រដ្ឋធានីមូស្គូ៖ មេបញ្ជាការនាវាមុជទឹកម្នាក់របស់កងទ័ពជើងទឹករុស្ស៊ី ប្រចាំនៅសមុទ្រខ្មៅ ជាប់ពាក់ព័ន្ធនឹងការវាយប្រហារ ដោយមីស៊ីលដ៏ឃោរឃៅ ទៅលើប្រទេសអ៊ុយក្រែន ត្រូវបានខ្មាន់កាំភ្លើងបាញ់ស្លាប់ ខណៈគាត់កំពុងតែរត់ហាត់ប្រាណ នាពេលព្រឹក។
សារព័ត៌មាន Al Jazeera បានចេញផ្សាយ កាលពីរសៀល ថ្ងៃអង្គារ ទី១១ ខែកក្កដា ថា ទីភ្នាក់ងារសារព័ត៌មាន គ្រប់គ្រងដោយរដ្ឋរុស្ស៊ី Tass បានរាយការណ៍ ដោយដកស្រង់ប្រភពពីស្ថាប័នអនុវត្ដច្បាប់ អះអាង ថា មេបញ្ជាការនាវាមុជទឹករបស់រុស្ស៊ី និង ជាអនុប្រធានទទួលបន្ទុក នៅក្នុងការចល័តទ័ព នៅក្នុងទីក្រុងក្រាស្នូដា (Krasnodar) នាភាគខាងត្បូងរបស់ប្រទេសរុស្ស៊ី ត្រូវបានឃាតក បាញ់សម្លាប់។
មន្ដ្រីរុស្ស៊ី បានឲ្យដឹង ថា លោក ស្ដានីស្លាវ អ័រហ្ស៊ីតស្គី (Stanislav Rzhitsky) មេបញ្ជាការនាវាមុជទឹក ត្រូវបានខ្មាន់កាំភ្លើង បាញ់សម្លាប់ កាលពីព្រឹក ថ្ងៃចន្ទ ហើយករណីបទឧក្រិដ្ឋនេះ កំពុងតែបើកការស៊ើបអង្កេត។
លោក ស្ដានីស្លាវ អ័រហ្ស៊ីតស្គី មេបញ្ជាការនាវាមុជទឹក នៃកងជើងទឹករបស់រុស្ស៊ី ប្រចាំនៅសមុទ្រខ្មៅ ត្រូវបានបណ្តាញព័ត៌មានក្នុងស្រុក នៃប្រទេសអ៊ុយក្រែន អះអាងថា គាត់ជាអ្នកទទួលខុសត្រូវ ចំពោះការបាញ់មីស៊ីលដ៏ទំនើប Kalibr (កាលីប៊ឺរ) ចេញពីនាវាមុជទឹក តម្រង់ទៅកាន់គោលដៅនានា ស្ថិតក្នុងប្រទេសអ៊ុយក្រែន។
ទីភ្នាក់ងារសារព័ត៌មាន Tass បានរាយការណ៍ ថា លោក ស្ដានីស្លាវ អ័រហ្ស៊ីតស្គី បានបញ្ជានាវាមុជទឹក Krasnodar ដែលមានឈ្មោះដូចទីក្រុង នៅភាគខាងត្បូងរបស់រុស្ស៊ី។ ប៉ុន្ដែគេនៅតែមិនទាន់ច្បាស់ ថាតើគាត់ជាប្រធានក្រុមនាវាមុជទឹក ខណៈគាត់ត្រូវបានគេសម្លាប់ឬយ៉ាងណានោះដែរ។
បើតាមក្រសួងការពារជាតិរុស្ស៊ី បានឲ្យដឹង ថា នាវា Krasnodar ជានាវាមុជទឹកអគ្គិសនីប្រើម៉ាស៊ូត ហើយត្រូវបានផលិតឡើង សម្រាប់កងនាវាចរណ៍របស់រុស្ស៊ី ប្រចាំនៅសមុទ្រខ្មៅ។ នាវាមុជទឹក ប្រភេទនេះ ត្រូវបានរចនាឡើង សម្រាប់ការប្រយុទ្ធ ជាមួយនឹងនាវា នៅលើផ្ទៃទឹក និង នាវាមុជទឹក ដាក់គ្រាប់មីន និង ឈ្លបយកការណ៍។
ប្រព័ន្ធផ្សព្វផ្សាយអនឡាញ គ្របដណ្តប់នៅក្នុងប្រទេសរុស្ស៊ី និង អ៊ុយក្រែន បានអះអាង ថា លោក Rzhitsky ត្រូវបានខ្មាន់កាំភ្លើង បាញ់ចំនួន៤គ្រាប់ ខណៈគាត់កំពុងតែរត់ហាត់ប្រាណ នៅពេលព្រឹក នៅជិតកន្លែងកីឡាមួយកន្លែង។ មេបញ្ជាការរូបនេះ បានចូលរួម វាយប្រហារ ដោយមីស៊ីល ចេញពីនាវាមុជទឹក ត្រង់ទិសដៅ មកលើទីក្រុងវីនីតសៀ (Vinnytsia) របស់ប្រទេសអ៊ុយក្រែន កាលពីខែកក្កដា ឆ្នាំ២០២២ ដោយបានសម្លាប់ជនស៊ីវិល ចំនួន២៣នាក់ រួមទាំង កុមារចំនួន៣នាក់ ផងដែរ។
លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានហៅការវាយប្រហារ ដោយមីស៊ីល មកលើទីក្រុងនេះ ជាអំពើភេរវកម្ម ដោយបើកចំហ។ សកម្មភាពរបស់កងទ័ពរុស្ស៊ី នាពេលនោះ បានសម្លាប់ជនស៊ីវិលជាច្រើននាក់ ខណៈពួកគេកំពុងតែធ្វើអាជីវកម្ម ប្រចាំថ្ងៃរបស់ខ្លួន។
លោក អង់តូនីញ៉ូ ហ្គូទែររ៉េស (Antonio Guterres) អគ្គលេខាធិការ អង្គការសហប្រជាជាតិ បានបញ្ជាក់ នាពេលនោះ ថា គាត់មានការរន្ធត់ចិត្ដយ៉ាងខ្លាំង ចំពោះការស្លាប់របស់ជនស៊ីវិល នៅទីក្រុង Vinnytsia ខណៈសហភាពអឺរ៉ុប បានចាត់ទុក ជាអំពើឃោរឃៅបំផុត បង្កឡើង ដោយរុស្ស៊ី៕
