រាជធានីឡុងដ៍៖ ជាមួយនឹងការហ៊ុមព័ទ្ធ ដោយវិបត្ដិនយោបាយ និង សេដ្ឋកិច្ច រហូតនាំឲ្យមានការរិះគន់យ៉ាងខ្លាំងដល់រដ្ឋាភិបាលរបស់លោកស្រី លីស ត្រាស់ ទើបលោកស្រី បានចេញមុខសុំអភ័យទោស ហើយប្រកាសលាលែង ចេញពីតំណែង ក្រោយពេលលោកស្រី កាន់កាប់តំណែងកំពូលនេះ បានត្រឹមតែរយៈពេល៤៥ថ្ងៃ បន្ទាប់ពីស្នងតំណែង បន្ដពីលោក បូរីស ចនសុន (Boris Johnson)។
សារព័ត៌មាន The Guardian បានចេញផ្សាយ កាលពីថ្ងៃព្រហស្បតិ៍ ទី២០ ខែតុលា ថា លោកស្រី លីស ត្រាស់ (Liz Truss) បានប្រកាសលាលែង ចេញពីតំណែងនាយករដ្ឋមន្ដ្រី ក្រោយពេលលោកស្រី បានឡើងកាន់តំណែង ត្រឹមតែរយៈពេល៤៥ថ្ងៃប៉ុណ្ណោះ។
លោកស្រី លីស ត្រាស់ បានបញ្ជាក់ ថា អ្នកស្នងតំណែងពីលោកស្រី នឹងត្រូវជ្រើសរើស នៅសប្តាហ៍ក្រោយ បន្ទាប់ពីការបះបោរឡើង ដោយសមាជិកសភា មកពីគណបក្សអភិរក្សនិយម Tory របស់លោកស្រី បានបង្ខំឱ្យលោកស្រីលាលែង ចេញពីតំណែង។ ចំណែកអ្នកស្នងតំណែងពីលោកស្រី នឹងក្លាយជានាយករដ្ឋមន្ដ្រីទី៥ មកពីគណបក្សអភិរក្ស ចាប់តាំងពីចក្រភពអង់គ្លេស បានបោះឆ្នោត ចាកចេញពីសហភាពអឺរ៉ុប នៅក្នុងការបោះឆ្នោតប្រជាមតិ Brexit នាឆ្នាំ២០១៦ នៅក្នុងអំឡុងមានភាពចលាចល មិនធ្លាប់មានពីមុនមក នៅក្នុងប្រវត្តិសាស្ត្រនយោបាយរបស់ចក្រភពអង់គ្លេស។
លោក បូរីស ចនសុន (Boris Johnson) អតីតនាយករដ្ឋមន្ដ្រីចក្រភពអង់គ្លេស ក៏ស្ថិតក្នុងចំណោមសមាជិកសភា ត្រូវបានគេនិយាយ ថា កំពុងតែពិចារណាលើតំណែងនេះ ប៉ុន្ដែលោក ជេរេមី ហាន់ (Jeremy Hunt) បានបដិសេធឈរឈ្មោះ។
លោកស្រី លីស ត្រាស់ ត្រូវបានជ្រើសរើស និង តែងតាំងជានាយករដ្ឋមន្ត្រី កាលពីថ្ងៃទី៦ ខែកញ្ញា ឆ្នាំ២០២២ ក្រោយពេលលោក បូរីស ចនសុន បានប្រកាសលាលែងពីតំណែង ជុំវិញរឿងអាស្រូវ នៅក្នុងចំណោមសមាជិកសភា នៃគណបក្សរបស់គាត់។ លោកស្រី លីស ត្រាស់ក្លាយជានាយករដ្ឋមន្ត្រីរបស់ចក្រភពអង់គ្លេស កាន់តំណែង មានរយៈពេលខ្លីបំផុត នៅក្នុងប្រវត្តិសាស្ត្រនយោបាយ នាសម័យទំនើប។
លោកស្រី លីស ត្រាស់ បានប្រកាសលាលែងពីតំណែង ក្រោយពេលមានវិបត្តិនយោបាយ និង សេដ្ឋកិច្ច អស់រយៈពេលជាច្រើនសប្តាហ៍ ចាប់តាំងពីលោកស្រី បានឡើងកាន់តំណែង ខណៈរដ្ឋាភិបាលរបស់លោកស្រី បានដាក់ចេញនូវផែនការកំណែទម្រង់សេដ្ឋកិច្ចថ្មីមួយ ដោយមានការកាត់បន្ថយពន្ធ មានទំហំទឹកប្រាក់ ប្រហែល៤៥ពាន់លានដុល្លារ។ ចំណែកំណែទម្រង់សេដ្ឋកិច្ចរបស់លោកស្រី បាននាំឲ្យមានការរិះគន់យ៉ាងខ្លាំងផងដែរ។ ដោយឡែក ប្រធានាធិបតីសហរដ្ឋអាមេរិក លោក ចូ បៃដិន (Joe Biden) បានហៅការកាត់បន្ថយពន្ធរបស់រដ្ឋាភិបាលរបស់លោកស្រី លីស ត្រាស់ ជាកំហុសឆ្គងសេដ្ឋកិច្ច ហើយទាមទារឲ្យលោកស្រី លុបចោលវិញ។
លោក Sir Keir Starmer មេដឹកនាំបក្សប្រឆាំង បានអំពាវនាវឱ្យមានការបោះឆ្នោតជាសកល នៅមុនអាណត្តិ។ គណបក្សអភិរក្សនិយម ស្ថិតក្រោមការដឹកនាំរបស់លោក Boris Johnson បានឈ្នះសំឡេងភាគច្រើនលើសលប់ នៅក្នុងការបោះឆ្នោតសកលចុងក្រោយ កាលពីឆ្នាំ២០១៩។
នៅក្នុងការថ្លែងសុន្ទរកថាដ៏ខ្លីមួយ នៅខាងក្រៅវិមានរដ្ឋាភិបាលដោនីងស្ទ្រីត (Downing Street) លោកស្រី លីស ត្រាស់ បានបញ្ជាក់ ថា «គណបក្សអភិរក្ស បានជ្រើសរើសខ្ញុំ ឲ្យឡើងកាន់តំណែង ដើម្បីកាត់បន្ថយពន្ធ និង បង្កើនកំណើនសេដ្ឋកិច្ច។ ខ្ញុំទទួលស្គាល់ ថា ខ្ញុំមិនបានប្រើប្រាស់អំណាចលើអ្វីដែលខ្ញុំត្រូវបានជ្រើសរើសឡើង ដោយគណបក្សអភិរក្សនោះឡើយ»។
លោកស្រី ត្រាស់ បានបន្ថែមថា លោកស្រី នឹងនៅបន្ដកាន់តំណែងជានាយករដ្ឋមន្ដ្រី រហូតដល់មានអ្នកស្នងតំណែងជាផ្លូវការ កាន់តែំណែងជាប្រធានបក្ស ហើយត្រូវបានតែងតាំង ជានាយករដ្ឋមន្ដ្រី ដោយព្រះមហាក្សត្រ ឆាលស៍ (Charles)៕