រដ្ឋធានីព្យុងយ៉ាង៖ រហូតមកដល់ពេលនេះ បើទោះជាកូរ៉េខាងជើង នៅតែមិនទាន់ឆ្លងផុត ពីទណ្ឌកម្មរបស់ក្រុមប្រឹក្សាសន្ដិសុខ អង្គការសហប្រជាជាតិ ជុំវិញការបាញ់សាកល្បងមីស៊ីលបាលិស្ទីកអន្ដរទ្វីបយ៉ាងណាក្ដី ប៉ុន្ដែក្រុងព្យុងយ៉ាង នៅតែមានមហិច្ឆតាខ្លាំងបំផុត កសាងកម្លាំងទ័ពនុយក្លេអ៊ែរ ឲ្យបានខ្លាំងក្លាបំផុត នៅលើពិភពលោក។
សារព័ត៌មាន DW បានចេញផ្សាយ កាលពីថ្ងៃអាទិត្យ ទី២៧ ខែវិច្ឆិកា ថា បណ្ដាញផ្សព្វផ្សាយរបស់រដ្ឋ បានរាយការណ៍ ថា លោក គីម ជុងអ៊ុន មេដឹកនាំកូរ៉េខាងជើង កំពុងតែកសាងកម្លាំងទ័ពនុយក្លេអ៊ែរដ៏ខ្លាំងក្លាបំផុត នៅលើពិភពលោក ខណៈមានភាពតានតឹងកាន់តែខ្លាំងឡើងជាមួយនឹងសហរដ្ឋអាមេរិក និង កូរ៉េខាងត្បូង។ ជាមួយគ្នានេះ លោក គីម ក៏បានលើកទឹកចិត្តដល់ក្រុមអ្នកវិទ្យាសាស្ដ្រ និង ទាហាន ពាក់ព័ន្ធ នៅក្នុងការការសាកល្បងកាំជ្រួច Hwasong-17 ជាមីស៊ីលដ៏ធំបំផុតរបស់ក្រុងព្យុងយ៉ាង។
ទីភ្នាក់ងារមជ្ឈមណ្ឌលសារព័ត៌មានកូរ៉េ (KCNA) បានរាយការណ៍ ថា ខណៈដំឡើងឋានន្តរស័ក្តិដល់មន្ត្រីយោធារាប់សិបនាក់ ពាក់ព័ន្ធនឹងការបាញ់បង្ហោះកាំជ្រួចមីស៊ីលផ្លោងដ៏ធំបំផុតរបស់កូរ៉េខាងជើង Hwasong-17 កាលពីពេលថ្មីៗនោះ លោក គីមកាលពីថ្ងៃសៅរ៍ សប្ដាហ៍មុន បានប្រកាសពីបទបញ្ជា ថា កូរ៉េខាងជើង កំពុងតែកសាងកងទ័ពនុយក្លេអ៊ែរ ដើម្បីការពារសេចក្តីថ្លៃថ្នូរ អធិបតេយ្យភាពរបស់រដ្ឋ និង ប្រជាជនរបស់ខ្លួន។ ចំណែកមហិច្ឆតាដ៏ចម្បងបំផុតរបស់គាត់ ត្រូវតែបង្កើតកម្លាំងទាហានយុទ្ធសាស្ត្រដ៏មានឥទ្ធិពលបំផុតរបស់ពិភពលោក ហើយនេះជាកម្លាំងដាច់ខាត មិនធ្លាប់មានពីមុន នៅក្នុងសតវត្សនេះ»។
លោក គីម ជុងអ៊ុន មេដឹកនាំកូរ៉េខាងជើង បានបញ្ជាក់ ថា កាំជ្រួច Hwason-17 ជាមីស៊ីលបាលិស្ទីកអន្ដរទ្វីប (ICBM) មានសមត្ថភាព អាចវាយប្រហារដល់ទឹកដីសហរដ្ឋអាមេរិក ហើយវាជាអាវុធយុទ្ធសាស្ដ្រដ៏ខ្លាំងក្លាបំផុតរបស់ពិភពលោក។ ជាមួយគ្នានេះ ក្រុងព្យុងយ៉ាង បានបង្ហាញ អំពីការតាំងចិត្ត និង សមត្ថភាពរបស់កូរ៉េខាងជើង នៅក្នុងការកសាងកងទ័ពដ៏ខ្លាំងបំផុតនេះ។
កូរ៉េខាងជើង បានបាញ់មីស៊ីលបាលិស្ទីកអន្ដរទ្វីប កាលពីថ្ងៃទី១៨ ខែវិច្ឆិកា នាំឲ្យមានការថ្កោលទោសយ៉ាងខ្លាំង ពីសមាជិក ក្រុមប្រឹក្សាសន្ដិសុខ អង្គការសហប្រជាជាតិ ដោយចាត់ទុក ជាការបង្កហេតុ និង ការគំរាមកំហែងដល់សន្ដិភាព និង សន្ដិសុខអន្ដរជាតិ។
លោក គីម ជុងអ៊ុន បានសង្កត់ធ្ងន់ ថា ក្រុមអ្នកវិទ្យាសាស្ដ្រកូរ៉េខាងជើង ក៏បានធ្វើ«ការលោតផ្លោះដ៏អស្ចារ្យមួយ ឆ្ពោះទៅមុខ នៅក្នុងការអភិវឌ្ឍន៍បច្ចេកវិទ្យា បំពាក់ក្បាលគ្រាប់នុយក្លេអ៊ែរនៅលើមីស៊ីលផ្លោង។ នេះជាចំណុចសំខាន់ ប្រសិនបើកូរ៉េខាងជើង ចង់សម្រេចបាននូវគោលដៅរបស់ខ្លួន នៅក្នុងការកាន់កាប់អាវុធនុយក្លេអ៊ែរ អាចវាយប្រហារ ទៅដល់ទឹកដីសត្រូវចម្បងរបស់ខ្លួន គឺសហរដ្ឋអាមេរិក៕
