រាជធានីបាងកក៖ នាយករដ្ឋមន្ដ្រីដ៏មានឥទ្ធិពលរបស់ប្រទេសថៃ ត្រូវបានពួកយោធា ធ្វើរដ្ឋប្រហារបណ្ដេញ ចេញពីអំណាច ដែលកំពុងតែនិរទេសខ្លួន ដោយខ្លួនឯង ទៅរស់នៅក្រៅប្រទេស តែងតែព្យាយាម វិលត្រឡប់ មកកាន់ប្រទេសកំណើតរបស់គាត់វិញ ជាច្រើនលើកច្រើនសាមក ប៉ុន្ដែឥឡូវនេះ គាត់បានប្ដេជ្ញា វិលត្រឡប់ចូលមកប្រទេសថៃ ជាថ្មី ដើម្បីរៀបចំធ្វើពិធីបុណ្យសពរបស់អ្នកបើកបររថយន្ដផ្ទាល់ខ្លួនរបស់គាត់។
សារព័ត៌មានរបស់ថៃ Bangkok Post បានចេញផ្សាយ កាលពីព្រលប់ ថ្ងៃអង្គារ ទី២៥ ខែកក្កដា ថា លោក ថាក់ស៊ីន ស៊ីណាវ៉ាត្រា (Thaksin Shinawatra) អតីតនាយករដ្ឋមន្ដ្រីថៃ បានប្ដេជ្ញា នឹងវិលត្រឡប់មកកាន់ប្រទេសថៃវិញ ដើម្បីចូលរួមពិធីបុណ្យសពរបស់អ្នកបើកបររថយន្ដឲ្យគាត់។
លោក វីឆៃ ឆាងឡេក (Wichai Changlek) អតីតអ្នកបើកបររថយន្ដផ្ទាល់ខ្លួនរបស់លោក ថាក់ស៊ីន បានទទួលមរណភាព កាលពីសប្ដាហ៍មុន នៅក្នុងវ័យ៧៣ឆ្នាំ។ ពិធីបុណ្យសពរបស់គាត់ បានប្រារព្ធធ្វើឡើង នៅចន្លោះពីថ្ងៃទី២០-២៤ ខែកក្កដា នៅក្នុងវត្ដខេម៉ាភីថារ៉ាម រាជាវ៉ូរ៉ាវីហាន ( Wat Khemaphitaram Rajaworaviharn) ស្ថិតក្នុងខេត្តនុនថាប៊ូរី ប្រទេសថៃ។
ពាណិជ្ជកម្ម
ក្រុមគ្រួសាររបស់ស៊ីណាវ៉ាត្រា រួមទាំងលោកស្រី ផេថុងថាន (Paetongtarn) និង លោកស្រី ភិនថុងថា (Pinthongta) ជាកូនស្រីរបស់លោក ថាក់ស៊ីន ក៏បានចូលរួម នៅក្នុងពិធីបុណ្យសពនោះ ផងដែរ។ លោក ថាក់ស៊ីន បានផ្ញើកម្រងផ្កា ហើយក៏បានផ្ញើសាររំលែកទុក្ខ ជូនដល់ក្រុមគ្រួសាររបស់លោក វីឆៃ និង បានជំរុញឱ្យពួកគេ រង់ចាំនូវការត្រឡប់របស់គាត់ នៅមុនពេលពិធីបូជាសពនោះ។ ដូច្នេះគាត់អាចនឹងទៅគោរពវិញ្ញាណក្ខន្ធរបស់អតីតអ្នកបើករថយន្ដរបស់គាត់ ដោយផ្ទាល់។
លោក ថាក់ស៊ីន ស៊ីណាវ៉ាត្រា (Thaksin Shinawatra) នាយករដ្ឋមន្ដ្រីថៃ ត្រូវបានបណ្ដេញចេញពីអំណាច នៅក្នុងរដ្ឋប្រហារយោធា នាអំឡុងឆ្នាំ២០០៦។ ចាប់តាំងពីពេលនោះ រហូតមក គាត់បានរស់នៅនិរទេសខ្លួន ដោយខ្លួនឯង នៅក្រៅប្រទេស ដោយបានគេចចេញពីប្រទេស នៅមុនការកាត់ទោសគាត់ ពីបទរំលោភបំពានអំណាច។
លោក ថាក់ស៊ីន បានថ្លែង ជាច្រើនលើកច្រើនសារួចមកហើយ នៅក្នុងរយៈពេលប៉ុន្មានខែកន្លងមកនេះ ថា គាត់ចង់វិលត្រឡប់ មកកាន់ប្រទេសកំណើតរបស់គាត់ ហើយគាត់ក៏បានត្រៀមខ្លួនរួចរាល់ សម្រាប់ការប្រឈមមុខតាមផ្លូវច្បាប់។ គាត់សង្ឃឹម ថា នឹងមកវិលមកកាន់ប្រទេសថៃ នៅសប្ដាហ៍នេះ ប៉ុន្ដែក្រោយមក គាត់បានផ្ដាស់ប្ដូរចិត្តវិញ ដោយសារតែគាត់មិនចង់រំខាន ដល់ពេលវេលាមិនមានភាពប្រាកដប្រជាខាងនយោបាយ នៅក្នុងប្រទេសថៃ។
គណៈកម្មការជាតិប្រឆាំងអំពើពុករលួយ (NACC) របស់ថៃ បានចោទប្រកាន់ថាក់ស៊ីន ខណៈនោះ គាត់ត្រូវបានជ្រើសរើសជានាយករដ្ឋមន្ត្រី និង ជាមេដឹកនាំគណបក្ស ថៃ រ៉ាក់ថៃ ដែលកំពុងកាន់កាប់អំណាច ថា គាត់មិនបានបង្ហាញ អំពីទ្រព្យសម្បត្តិ មានតម្លៃប្រហែល ២,៣៧ពាន់លានបាត (ប្រាក់ថៃ) ឬ ស្មើនឹងប្រហែលជាង ៦៨,៦៦លានដុល្លារអាមេរិក។
NACC បានរកឃើញថា គាត់បានប្រើប្រាស់បុគ្គលិកក្នុងស្រុករបស់គាត់ រួមទាំង លោក វីឆៃ ជាអ្នកបើកបររថយន្ដផ្ទាល់ខ្លួន ជាម្ចាស់ភាគហ៊ុនប្រុកស៊ី ហើយបានផ្ទេរភាគហ៊ុន ដែលគាត់បានកាន់កាប់ទៅឱ្យជំនួយការ នៅក្នុងស្រុករបស់គាត់ ដើម្បីលាក់បាំងកម្មសិទ្ធិរបស់គាត់។ ការស៊ើបអង្កេតបានបង្ហាញថា លោក វីឆៃ មានភាគហ៊ុននៅក្នុងក្រុមហ៊ុន Shinawatra មួយចំនួន រួមមានភាគហ៊ុន ៣៤៦ ៥០០ នៅក្នុងក្រុមហ៊ុន Shinawatra Computer និង គមនាគមន៍ ហើយមានភាគហ៊ុន ចំនួន ២៤ ៩៨៨ ៩៨៦ ភាគហ៊ុន នៅក្នុងក្រុមហ៊ុន Alpine Golf និង Sports Club ។
នៅក្នុងអំឡុងឆ្នាំ២០០១ លោក វីឆៃ បានពន្យល់ប្រាប់ទៅដល់តុលាការធម្មនុញ្ញ ថា ភរិយារបស់លោក ថាក់ស៊ីន គឺលោកស្រី ឃុនយីង ផូតចាម៉ាន ណា ភូមបេចរ៉ា (Khunying Potjaman na Pombejra) បានប្រាប់គាត់ ថា លោកស្រី ចង់ប្រើឈ្មោះរបស់គាត់ នៅក្នុងនាមជាម្ចាស់ភាគហ៊ុន ដោយមិនពន្យល់ពីមូលហេតុនោះឡើយ។
បើទោះជាយ៉ាងណា នៅទីបំផុត តុលាការបានសម្រេច ថា លោកមហាសេដ្ឋី ជានាយករដ្ឋមន្ដ្រី មិនមានចេតនាណាមួយ លាក់ទ្រព្យសម្បត្ដិរបស់គាត់នោះឡើយ ហើយទទួលស្គាល់ ថា វាជាកំហុសដ៏ស្មោះត្រង់។ លោក ថាក់ស៊ីន ក៏បានក្លាយជានាយករដ្ឋមន្ត្រី នៅឆ្នាំដដែលនោះ រហូតដល់មានការធ្វើរដ្ឋប្រហារ នៅក្នុងឆ្នាំ២០០៦៕