រដ្ឋធានីប៉េកាំង៖ ក្រោយពេលបាត់មុខរដ្ឋមន្ដ្រីក្រសួងការបរទេស ទើបនឹងតែងតាំងថ្មី ពីក្រសែភ្នែករបស់សាធារណជន អស់រយៈពេលជាច្រើនសប្ដាហ៍កន្លងមក ប្រទេសចិន ក៏បានតែងតាំងអតីតប្រមុខការទូត លោក វ៉ាង យី ឲ្យចូលមកកាន់តំណែងរបស់គាត់ ជាថ្មីវិញ។
សារព័ត៌មាន BBC បានចេញផ្សាយ នៅថ្ងៃពុធ ទី២៦ ខែកក្កដា ថា រហូតមកដល់ថ្ងៃពុធ នេះ នៅតែមានគេគិតពិចារណា ទៅលើលោក ឈិន ហ្កាង (Qin Gang) រដ្ឋមន្ដ្រីក្រសួងការបរទេសចិន ក្រោយពេលគាត់ត្រូវបានដកហូត ចេញពីតំណែង កាលពីថ្ងៃអង្គារ។ ប៉ុន្ដែរដ្ឋាភិបាលក្រុងប៉េកាំង មិនបានផ្ដល់ហេតុផលណាមួយ ជុំវិញការដកតំណែងរបស់លោក ឈិន ដែលត្រូវបានប្រកាស បន្ទាប់ពីកិច្ចប្រជុំបន្ទាន់មួយ កាលពីថ្ងៃអង្គារ។ ចំណែកអ្នកស្នងតំណែងរបស់លោក ឈិន គឺលោក វ៉ាង យី (Wang Yi) អតីតរដ្ឋមន្ដ្រីក្រសួងការបរទេស ត្រូវបានតែងតាំងឲ្យវិលមកកាន់តំណែងនេះជាថ្មីវិញ។
ភាពស្ងៀមស្ងាត់ជាផ្លូវការ ជុំវិញការបាត់ខ្លួនដ៏អាថ៌កំបាំងរបស់លោក ឈិន រហូតមកដល់បច្ចុប្បន្ន កំពុងតែបង្កឱ្យមានការរំពឹងទុក ទាំងនៅក្នុងប្រទេសចិន និង ក្រៅប្រទេស។ ទន្ទឹមគ្នានេះដែរ ប្រព័ន្ធផ្សព្វផ្សាយសង្គម កាលពីថ្ងៃពុធ បានស្វែងរក និង រំពឹងទុកជុំវិញការបណ្តេញលោក ឈិន ហ្កាង ចេញពីតំណែងភ្លាមៗ។
បណ្ដាញផ្សព្វផ្សាយរបស់រដ្ឋ ចិន បានប្រកាសយ៉ាងខ្លីមួយ កាលពីថ្ងៃអង្គារ ថា សភាប្រជាជនចិន បានបោះឆ្នោតែងតាំងលោក វ៉ាង យី (Wang Yi) ជារដ្ឋមន្ដ្រីក្រសួងការបរទេសចិន។
ពាណិជ្ជកម្ម
អ្នកសង្កេតការណ៍ បានអះអាង ថា វាជារឿងមិនធម្មតាទេ ដែលមានពាក្យចចាមអារ៉ាម អំពីមន្ត្រីជាន់ខ្ពស់បែបនេះ ត្រូវបានពិភាក្សា នៅលើបណ្ដាញអ៊ិនធើណេតរបស់ចិន ដោយគ្មានការត្រួតពិនិត្យពេញលេញ។
លោក អ៊ាន ចុង (Ian Chong) ជាអ្នកស្រាវជ្រាវ មកពីសាកលវិទ្យាល័យជាតិសិង្ហបុរី បានប្រាប់ BBC កាលពីសប្តាហ៍មុន ថា «អវត្តមានរបស់ប្រមុខការទូតចិន ធ្វើឱ្យមនុស្សឆ្ងល់ ថាតើវាជាការពិតដែរឬទេ ចំពោះពាក្យចចាមអារ៉ាម អំពីការតស៊ូអំណាច អំពើពុករលួយ ការរំលោភបំពានអំណាច និង មុខតំណែង ហើយទំនាក់ទំនងស្នេហា»។
លោក ឈិន ហ្កាង វ័យ៥៧ឆ្នាំ ត្រូវបានគេមើលឃើញ ថា ជាសហការីជិតស្និទ្ធរបស់ប្រធានាធិបតីចិន លោក ស៊ី ជិនពីង (Xi Jinping) និង ជាមនុស្សម្នាក់ ស្ថិតក្នុងចំណោមអ្នកដែលត្រូវបានតែងតាំង ឱ្យកាន់តំណែងកំពូលវ័យក្មេងបំផុត នៅក្នុងប្រវត្តិសាស្ត្ររបស់ប្រទេសចិន។ កាលពីជាងមួយខែមុន គាត់បានជួបជាមួយរដ្ឋមន្ត្រី ក្រសួងការបរទេសសហរដ្ឋអាមេរិក លោក អេនតូនី ប្ល៊ីនខេន (Antony Blinken) នៅក្នុងរដ្ឋធានីប៉េកាំង ខណៈភាគីទាំងពីរ បានស្វែងរកនូវការស្តារទំនាក់ទំនងការទូតកម្រិតខ្ពស់បំផុត ឡើងវិញ។
លោក ដានីយ៉ែល រុសសែល (Daniel Russel) មកពីវិទ្យាស្ថានគោលនយោបាយសង្គមអាស៊ីបានអះអាង ថា ការធ្លាក់ពីតំណែងរបស់លោក ឈិន ហ្កាង គឺមិននឹកស្មានដល់ ហើយវាឆាប់រហ័សពេក។ ចាប់តាំងពីសកម្មភាពទាំង២ ត្រូវបានសន្មតថា ជាមេដឹកនាំរបស់ប្រទេសចិន វគ្គនេះ នឹងត្រូវបានគេមើលឃើញ ថា វាជាការអាម៉ាស់មួយ នៅក្នុងការវិនិច្ឆ័យ មកលើមន្ដ្រីកំពូល»។
លោក ឈិន ហ្កាង បានបាត់មុខពីការងារធម្មតារបស់គាត់ អស់រយៈពេល១ខែ ហើយក៏បានខកខាតទៅចូលរួមកិច្ចប្រជុំកំពូលអាស៊ាន នៅក្នុងប្រទេសឥណ្ឌូណេស៊ី។ ប៉ុន្ដែនៅក្នុងការបន្យល់យ៉ាងខ្លី មិនបានបញ្ជាក់ អំពីបញ្ហាសុខភាពនោះឡើយ ខណៈជំនួបជាមួយនឹងប្រមុខការទូតសហភាពអឺរ៉ុប លោក ចូសេប ប័ររ៉ែល (Josep Borrell) នៅថ្ងៃទី៤ ខែកក្កដា ត្រូវបានលុបចោលគ្មានការប្រាប់ពីមូលហេតុ ទើបនាំឲ្យមានពាក្យចចាមអារ៉ាម កើតឡើងជាហូរហែ៕