Fungi គឺជាផ្សិតពុលម្យ៉ាងដែលមានសមត្ថភាពសម្លាប់មនុស្សណាដែលប៉ះវា ហើយវាត្រូវបានរកឃើញនៅក្នុងប្រទេសអូស្ត្រាលីជាលើកដំបូង។
ផ្សិតដែលមានឈ្មោះថា “Poison Fire Coral”មានសមត្ថភាពធ្វើឲ្យខួរក្បាលមនុស្សកាន់តែរួញតូចទៅ ពេលដែលយើងបានប៉ះវា។ វាធ្លាប់សម្លាប់មនុស្សច្រើនណាស់នៅក្នុងប្រទេសជប៉ុន និងកូរ៉េខាងត្បូង ហើយកាលពីពេលថ្មីៗនេះ វាត្រូវបានគេរកឃើញនៅក្នុងព្រៃប្រទេសអូស្ត្រាលី។
វាត្រូវបានរកឃើញដោយអ្នកថតរូបម្នាក់ឈ្មោះ Ray Palmer ខណៈពេលដែលលោករុករកនៅក្នុងព្រៃ ស្ថិតនៅក្នុងស្រុក Redlynch ទីក្រុង Cairnsរដ្ឋ North Queensland ។ លោកគ្រាន់តែថតរូបវាប៉ុណ្ណោះ ដើម្បីយកមកឲ្យក្រុមអ្នកជំនាញ កំណត់អត្តសញ្ញាណរបស់វា។
លោកវេជ្ជបណ្ឌិត Matt Barrett គឺអ្នកជំនាញការខាងផ្សិត Fungi មកពីសាកលវិទ្យាល័យ James Cook ស្ថិតនៅក្នុងទីក្រុង Townsvilleបាននិយាយថា ការរកឃើញនេះ គឺជាករណីលើកដំបូងហើយនៅក្នុងប្រទេសអូស្ត្រាលី។
លោក Barrett បាននិយាយថា មានផ្សិតពុល១០០ប្រភេទដែលក្រុមអ្នកស្រាវជ្រាវស្គាល់ ប៉ុន្តែផ្សិតប្រភេទនេះ អាចជ្រាបចូលតាមស្បែក មុនពេលដែលវាអាចសម្លាប់យើងបាន។
លោកបន្តថា ការប៉ះវា អាចបណ្តាលឲ្យស្បែករបស់យើងហើមឡើងក្រហម ហើយបើនិយាយពីការទទួលទានវាវិញ មិនបាច់និយាយតែម្តង យើងនឹងចាប់ឈឺចាប់ក្នុងក្រពះ ក្អួតចង្អោ រាគរួស គ្រុនក្តៅ និងស្ពឹកដៃជើង ហើយនិងរួញខួរក្បាលរបស់ពួកយើង មុនពេលយើងដាច់ខ្យល់ស្លាប់។
លោក Palmer បានឲ្យដឹងថា ការរកឃើញរបស់លោក គឺជាផ្សិតដ៏គ្រោះថ្នាក់បំផុត ពិសេសពេលដែលលោកចង់ជំពប់ជើងចង់ដួលលើឫសរបស់វានោះ។ លោកបន្តថា លោកនឹងលាក់បាំងទីតាំងរបស់វា ពីព្រោះថា វាពិតជាគ្រោះថ្នាក់ខ្លាំងណាស់ ៕
