អ្នកវិភាគការពារជាតិមួយរូប បាននិយាយថា យន្តហោះចម្បាំងជំនាន់ទី៦ដែលត្រូវបានអភិវឌ្ឍន៍ ដោយអង់គ្លេស រួមកិច្ចសហប្រតិបត្តិការជាមួយស៊ុយអែត ដែលមានបំពាក់អាវុធកាំរស្មីឡាស៊ែរ និងក្បួនយន្តហោះពាក់កណ្តាលស្វយ័តស្រដៀងគ្នានឹងដ្រូននោះ នឹងមានសណ្ឋានលើសពីយន្តហោះប្រតិកម្មធម្មតា ដែលកំពុងធ្វើឲ្យគូសត្រូវ ភ័យញ័រសាច់ ដោយសារតែសមត្ថភាពគ្មានព្រំដែនរបស់វា។
យន្តហោះចម្បាំង Tempest នឹងត្រូវដាក់ពង្រាយនៅពាក់កណ្តាលឆ្នាំ២០៣០ ដើម្បីជំនួសយន្តហោះ ស៊េរីចាស់ Typhoon ដែលគេស្គាល់ម្យ៉ាងទៀតថា Eurofighter។ គម្រោងការនេះ ដែលដឹកនាំដោយក្រុមហ៊ុនជាច្រើន រួមទាំងក្រុមហ៊ុន BAE Systems និងក្រុមហ៊ុន Rolls Royce ក៏ដូចជាក្រុមហ៊ុន Leonardoរបស់អ៊ីតាលី និងក្រុមហ៊ុន Saab របស់ស៊ុយអែត នឹងធ្វើឲ្យក្រុមអភិវឌ្ឍន៍យន្តហោះមួយនេះ ចូលរួមការប្រកួតប្រជែងដោយផ្ទាល់ ជាមួយប្រព័ន្ធសង្គ្រាមដែនអាកាសអនាគត Future Combat Air System ដែលកំពុងតែអភិវឌ្ឍន៍ឡើងដោយប្រទេសដៃគូជាច្រើនរវាងបារាំង អាល្លឺម៉ង់ និងអេស្ប៉ាញ។
លោក John Sneller គឺជាប្រធានក្រុមអាកាសចរណ៍នៅក្រុមហ៊ុន Jane’s បាននិយាយប្រាប់វែបសាយ Express.co.uk ថា កម្មវិធី Tempest មានសណ្ឋានលើសពីយន្តហោះប្រតិកម្មធម្មតា វាគឺជាប្រព័ន្ធសង្គ្រាមដែនអាកាសអនាគត គ្របដណ្តប់លើការងាររួមគ្នានៃយានមានមនុស្សបើក និងយានគ្មានមនុស្សបើក។
លក្ខណៈពិសេសនៃកម្មវិធីមួយនេះ ដែលកាលពីដំបូងឡើយត្រូវបានប្រកាសឲ្យដឹងនៅក្នុងកម្មវិធីពិព័រណ៍ Farnborough Air Show កាលពីឆ្នាំមុន វាមានគោលដៅផ្គុំការតម្រឹមបច្ចេកវិទ្យា ដែលរួមមានទាំងជើងទម្រអាវុធដែលអាចបត់បែនគ្រប់កាលៈទេសៈ រចនាសម្ព័ន្ធយន្តហោះ ការចាប់សេនស័ររយៈចម្ងាយឆ្ងាយ សម្ភារសឹកទំនើប អាវុធល្បឿនលឿនជាងសំឡេង អាវុធកាំរស្មីឡាស៊ែរ ការការពារការវាយប្រហារដោយអ៊ីនធឺណេត និងបន្ទប់ពីឡុតរួមគ្នា។
លោកបន្តទៀតថា វានឹងអនុញ្ញាតឲ្យពីឡុត ដំណើរការយានគ្មានមនុស្សបើក(UAVs) ដើម្បីវាយប្រហារមកលើគោលដៅជាក់លាក់ ដោយមិនបង្កគ្រោះថ្នាក់ដល់អាកាសយានិកណាម្នាក់នោះឡើយ៕
Home ព័ត៌មានអន្តរជាតិ យន្តហោះប្រតិកម្ម Tempest បំពាក់កាំភ្លើងឡាស៊ែររបស់អង់គ្លេស កំពុងធ្វើឲ្យគូសត្រូវភ័យញ័រសាច់