រដ្ឋធានីញូវដេលី៖ ជាមួយនឹងឥទ្ធិពល នៃសង្គ្រាមរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) នៅក្នុងប្រទេសអ៊ុយក្រែន ធ្វើឲ្យប៉ះពាល់យ៉ាងខ្លាំង ដល់សេដ្ឋកិច្ចពិភពលោក ទើបឥណ្ឌា និង អារ៉ាប់ ពិភាក្សាគ្នា ជុំវិញបញ្ហាប្រឈម នៅចំពោះមុខ និង ការធ្វើពាណិជ្ជកម្ម។
សារព័ត៌មានអារ៉ាប់ Khaleej Times បានចេញផ្សាយ កាលពីថ្ងៃពុធ ទី២៣ ខែវិច្ឆិកា ថា ក្រោយកិច្ចប្រជុំ នៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ (CEPA) នៅក្នុងរដ្ឋធានីញូវដេលី លោក សេក អាប់ឌូលឡាហ៍ ប៊ីន ហ្សាយេដ (Sheikh Abdullah bin Zayed) រដ្ឋមន្ដ្រីក្រសួងការបរទេសអារ៉ាប់អេមីរ៉េត (UAE) និង សមភាគីឥណ្ឌា លោក ស៊ូប្រាម៉ាន់យ៉ាម ចៃសានការ (Subrahmanyam Jaishankar) បានពិភាក្សាគ្នា លើបញ្ហាថាមពល សន្ដិសុខស្បៀងអាហារ និង ការបង្កើនការធ្វើពាណិជ្ជកម្មទ្វេភាគី។
ប្រទេសមហាយក្សអាស៊ីខាងត្បូង និង អារ៉ាប់រួម បានចុះហត្ថលេខា លើ CEPA កាលពីថ្ងៃទី១៨ ខែកុម្ភៈ ឆ្នាំ២០២២។ ប្រទេសទាំង២ រំពឹង ថា នឹងបង្កើនការធ្វើពាណិជ្ជកម្មមិនមែនប្រេងទ្វេភាគីប្រចាំឆ្នាំ កើនឡើង ចន្លោះពី៦០ពាន់លានដុល្លារ រហូតដល់១០០ពាន់លានដុល្លារសហរដ្ឋអាមេរិក នៅក្នុងរយៈពេលចាប់ពី៣ទៅ៥ឆ្នាំ ខាងមុខនេះ។
ក្រសួងការបរទេសឥណ្ឌា បានបញ្ជាក់ ថា ការនាំចេញរបស់ឥណ្ឌា ទៅកាន់ប្រទេសអារ៉ាប់អេមីរ៉េត ឬ អារ៉ាប់រួម (UAE) ចន្លោះពីខែមេសា ដល់ខែកញ្ញា មានទំហំទឹកប្រាក់ ប្រហែល១៦ពាន់លានដុល្លារ ដោយកើតឡើង រហូតដល់២៤ភាគរយ។ ចំណែកការនាំចូលរបស់ប្រទេសអាស៊ីខាងត្បូងមួយនេះវិញ ក៏បានកើតឡើងដល់៣៨ភាគរយ ដែលមានទំហំទឹកប្រាក់ ២៨,៤ពាន់លានដុល្លារ នៅក្នុងរយៈពេលដូចគ្នានេះ។
ទីភ្នាក់ងារសារព័ត៌មានអារ៉ា់ប់អេមីរ៉េត WAM បានដកស្រង់សម្ដីរបស់ប្រមុខការទូតអារ៉ាប់រួម យកមកចុះផ្សាយ ថា «យើងកំពុងតែស្វះស្វែង បង្កើននូវកិច្ចសហប្រតិបត្ដិការសេដ្ឋកិច្ចរបស់យើង ដើម្បីសម្រេចបានតាមមហិច្ឆតារបស់យើង លើការធ្វើពាណិជ្ជកម្ម មិនមែនជាប្រេង ឲ្យកើនឡើង រហូតដល់១០០ពាន់លានដុល្លារ នៅក្នុងរយៈពេល៥ឆ្នាំ ខាងមុខនេះ»៕