ក្រុមហ៊ុនផលិតរថយន្ត Mitsubishi បានអះអាងថា រថយន្តគ្មានមនុស្សបើកដែលអាចត្រួតពិនិត្យ និងប្រតិកម្មចំពើសុខភាពអ្នកដំណើរបាននោះ នឹងធ្វើចរាចរណ៍លើដងផ្លូវហើយនៅឆ្នាំ២០៣០ខាងមុខ។
បច្ចេកវិទ្យាដ៏ទំនើបនេះ អាចនឹងនិយាយប្រាប់ឲ្យអ្នកដំណើរយកចិត្តទុក ឬនៅពេលដែលសុខភាពរបស់ពួកគេមានបញ្ហាភ្លាមៗ ដូចជាករណីជំងឺគាំងបេះដូង តាមរយៈការតាមដានសញ្ញាចាំបាច់របស់ពួកគេ។
ក្រុមហ៊ុនបាននិយាយថា បើសិនជានរណាម្នាក់ធ្លាក់ខ្លួនឈឺ ខណៈពេលកំពុងនៅលើរថយន្ត វានឹងអាចចតលើចិញ្ចើមផ្លូវភ្លាម ហើយនិងទូរស័ព្ទទៅកាន់ក្រុមវេជ្ជបណ្ឌិត ឬទូរស័ព្ទសុំជំនួយបន្ទាន់។
ខណៈពេលនោះដែរ ក្រុមហ៊ុនរថយន្តជប៉ុនមួយនេះ បានបង្ហាញរថយន្តគ្មានមនុស្សបើកប្រភេទថ្មី ម៉ាក “EMIRAI S” អំឡុងពិព័រណ៍រថយន្ត Tokyo Motor Show ដែលមានរយៈពេលចាប់ពីថ្ងៃទី២៤ ខែតុលា រហូតដល់ថ្ងៃទី៤ ខែវិច្ឆិកា។
ការរចនារថយន្ត EMIRAI S ឃើញមានបង្ហាញសេនសឺ ដែលអាចគ្រប់គ្រង ឬតាមដានសុខភាព និងសុខមាលភាពរបស់អ្នកដំណើរ និងផ្លាស់ប្តូរ Settingក្នុងរថយន្ត ដើម្បីជាការឆ្លើយតប។
យោងតាមការអះអាងពីមន្ត្រីប្រតិបត្តិរបស់ក្រុមហ៊ុន Mitsubishiលោក Hiroshi Onishi បានឲ្យដឹងថា រថយន្តគ្មានមនុស្សបើក ដូចជារថយន្ត EMIRAI S នឹងអាចជួយដោះស្រាយបញ្ហាប្រឈមជាច្រើននៅក្នុងសង្គមបច្ចុប្បន្ន។
លោកបន្តថា អ្វីដែលយើងបានជួបប្រទះនៅពេលបច្ចុប្បន្ននេះ គឺមាននូវគ្រោះថ្នាក់កើនឡើងច្រើនពាក់ព័ន្ធនឹងតៃកុងឡានចាស់ៗ។
លោក Onishi បានបញ្ជាក់ថា រថយន្ត EMIRAI S នឹងប្រើប្រាស់សេនសឺដើម្បីតាមដានសញ្ញាចាំបាច់របស់អ្នកដំណើររបស់ពួកគេ ។
លោកបន្តថា បើសិនជាវារកឃើញអ្នកបើកមិនយកចិត្តទុកដាក់ ឬមិនមានអារម្មណ៍មិនស្រួលខ្លួន វានឹងស្វែងរកការសង្គ្រោះបន្ទាន់ ឬឈប់រថយន្តភ្លាមនៅលើចិញ្ចើមផ្លូវ ហើយនិងទូរស័ព្ទហៅគ្រូពេទ្យ បើសិនជាចាំបាច់។
ទោះបីជាយ៉ាងណាក៏ដោយ គេមិនបានដឹកច្បាស់នោះទេថាតើរថយន្តដ៏ទំនើបនេះនឹងដាក់លក់ក្នុងតម្លៃប៉ុន្មាននោះទេ៕
