពារជាតិសហរដ្ឋអាមេរិក នៅតែប្រឆាំងយ៉ាងដាច់ខាត ចំពោះការផ្លាស់ប្តូរស្ថានភាពនានា ជាលក្ខណៈឯកតោភាគី ផ្ទុយពីស្ថានភាពដើម នៅតំបន់នោះ។ ទន្ទឹមគ្នានេះ លោករដ្ឋមន្ដ្រី បានអំពាវនាវឱ្យចិន បញ្ឈប់ប្រព្រឹត្តនូវទង្វើណាមួយ អាចបង្កអស្ថិរភាព ចំពោះតៃវ៉ាន់ បន្ដទៅទៀត។
ក្រុងវ៉ាស៊ីនតោន បានប្រឈមមុខដាក់គ្នា ជាមួយនឹងក្រុងប៉េកាំង កាន់តែខ្លាំងឡើង ក្រោយពេលលោកស្រី ណាន ស៊ីផេឡូស៊ី (Nancy Pelosi) ប្រធានសភាដ៏មានឥទ្ធិពលរបស់សហរដ្ឋអាមេរិក បានធ្វើដំណើរទៅបំពេញទស្សនកិច្ច នៅកោះតៃវ៉ាន់ ចន្លោះពីថ្ងៃទី២-៣ ខែសីហា ឆ្នាំ២០២២។ ជាការឆ្លើយតបទាំងការខឹងសម្បានោះ ចិនបានបញ្ជូនកងទ័ព យន្ដហោះយោធា និង នាវាចម្បាំង រាប់សិបគ្រឿង ធ្វើសមយុទ្ធឡោមព័ទ្ធតៃវ៉ាន់។
ការជួបជជែកទល់មុខគ្នា រវាងប្រមុខការពារជាតិរបស់ប្រទេសមហាអំណាចទាំង២ នៅក្រៅកិច្ចប្រជុំថ្នាក់រដ្ឋមន្ត្រីការពារជាតិអាស៊ាន ក៏ជាជំនួបលើកដំបូង ដើម្បីបន្ថូរបន្ថយភាពតានតឹង និង ស្វែងរកការយល់ចិត្តគ្នាទៅវិញទៅមកឲ្យកាន់តែស៊ីជម្រៅ៕