សោកនាដកម្មមួយទៀតហើយ សម្រាប់ប្រទេសបង់ក្លាដែស ដោយសារករណីអគ្គិភ័យឆេះរោងចក្រ នៅតំបន់ខាងក្រៅទីក្រុង ដាកា (Dhaka) បណ្តាលឲ្យស្លាប់ កម្មករយ៉ាងតិច ១០នាក់ និងច្រើនសិបនាក់ផ្សេងទៀត រងរបួស ។
មូលហេតុ នៃអគ្គិភ័យ ឆេះរោងចក្រ Luxury Fan Factory ស្ថិតនៅក្នុងតំបន់ Gazipur របស់ប្រទេសបង់ក្លាដែស កាលពីព្រលប់ថ្ងៃទី១៥ ខែធ្នូ ឆ្នាំ២០១៩នោះ គេនៅមិនទាន់ដឹងនៅឡើយទេ ។ អាជ្ញាធរពន្លត់អគ្គិភ័យបង់ក្លាដែស ដែលនៅបន្ទាប់ពីគ្រប់គ្រងស្ថានការណ៍ភ្លើងឆេះ បានហើយនោះអះអាងបឋមថា បានរកឃើញ សាកសពជនរងគ្រោះ ត្រូវភ្លើងឆេះខ្លោច សុះខ្លួន ១០នាក់ ហើយថា ជនរងគ្រោះ អាច កើនឡើង ច្រើនជាងនេះ ។ ចំណែក អ្នករងរបួស មានច្រើននាក់ មិនទាន់ អាចកំណត់ដឹងច្បាស់ថា មានចំនួនប៉ុន្មាននាក់នោះទេ ។ បច្ចុប្បន្ន អាជ្ញាធរ បាននិងកំពុងស៊ើបអង្កេត រកមូលហេតុ ពិតបណ្តាលឲ្យភ្លើងឆេះនេះ ។ លោក Zillur Rahman អ្នកនាំពាក្យអាជ្ញាធរពន្លត់អគ្គិភ័យ បានបញ្ជាក់ថា នៅពេលនេះ អាជ្ញាធរ បាននិងកំពុងស្វែងរកថា អាចនៅមានជនរងគ្រោះបន្ថែមទៀត បានបាត់បង់ជីវិត ។
គួរបញ្ជាក់ថា ករណីសោកនាដកម្ម អគ្គិភ័យឆេះរោងចក្រ បណ្តាលឲ្យស្លាប់ កម្មករ នៅក្នុងប្រទេសបង់ក្លាដែស គឺតែងតែកើតមានជាញឹកញាប់ ។ ជាក់ស្តែង កាលពីថ្ងៃទី១១ ខែធ្នូ ឆ្នាំ២០១៩កន្លងទៅថ្មីៗនេះ អគ្គិភ័យបានឆាបឆេះរោងចក្រប្ល៉ាស្ទិក មួយ កន្លែងស្ថិត នៅជិតទីក្រុង ដាកា ស្លាប់កម្មករយ៉ាងតិច ១៥នាក់ ផងដែរ ៕