បន្ទាប់ពីជោគជ័យក្នុងបទ«មេម៉ាយសប្បាយចិត្ដ» បានកែប្រែមុខមាត់ កិត្ដយសរបស់កញ្ញា រ័ត្ន រចនា ឲ្យកាន់តែខុសប្លែកឆ្ងាយពីពេលមុន។ ដូច្នេះហើយទើបនាងបញ្ជាក់ប្រាប់ថា ក្នុងឱកាសដែលបានចេញទៅសម្ដែងនៅក្នុងប្រទេសកូរ៉េខាងត្បូង នាងនឹងប្រឹងបង្កើនប្រជាប្រិយភាពបន្ថែមរបស់នាង។
នាឱកាសឆ្លងឆ្នាំសាកលបងប្អូនពលករកូរ៉េ នឹងបានរាំលេងកំសាន្ដ ជាមួយតារាចម្រៀងល្បីៗជាច្រើនរូបដែលនឹងបង្ហាញមុខនៅប្រទេសកូរ៉េខាងត្បូង ដូចជាកញ្ញារ័ត្ន រចនា លោកសាន ផានិត កញ្ញារ៉ូលីន ឌីជេក្ដឹប និងខេម។
មិនតែប៉ុណ្ណោះនៅក្នុងព្រឹត្តិការណ៍ឆ្លងឆ្នាំទ្រង់ទ្រាយធំ ជូនដល់ក្រុមពលករខ្មែរដែលរស់នៅទីនោះ ដើម្បីអោយបងប្អូនខ្មែរអាចបញ្ចេញសមត្ថភាពសិល្បៈតាមរយៈការប្រលងចម្រៀង ការប្រលងសម្រស់ និងទទួលបានការប្រាក់រង្វាន់លើកទឹកចិត្ដផងដែរ។
ជាមួយនឹងការត្រៀមខ្លួនចេញដំណើរនេះកញ្ញា រ័ត្ន រចនា ក៏បានបង្ហាញអាមរ្មណ៍រំភើបចិត្ត ដែលបានចាប់ដៃជាមួយលោក សាន ផានិត ទៅច្រៀងកំដរបងប្អូនក្រុមពលករខ្មែរនៅថ្ងៃឆ្លងឆ្នាំនោះផងដែរ។ ពិសេសនោះជាឱកាសលើកទី១ហើយដែលនាងបានចេញទៅសម្ដែងនៅប្រទេសកូរ៉េចាប់តាំងពីនាងបោះជំហ៊ានក្នុងវិថីសិល្បៈ។
តារាចម្រៀងសាច់ទ្រលុកទ្រលន់រូបនេះបន្ដថា ដោយសារតែបទចម្រៀងតែមួយបទសោះអាចកែប្រែជីវិតនាងឲ្យល្អប្រសើរយ៉ាងនេះ ដូច្នេះនាងមិនបោះបង់ឱកាសនេះចោលទេ គឺនាងនឹងប្រឹងបញ្ចេញសមត្ថភាព និងពាំនាំបទចម្រៀង សម្លៀកបំពាក់ជាអត្ដសញ្ញាណខ្មែរយកទៅបង្ហាញនៅទីនោះ ដើម្បីទទួលបានការគាំទ្រពីមហាគ្រួសារខ្មែរនៅប្រទេសកូរ៉េ បន្ថែមទៀត។ ហើយនាងសន្យាថា នឹងធ្វើឲ្យកម្មវិធីច្រៀងរាំនៅទីនោះពោពេញទៅដោយស្នាមញញឹម។
ចំណែកលោក សាន ផានិត ដែលត្រូវរួមដំណើរជាមួយនាងនិយាយថា ក៏មានអារម្មណ៍រំភើបតាំងពីពេលដឹងថាអ្នករៀបចំកម្មវិធីចង់បានរូបលោកអោយចេញទៅច្រៀងនៅក្នុងកម្មវិធីឆ្លងឆ្នាំនោះម្ល៉េះ ខណៈលោកអាក់ខានបានកាន់មេក្រូច្រៀងនៅក្រៅប្រទេសមួយរយៈធំ។
លោកថ្លែងបន្ដថា ដ្បិតតែលោកធ្លាប់បានចេញច្រៀងក្រៅប្រទេសកន្លងមក ប៉ុន្តែលោកចាត់ទុកថាឱកាសបានចេញប្រទេសកូរ៉េលើកនេះ គឺជារឿងមុខមាត់កម្រមាន។ លោកថាក្នុងចំណោមតារាទាំងអស់ដែលបានចេញទៅសម្ដែងនៅថ្ងៃទី៣១ ធ្នូនោះ តារាចម្រៀងខេម កញ្ញា រ៉ូលីន និងតារាចម្រៀងលោកសុទ្ធតែធ្លាប់ឡើងឆាកប៉ះគ្នាស្គាល់ចិត្ត និងស្គាល់ទេពកោលសល្យពីគ្នាទៅវិញទៅមករួចមកហើយ លើកលែងតែម្ចាស់បទម៉េម៉ាយសប្បាយចិត្តដូច្នេះធ្វើឲ្យលោកសប្បាយចិត្ត ជាពិសេសក្នុងពេលប៉ះគ្នាលើកដំបូង ហើយស្រាប់តែប៉ះនៅក្នុងប្រទេសកូរ៉េដូច្នេះ។
យោងតាមលោក ឡេង ណាវ៉ាត់ត្រា ជាដៃគូសហការក្នុងការរៀបចំព្រឹត្តិការណ៍នោះ បានអះអាងថា កម្មវិធីដែលគ្រោងធ្វើឡើងនោះ គឺជាការរៀបរបស់ឯកអគ្គរាជទូតរបស់ប្រទេស កម្ពុជាប្រចាំនៅក្នុងប្រទេសកូរ៉េ ដើម្បីអោយបងប្អូនពលករកូរ៉េទូទាំងប្រទេសកូរ៉េ បានរីករាយជាមួយនឹងកម្មវិធីសិល្បៈ បន្ទាប់ពីធ្វើការហត់ពេញមួយឆ្នាំតាំងពីដើមខែមករា។ កម្មវិធីនេះ មានលក្ខណៈខុសប្លែកជាងមុនត្រង់មានការប្រលងចម្រៀង និងប្រលងបុរសឯកនារីឯក ដោយខាងស្ថានទូតកម្ពុជា បានដំណើរជ្រើសរើសអ្នកប្រលងចម្រៀង និងអ្នកប្រលងសម្រស់ជាបណ្ដើរៗមកហើយ ដើម្បីធ្វើការប្រកួតជម្រុះនៅថ្ងៃទី៣១ ធ្នូ ហើយពេលរាត្រីក៏មានការប្រគំតន្ត្រីរាំលេងពីតារាចម្រៀងពីកម្ពុជា ។
គួរបញ្ជាក់ថាការដាក់ពាក្យប្រលងចម្រៀង និងប្រលងសម្រស់ គឺក្រុមពលករមិនមានការចំណាយប្រាក់សូម្បីតែមួយរៀល ផ្ទុយទៅវិញគឺបានទទួលប្រាក់រង្វាន់ពីលេខ១ ដល់លេខ៥ សម្រាប់វិញ្ញាសារមួយៗ ពីក្រុមហ៊ុនឡេងណាវ៉ាត់ត្រា ដែលលោកប្រកាសថាមិនទាន់ចង់បង្ហើបដោយរង់ចាំកៀគរការគាំទ្រអោយបានច្រើនបន្តិចទៀតសិន៕