កងទ័ពជើងទឹករុស្ស៊ីបានអះអាងថា ពួកគេបានរកឃើញកោះថ្មីចំនួន៥ ក្រោយពីមានការរលាយផ្ទាំងទឹកកក នៅតំបន់ដាច់ស្រយាលក្នុងមហាសមុទ្រអាក់ទិក ។
កោះទាំងនេះ ធ្លាប់ត្រូវបានគេប្រទះឃើញកាលពីដំបូងកាលពីឆ្នាំ២០១៦ ប៉ុន្តែមិនត្រូវបានគេបញ្ជាក់ថាមាននៅលើផែនទីនោះទេ រហូតមកទល់នឹងពេលនេះ។
ការរុករកកាលពីខែសីហា និងខែកញ្ញា ក៏បានប្រទះឃើញកោះទាំងនេះ ហើយឥឡូវគេមិនទាន់ដាក់ឈ្មោះឲ្យវានោះទេ ក្រោយកាលពីមុនវាលាក់ខ្លួននៅក្រោមភ្នំទឹកកក។
នាយឧត្តមនាវីឯករុស្ស៊ី លោក Alexander Moiseyev បាននិយាយថា ភាគច្រើនការបង្ហាញខ្លួនរបស់កោះទាំងនេះ គឺបណ្តាលមកពីការផ្លាស់ប្តូរស្ថានភាពទឹកកក។
លោកបន្តថា កាលពីមុនផ្ទាំងទឹកកកទាំងនេះ យើងគិតថាវាជាផ្នែកមួយរបស់ភ្នំទឹកកកយ៉ាងធំប៉ុណ្ណោះ ដោយមិនធ្លាប់គិតថា វាគឺជាកោះនោះទេ ។ ការរលាយ ការបាក់ស្រុត និងការផ្លាស់ប្តូរសីតុណ្ហភាព នាំឲ្យយើងរកឃើញកោះទាំងនេះ។កោះទាំង៥នេះ មានទំហំចន្លោះពី៩៦៩០ហ្វ៊ូត និង៥៨៦.៦៣០ហ្វ៊ូត។
ទូរទស្សន៍ CNNបានរាយការណ៍ថា កោះថ្មីដែលទើបរកឃើញទាំង៥នេះ ស្ថិតនៅជិតផ្ទាំងទឹកកក Vylki នៅជិតតំបន់ឆ្នេរសមុទ្រ Novaya Zemlya ដែលជាប្រជុំកោះដ៏ដាច់ស្រយាលមួយនៃមហាសមុទ្រអាក់ទិក និងស្ថិតនៅភាគពាយព្យនៃប្រទេសរុស្ស៊ី។
ដោយឡែក របាយការណ៍មួយស្តីពីការឡើងកម្តៅផែនដីរបស់អង្គការសហប្រជាជាតិ ដែលបានចេញផ្សាយកាលពីខែមុន បានឲ្យដឹងថា ផ្ទាំងទឹកកក បានបាត់បង់នៅក្នុងមហាសមុទ្រអាក់ទិក អំឡុងពេលចាប់តាំងពីឆ្នាំ២០១៥ ដល់ឆ្នាំ២០១៩ ពោលគឺច្រើនជាងអំឡុងពេលតែមួយ ដែលធ្លាប់បានកត់ត្រាទុក៕
Home ព័ត៌មានអន្តរជាតិ រកឃើញកោះថ្មីចំនួន៥ក្រោយការរលាយភ្នំទឹកកកនៅតំបន់ដាច់ស្រយាលក្នុងមហាសមុទ្រអាក់ទិក