ដោមបេតុងដែលបំពេញដោយបំបែកបំផ្ទុះនុយក្លេអ៊ែរ៤៣លើក នឹងត្រូវសង្កេតដោយក្រុមអ្នកជំនាញ ស្របពេលដែលមានការព្រួយបារម្ភថាវាអាចនឹងលេចធ្លាយកាកសំណល់វិទ្យុសកម្មចូលទៅក្នុងមហាសមុទ្រពិភពលោកនោះ។
រដ្ឋាភិបាលសហរដ្ឋអាមេរិកបានប្រកាសថា ពួកគេនឹងចំណាយលុយ១.៧លានដុល្លារលើការវិភាគសំណង់មួយនេះស្ថិតនៅលើកោះ Enewetak ក្នុងសមុទ្រប៉ាស៊ីហ្វិកខាងត្បូង ដែលជាអតីតទីតាំងសាកល្បងនុយក្លេអ៊ែរកម្លាំង៣០មេហ្គាតោន។
ប៉ុន្តែក្រុមទាហានជើងចាស់ដែលបានកសាងដោមមួយនេះ អំឡុងពេលប្រតិបត្តិការរយៈពេល៣ឆ្នាំ បាននិយាយថា វាមិនគ្រប់គ្រាន់នោះទេ ហើយពួកគេចង់ឲ្យទីក្រុងវ៉ាស៊ីងតោន ទទួលស្គាល់ថាផលប៉ះពាល់ចំពោះវាផងដែរ។
លោក Paul Griego ដែលបានធ្វើការលើការបោសសំអាតកាកសំណល់នុយក្លេអ៊ែរ ចាប់ពីខែមិថុនា ឆ្នាំ១៩៧៧ដល់ឆ្នាំ១៩៧៨ បាននិយាយប្រាប់ MailOnline ថា វិធានការនេះត្រូវការជាចាំបាច់ មុនពេលដែលវាហួសពេល។
លោកបាននិយាយថា យើងត្រូវការមូលនិធិតែមួយនេះសម្រាប់ការវិភាកតែមួយ ដោមអាចនឹងរង់ចាំការវិភាគវិទ្យុគីមី ប៉ុន្តែយើងជាមនុស្ស មិនអាចរង់ចាំបាននោះទេ។
ទោះបីជាយ៉ាងណាក៏ដោយ រដ្ឋាភិបាលសហរដ្ឋអាមេរិក នៅតែនិយាយយ៉ាងទទួចថា ទាហានជើងចាស់ដែលចុះប្រតិបត្តិការកាកសំណល់នុយក្លេអ៊ែរ ប្រឈមនឹងកម្រិតទាបប៉ុណ្ណោះនៃចំហាយវិទ្យុសកម្ម ដោយសារតែពួកគេស្លៀកពាក់ខោអាវការពារ ប៉ុន្តែរូបថតពីពេលដែលចុះប្រតិបត្តិការ ឃើញពួកគេធ្វើការដោយមិនពាក់អាវនោះទេ។
លោក Griegoវ័យ៦២ឆ្នាំ បាននិយាយថា យើងប្រាកដខ្លាំងណាស់ថា យើងមានសារធាតុវិទ្យុសកម្មតែមួយនៅក្នុងខ្លួនប្រាណរបស់ពួកយើង ដូចដែលបានរកឃើញនៅក្នុងដោមនេះ។
លោកបន្តថា យើងត្រូវបានជ្រាបចូលដោយសារធាតុវិទ្យុសកម្ម ពេលដែលយើងកសាងដោម យើងបានផឹកទឹកកខ្វក់ ស្រូបចូលនូវធូលី ស្រូបចូលនូវសារធាតុកខ្វក់តាមស្បែករបស់ពួកយើង យើងទទួលទានត្រីដែលយើងចាប់បាន ហើយនៅមានរឿងច្រើនជាងនេះទៀត។
គួររំឭកថា អាវុធនុយក្លេអ៊ែរកម្លាំង៣០មេហ្គាតោន ដែលស្មើនឹងការទម្លាក់គ្រាប់បែកនៅហ៊ីរ៉ូស៊ីម៉ា២ពាន់ដង ត្រូវបានធ្វើតេស្តនៅលើកោះ Enewetak ចន្លោះឆ្នាំ១៩៤៨ និងឆ្នាំ១៩៥៨៕
