ក្រោយពេលវីរុសរលាកផ្លូវដង្ហើមប្រភេទថ្មី បានឆ្លងដល់កងទ័ពកូរ៉េខាងត្បូងនោះមក រហូតមកដល់ពេលនេះ ត្រូវបានគេរកឃើញថា អនុរដ្ឋមន្រ្ដីក្រសួងសុខាភិបាល នៃប្រទេអ៊ីរ៉ង់ មានផ្ទុកនូវវីរុសកូរ៉ូណា ឬកូវីដ-១៩។
លោក Iraj Harirchi អនុរដ្ឋមន្រ្ដីក្រសួងសុខាភិបាលអ៊ីរ៉ង់ បានឲ្យដឹង កាលពីថ្ងៃទី២៥ ខែកុម្ភ: ថា លោកបានធ្វើតេស្ដ រកឃើញមានផ្ទុកវីរុសកូវីដ-១៩ ។
អ្នកនាំពាក្យក្រសួងសុខាភិបាលអ៊ីរ៉ង់ បានអះអាងថា លោក Iraj Harirchi បានឆ្លងវីរុសកូរ៉ូណា ហើយឥឡូវលោកត្រូវគេដាក់ឲ្យនៅព្យាបាលដាច់ដោយឡែកពីគេ។ បើគិតត្រឹមថ្ងៃទី២៦ ខែកុម្ភ: មានរណីឆ្លងកូវីដ-១៩ថ្មី ចំនួន៣៤ករណី ហើយមានមនុស្សចំនួន៣នាក់បានស្លាប់ កាលពីថ្ងៃទី២៥ ខែកុម្ភ:។ នៅក្នុងប្រទេសអ៊ីរ៉ង់ មានករណីឆ្លងវីរុសផ្លូវដង្ហើមនេះ ចំនួន៩៥ និងស្លាប់ចំនួន១៦នាក់។
ដោយឡែកនៅក្នុងប្រទេសកូរ៉េខាងត្បូងវិញ បានក្លាយជាប្រទេសមានអ្នកឆ្លងវីរុសនេះច្រើនជាងគេនៅពិភពលោក បន្ទាប់ពីចិន។ ប្រទេសកូរ៉េខាងត្បូង មានអ្នកស្លាប់ចំនួន១១នាក់ និង ឆ្លងវីរុសនេះ មានរហូតដល់ទៅជាង១២០០នាក់ ក្នុងនោះមានទាំងទាហានជាង១០នាក់ផងដែរ៕