រាជធានីបាងកក៖ នៅតែត្រឹមប៉ុន្មានថ្ងៃប៉ុណ្ណោះ សភាទាំង២របស់ប្រទេសថៃ នឹងបោះឆ្នោតជ្រើសរើសនាយករដ្ឋមន្ដ្រីថ្មី ប៉ុន្ដែគេនៅតែមិនទាន់ដឹង អំពីជោគវាសនារបស់មេគណបក្សឆ្ពោះទៅមុខ ដែលបានឈ្នះឆ្នោត នៅក្នុងការបោះឆ្នោតសកល កាលពីថ្ងៃទី១៤ ខែឧសភា ឆ្នាំ២០២៣ ប្រសិនបើគណៈកម្មាធិការរៀបចំការបោះឆ្នោត លើកសំណុំរឿងរបស់គាត់ បញ្ជូនទៅកាន់តុលាការធម្មនុញ្ញ។
សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃអង្គារ ទី១១ ខែកក្កដា ថា បើតាមអតីតស្នងការរៀបចំការបោះឆ្នោត និង ជាអ្នកសិក្សាមួយរូប បានឲ្យដឹង ថា ប្រសិនបើគណៈកម្មាធិការរៀបចំការបោះឆ្នោតថៃ (EC) បញ្ជូនសំណុំរឿង ពាក់ព័ន្ធនឹងការកាន់កាប់ភាគហ៊ុនរបស់ក្រុមហ៊ុនបណ្ដាញផ្សព្វផ្សាយ iTV ពីមុនរបស់លោក ភីថា លីមចារឿនរ៉ាត ( Pita Limjaroenrat) ប្រធានគណបក្សឆ្ពោះទៅមុខ (Move Forward Party) ហៅកាត់ MFP ទៅកាន់តុលាការធម្មនុញ្ញនោះ វានឹងអាចធ្វើឲ្យសមាជិកព្រឹទ្ធសភា ភាន់ច្រឡំ នៅក្នុងការបោះឆ្នោតដ៏សំខាន់ សម្រាប់ជ្រើសរើសនាយករដ្ឋមន្ត្រីថ្មី នៅថ្ងៃព្រហស្បតិ៍ (ទី១៣ ខែកក្កដា)។
លោក ស៊ុមឆៃ ស្រ៊ីស៊ូតធីយ៉ាកន (Somchai Srisutthiyakorn) អតីតស្នងការរៀបចំការបោះឆ្នោត បានបញ្ជាក់ ថា ប្រសិនបើតុលាការធម្មនុញ្ញ ទទួលយកសំណុំរឿងនេះ ទៅពិចារណានោះ តុលាការអាចនឹងបញ្ជាឱ្យព្យួរតួនាទីជាសមាជិកសភារបស់លោក ភីថា។ សកម្មភាពបែបនេះ នឹងប៉ះពាល់ដល់ការបោះឆ្នោត នៅថ្ងៃព្រហស្បតិ៍ ហើយលោក ភីថា នឹងមិនត្រូវអនុញ្ញាតឱ្យចូលក្នុងសភា នៅក្នុងនាមជាសមាជិកសភា ថ្វីបើគាត់ នៅតែអាចចូលសភា នៅក្នុងនាមជាបេក្ខជននាយករដ្ឋមន្ត្រី យ៉ាងណាក្ដី។ សមាជិកព្រឹទ្ធសភា អាចនឹងលើកឡើងយកហេតុផលមួយនេះ មកអះអាង អំពីការមិនបោះឆ្នោតឲ្យ ព្រោះពួកគេព្រួយបារម្ភ ថា ការបោះឆ្នោតនេះ នឹងនាំឲ្យមានបញ្ហា ដោយសារការចោទប្រកាន់ មកលើលោក ភីថា អំពីការមិនមានសិទ្ធិបោះឆ្នោត។
.
លោក ភីថា ជាបេក្ខភាពនាយករដ្ឋមន្ត្រីតែមួយគត់របស់គណបក្សឆ្ពោះទៅមុខ ហើយគាត់បានរងការចោទប្រកាន់ ថា គាត់ធ្លាប់កាន់កាប់ភាគហ៊ុនចំនួន ៤២ ០០០ហ៊ុន នៅក្នុងក្រុមហ៊ុនបណ្ដាញផ្សព្វផ្សាយ iTV ហើយត្រូវបានអ្នករិះគន់មួយចំនួន ជឿ ថា វាជាក្រុមហ៊ុនប្រព័ន្ធផ្សព្វផ្សាយប្រតិបត្តិការ ខណៈគាត់បានចុះឈ្មោះជាបេក្ខភាព នៅក្នុងការបោះឆ្នោត នាឆ្នាំ២០១៩។
ច្បាប់រដ្ឋធម្មនុញ្ញថៃ ហាមឃាត់ដល់បុគ្គលណាមួយ ដែលគ្រប់គ្រងភាគហ៊ុន នៅលើបណ្ដាញផ្សព្វផ្សាយ ឈរឈ្មោះ សម្រាប់ការបោះឆ្នោត។ ប៉ុន្ដែលោក ភីថា បានបដិសេធនូវការចោទប្រកាន់ទាំងនេះ ដោយអះអាង ថា គាត់គ្រាន់តែបម្រើការ ជាប្រតិបត្តិករ នៃភាគហ៊ុនមរតកគ្រួសាររបស់គាត់តែប៉ុណ្ណោះ។
អតីតមន្ដ្រីគណៈកម្មាធិការរៀបចំការបោះឆ្នោត រូបនេះ បានបន្ថែម ថា គណៈកម្មាធិការរៀបចំការបោះឆ្នោតថៃ គួរតែកោះហៅលោក ភីថា ចូលមកការពារខ្លួន ប្រឆាំងនឹងការចោទប្រកាន់ទាំងនេះ នៅមុនពេលស្ថាប័នមួយនេះ សម្រេចបញ្ជូនសំណុំរឿងរបស់គាត់ ទៅកាន់តុលាការធម្មនុញ្ញ។
លោក អ៊ីតទីប៉ន បួនប្រាខុង (Ittiporn Boonpracong) ប្រធានគណៈកម្មាធិការរៀបចំការបោះឆ្នោតថៃ (EC) កាលពីថ្ងៃចន្ទ បានបញ្ជាក់ ថា EC នៅមិនទាន់បញ្ជូនសំណុំរឿងនេះ ទៅកាន់តុលាការធម្មនុញ្ញ នៅឡើយ ខណៈក្រុមស៊ើបអង្កេត បានត្រឹមតែប្រមូលសំណុំរឿងរបស់គណៈកម្មាធិការសំខាន់របស់ EC អំពីការរកឃើញរបស់ខ្លួន។
លោក ចេត ដូណាវ៉ានីក (Jade Donavanik) ជាអ្នកប្រាជ្ញផ្នែកច្បាប់ និង ជាអតីតទីប្រឹក្សាមួយរូបរបស់ក្រុមប្រឹក្សាធម្មនុញ្ញ បានបង្ហាញទស្សនៈរបស់គាត់ ថា ប្រសិនបើ EC រកឃើញហេតុផល សម្រាប់ការចោទប្រកាន់ ប្រឆាំងនឹងលោក ភីថា នោះ គឺជំហានបន្ទាប់ សម្រាប់ EC នឹងបញ្ជូនសំណុំរឿងនេះ ទៅកាន់តុលាការធម្មនុញ្ញ។ ប្រសិនបើសំណុំរឿងនេះ នឹងត្រូវទទួលយកនោះ តុលាការ នឹងស្នើឲ្យប្រធានសភាព្យួរលោក ភីថា នៅក្នុងនាមជាសមាជិកសភា ដោយរង់ចាំការកាត់ក្តីជាមុនសិន។ ប៉ុន្ដែបើទោះជាយ៉ាងណាក៏ដោយ ក៏លោក ភីថា នៅតែអាចត្រូវតែងតាំងជាបេក្ខជន សម្រាប់ការបោះឆ្នោតនាយករដ្ឋមន្ដ្រី នៅថ្ងៃព្រហស្បតិ៍ ដដែល។
អ្នកប្រាជ្ញផ្នែកច្បាប់ រូបនេះ បានបន្ដ ថា នៅក្នុងករណីនេះ សមាជិកព្រឹទ្ធសភា អាចសម្រេចចិត្ត មិនបោះឆ្នោត រហូតទាល់តែតុលាការ សម្រេចលើសិទ្ធិទទួលបានរបស់លោក ភីថា ។ វិធីមួយទៀត អាចនឹងកើតចេញពីបញ្ហា សម្រាប់គណបក្សនយោបាយ នៅក្នុងការតែងតាំងបេក្ខជនជំនួសផ្សេងទៀត។ ប៉ុន្ដែករណីនេះ មិនងាយស្រួលនោះឡើយ។ ខ្ញុំមិនគិត ថា នាយករដ្ឋមន្ត្រីថ្មី នឹងនៅតែអាចបោះឆ្នោតជ្រើសរើស នៅថ្ងៃទី១៣ ខែកក្កដា ដដែល៕
