ចាប់តាំងពីការផ្ទុះឡើង នៃវីរុសកូវីដ-១៩ កាលពីអំឡុងខែធ្នូ ឆ្នាំ២០១៩ នៅទីក្រុងវូហាន ខេត្ដហ៊ូប៉ី នាភាគកណ្ដាល នៃប្រទេសចិន រហូតមកដល់វេលាម៉ោង៤ និង៣០នាទីព្រឹក ថ្ងៃទី២៦ ខែមីនា ឆ្នាំ២០២០(ម៉ោងនៅកម្ពុជា) នៅលើពិភពលោក មានអ្នកឆ្លងកើនឡើង៤៦៣៣៨៧នាក់ ក្នុងនោះស្លាប់២០៩១២នាក់ និងព្យាបាលជាសះស្បើយ១១៣៨០២នាក់។
ប្រទេសចិនជាទីផ្ទុះឡើង នៃវីរុសដ៏កាចសាហាវនេះ មានអ្នកឆ្លងជាង៨១២១៨នាក់ ហើយក្នុងចំណោមអ្នកជំងឺទាំងនោះ ស្លាប់៣២៨១នាក់ និងជាសះស្បើយ ជាង៧៣៦៥០នាក់។ ប៉ុន្ដែរហូតមកដល់ពេលនេះ ចិនបានគ្រប់គ្រងស្ថានការណ៍ជាបណ្ដោះអាសន្នស្ទើរទាំងស្រុង ដោយមានករណីឆ្លងថ្មីត្រឹមតែ៤៧នាក់ និងស្លាប់៤នាក់ នៅទូទាំងប្រទេសចិន។
ផ្ទុយទៅវិញ បណ្ដាប្រទេសនៅអឺរ៉ុបក៏កំពុងតែវឹកវរនឹងការរាតត្បាត នៃវីរុសកូវីដ-១៩នេះ ហើយអ៊ីតាលី ក្លាយជាប្រទេសរងគ្រោះខ្លាំងជាងគេបំផុត នៅតំបន់អឺរ៉ុប និងឈរលំដាប់លេខ២ នៃចំនួនអ្នកឆ្លងវីរុសច្រើនជាងគេនៅលើពិភពលោក បន្ទាប់ពីប្រទេសចិន។ អ៊ីតាលីមានអ្នកឆ្លងវីរុសកូវីដ-កើនឡើង រហូតដល់ ៧៤៣៨៦នាក់ ដោយឆ្លងថ្មីចំនួន៥២១០នាក់។ ក្នុងចំណោមអ្នកជំងឺជាង៧ម៉ឺននាក់នោះ គឺព្យាបាលបានជាសះស្បើយចំនួន ៩៣៦២នាក់ និងស្លាប់៧៥០៣នាក់។
បើយោងតាមរបាយការណ៍ បានឲ្យដឹងថា ក្នុងមួយថ្ងៃៗ ចំនួនអ្នកស្លាប់កើនឡើងជាង៦០០នាក់នេះ។ នេះជាតួលេខមួយគួរឲ្យភ័យខ្លាច និងព្រួយបារម្ភបំផុត។
ដោយឡែកប្រទេសមហាអំណាចយោធា និងសេដ្ឋកិច្ចលេខ១របស់ពិភពលោកវិញ (អាមេរិក) បានឈរក្នុងលំដាប់លេខ៣ នៃចំនួនអ្នកឆ្លងវីរុសដ៏កាចសាហាវច្រើនជាងគេ បន្ទាប់ពីអ៊ីតាលី។ អាមេរិកមានអ្នកឆ្លងវីរុសនេះ ចំនួន៦៤៧៦៥ក់។ ក្នុងចំណោមអ្នកជំងឺទាំងនោះ គឺស្លាប់៩១០នាក់ និងព្យាបាលជាសះស្បើយចំនួន៣៩៣នាក់។
ដោយសារតែអាមេរិកបានដឹងច្បាស់ថា វីរុសដ៏កាចសាហាវនេះកំពុងតែរាតត្បាត នៅលើទឹកដីរបស់ខ្លួននោះ ទើបប្រធានាធិបតីអាមេរិក លោក ដូណាល់ ត្រាំ បានស្វះស្វែងរកកញ្ចប់លុយ រហូតដល់១០០០ពាន់លានដុល្លារអាមេរិក សម្រាប់ធ្វើសង្រ្គាមប្រឆាំងនឹងវីរុសដ៏កាចសាហាវនេះ៕