រដ្ឋធានីកៀវ៖ ការវាយប្រហារទៅលើមូលដ្ឋានកងទ័ពជើងទឹករុស្ស៊ី ប្រចាំនៅសមុទ្រខ្មៅ ធ្វើឲ្យប្រធានាធិបតីរុស្ស៊ី លោក ពូទីន ខឹងសម្បាយ៉ាងខ្លាំង ហើយបានបញ្ជាឲ្យកងទ័ពរបស់ខ្លួន បាញ់មីស៊ីលយ៉ាងសន្ធាប់ ស្រោចទៅលើទីក្រុងនានារបស់អ៊ុយក្រែន ។
ទីភ្នាក់ងារសារព័ត៌មាន Reuters បានចេញផ្សាយ កាលពីថ្ងៃអង្គារ ទី១ ខែវិច្ឆិកា ថា លោក វ្ល៉ាឌីមៀ ពូទីន (Vladimir Putin) ប្រធានាធិបតីរុស្ស៊ី បានញ្ជាក់ ថា ការវាយប្រហាររបស់រុស្ស៊ី ទៅលើហេដ្ឋារចនាសម្ព័ន្ធសំខាន់ៗរបស់អ៊ុយក្រែន និង ការសម្រេចចិត្តបង្កកការចូលរួម នៅក្នុងកម្មវិធីនាំចេញគ្រាប់ធញ្ញជាតិ តាមច្រកសមុទ្រខ្មៅ គឺជាការឆ្លើយតបទៅនឹងការវាយប្រហារដោយយន្តហោះគ្មានមនុស្សបើក ឬ ដ្រូន មកលើកងនាវាប្រចាំសមុទ្រខ្មៅរបស់ក្រុងមូស្គូ គ្រប់គ្រង នៅមូលដ្ឋានទីក្រុងសេវ៉ាស្ដូប៉ូល (Sevastopol) នៅឧបទ្វីបគ្រីមៀ។ លោក ពូទីន បានស្ដីបន្ទោសដល់អ៊ុយក្រែន ជុំវិញការវាយប្រហារ មកលើមូលដ្ឋានកងទ័ពជើងទឹករបស់ខ្លួន។
មេដឹកនាំវិមានក្រឹមឡាំង រូបនេះ បានបន្ថែ ថា «អ្វីគ្រប់យ៉ាង មិនមែនយើងអាចធ្វើបានទាំងអស់នោះដែរ»។ រុស្ស៊ី បានចាប់ផ្តើមវាយប្រហារ ប្រឆាំងនឹងហេដ្ឋារចនាសម្ព័ន្ធសំខាន់ៗ នៅក្នុងតំបន់ចំនួន១០របស់អ៊ុយក្រែន កាលពីថ្ងៃចន្ទ បណ្តាលឱ្យដាច់ចរន្តអគ្គិសនី និង ទឹកស្អាត នៅទូទាំងប្រទេស។
ប្រធានាធិបតីរុស្ស៊ី បានថ្លែងនៅក្នុងសន្និសីទសារព័ត៌មានមួយ កាលពីថ្ងៃចន្ទ ថា ការវាយប្រហារថ្មីៗ អាចនឹងធ្វើឡើងបន្ថែមទៀត ខណៈអ៊ុយក្រែន នៅតែបដិសេធ ថា ក្រុងកៀវ មិនមានការជាប់ពាក់ព័ន្ធនឹងការវាយប្រហារ នៅតំបន់គ្រីមៀ ហើយក៏មិនបានប្រើប្រាស់ផ្លូវទឹក តតាមនៅច្រកសមុទ្រខ្មៅ សម្រាប់ដឹកជញ្ជូនគ្រាប់ធញ្ញជាតិ ក្លាយជាបុព្វហេតុយោធានោះដែរ។
កម្លាំងទាហានរុស្ស៊ី កាលពីថ្ងៃចន្ទ បានបន្ដបាញ់ស្រោចគ្រាប់មីស៊ីល ទៅលើតំបន់ចំនួន ៦ របស់អ៊ុយក្រែន ដោយបានបំផ្លិចបំផ្លាញហេដ្ឋារចនាសម្ព័ន្ធថាមពលជាច្រើន រហូតធ្វើកាត់ផ្ដាច់ចរន្តអគ្គិសនី និង ប្រព័ន្ធផ្គត់ផ្គង់ទឹកស្អាត។
អាជ្ញាធរអ៊ុយក្រែន បានបញ្ជាក់ ថា ប្រជាជន ប្រហែល១៤០ ០០០នាក់ មិនមានអគ្គិសនីប្រើប្រាស់ ក្រោយពេលរុស្ស៊ី បានវាយប្រហារ មកលើហេដ្ឋរចនាសម្ព័ន្ធសំខាន់ៗរបស់ខ្លួន។ ជាមួយគ្នានេះ អ៊ុយក្រែន ក៏បានអះអាងថា កងទ័ពការពារទឹកដីក្រុងកៀវ ក៏បានបាញ់ទម្លាក់មីស៊ីល ចំនួន៤៤គ្រាប់ នៅក្នុងចំណោម៥០គ្រាប់របស់រុស្ស៊ី៕
