រដ្ឋធានីវ៉ាស៊ីនតោន៖ ក្រោយការផ្ទុះឡើងនូវសកម្មភាពបះបោរប្រដាប់អាវុធ បង្កឡើងដោយកម្លាំងទាហានស៊ីឈ្នួលវ៉ាគណឺរ នៅលើទឹកដីរបស់រុស្ស៊ី កាលពីប៉ុន្មានថ្ងៃមុនេះ ហើយមេដឹកនាំរបស់ក្រុមនេះ ក៏បានសម្រេចនិរទេសទៅកាន់ប្រទេសឡារុស នោះមក សហរដ្ឋអាមេរិក កំពុងតែកំណត់គោលដៅ ទៅលើសកម្មភាពរ៉ែមាស នៃក្រុមហ៊ុនទាហានស៊ីឈ្នួលរបស់លោក ព្រីហ្គោហ្ស៊ីន។
សារព័ត៌មាន Channel News Asia មានមូលដ្ឋាន នៅក្នុងប្រទេសសិង្ហបុរី បានចេញផ្សាយ កាលពីព្រឹក ថ្ងៃពុធ ទី២៨ ខែមិថុនា ថា សហរដ្ឋអាមេរិក កាលពីថ្ងៃអង្គារ (ទី២៧) បានដាក់ទណ្ឌកម្មជាច្រើន ដោយមានគោលបំណង បង្អាក់សកម្មភាពរុករករ៉ែមាស នៅទ្វីបអាហ្វ្រិក សម្រាប់ការផ្តល់មូលនិធិ ជួយដល់ក្រុមហ៊ុនទាហានស៊ីឈ្នួល Wagner Group ។ ទន្ទឹមគ្នានេះ រដ្ឋាភិបាលក្រុងវ៉ាស៊ីនតោន បានប្តេជ្ញា ថា នឹងរក្សាពួកទាហានស៊ីឈ្នួលទាំងនេះ ឱ្យទទួលខុសត្រូវ ចំពោះការរំលោភបំពានជាច្រើន ក្រោយពេលពួកគេ បានងើបបះបោរឡើង ដោយប្រដាប់អាវុធធុនធ្ងន់ នៅក្នុងប្រទេសរុស្ស៊ី កាលពីថ្ងៃសៅរ៍ ទី២៤ ខែមិថុនា។
វិធានការនានា ប្រឆាំងនឹងក្រុមហ៊ុនទាហានស៊ីឈ្នួលរបស់រុស្ស៊ី Wagner ត្រូវបានគ្រោងទុក តាំងពីមុនមកហើយ ប៉ុន្តែសកម្មភាពេះ បានផ្អាកទៅវិញមួយរយៈពេលខ្លី ស្របពេលក្រុមមន្ត្រីសហរដ្ឋអាមេរិក បានព្យាយាម បញ្ចៀសនូវការលេចមុខ ជួយគាំទ្រដល់ភាគីណាមួយ នៅក្នុងការតស៊ូប្រជែងអំណាច រវាងមេទាហានស៊ីឈ្នួល លោក យ៉ែវហ្គេនី ព្រីហ្គោហ្ស៊ីន (Yevgeny Prigozhin) និង ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin)។
ក្រសួងហិរញ្ញវត្ថុរបស់សហរដ្ឋអាមេរិក បានប្រកាស ដាក់ទណ្ឌកម្មជាច្រើន ប្រឆាំងនឹងក្រុមហ៊ុន Midas Resources (មីដាស រីសស) ដែលកំពុងតែប្រតិបត្ដិការរុករករ៉ែ នៅសាធារណរដ្ឋអាហ្វ្រិកកណ្ដាល និង ក្រុមហ៊ុន Diamville (ឌីយ៉ាមវិលឡេ) ដែលជាក្រុមហ៊ុនទិញមាស និង ពេជ្រ នៅក្នុងប្រទេសអាហ្វ្រិកមួយនេះ។ ក្រុមហ៊ុនទាំង២នេះ ត្រូវបានគេរាយការណ៍ ថា កំពុងតែស្ថិតក្រោមការគ្រប់គ្រងរបស់លោក ព្រីហ្គោហ្ស៊ីន
វិធានការដាក់ទណ្ឌកម្មទាំងនេះ នឹងរារាំងដល់ទ្រព្យសម្បត្តិណាមួយ នៅលើទឹកដីរបស់សហរដ្ឋអាមេរិក និង ដាក់ទណ្ឌកម្ម លើប្រតិបត្តិការជាមួយក្រុមហ៊ុនទាំងនោះ។ សហរដ្ឋអាមេរិក ក៏បានកំណត់គោលដៅ លើក្រុមហ៊ុន មានមូលដ្ឋាននៅទីក្រុងឌូបៃ ឈ្មោះ Industrial Resources General Trading (អ៊ីនដាសស្ត្រៀល រីសស ជេណឺរ៉ល ត្រេឌីង) ក្រោមការចោទប្រកាន់ពីបទគ្រប់គ្រងហិរញ្ញវត្ថុ សម្រាប់ការជួញដូររបស់ Prigozhin នៅក្នុងក្រុមហ៊ុន Diamville ។
លោក ប្រ៊ៀន ណែលសុន (Brian Nelson) មន្ត្រីទទួលបន្ទុកលើការដាក់ទណ្ឌកម្ម នៃក្រសួងហិរញ្ញវត្ថុសហរដ្ឋអាមេរិក បានបញ្ជាក់ នៅក្នុងសេចក្តីថ្លែងការណ៍មួយ ថា «ក្រុមហ៊ុនទាហានស៊ីឈ្នួលរបស់រុស្ស៊ី Wagner Group តែងតែផ្តល់មូលនិធិ ជួយដល់ប្រតិបត្តិការដ៏ឃោរឃៅ មួយផ្នែករបស់ខ្លួន សម្រាប់ការកេងប្រវ័ញ្ចធនធានធម្មជាតិ នៅក្នុងប្រទេសជាច្រើន មានដូចជា សាធារណរដ្ឋអាហ្វ្រិកកណ្តាល និង ប្រទេសម៉ាលី…ជាដើម។ សហរដ្ឋអាមេរិក នឹងបន្តកំណត់គោលដៅលើលំហូរប្រាក់ចំណូលរបស់ក្រុមហ៊ុន Wagner Group សម្រាប់ការកាត់បន្ថយនូវការពង្រីកអំពើហិង្សារបស់ក្រុមហ៊ុនទាហាស៊ីឈ្នួលមួយនេះ នៅក្នុងទ្វីបអាហ្វ្រិក អ៊ុយក្រែន និង កន្លែងផ្សេងៗជាច្រើនទៀត»។
ក្រុម Wagner Group ក្លាយជាក្រុមហ៊ុនចុះកិច្ចសន្យា ដោយរបបយោធា នៅទ្វីបអាហ្វ្រិក ហើយបានដើរតួនាទីយ៉ាងសំខាន់ នៅក្នុងអំពើហិង្សា និង ការលុកលុយរបស់រុស្ស៊ី ប្រឆាំងនឹងអ៊ុយក្រែន ដោយលោក ព្រីហ្គោហ្ស៊ីន បានជំរុញឱ្យលោកប្រធានាធិបតី ពូទីន ប្រើកម្លាំងកាន់តែខ្លាំងឡើង៕
