កាលពីពេលកន្លងទៅនេះ រដ្ឋមន្ត្រីក្រសួងពាណិជ្ជកម្ម របស់ប្រទេសជប៉ុនលោក អ៊ីស៊ូ ស៊ូហ្គាវ៉ារ៉ា Isshu Sugawara បានលាលែងពីតំណែង ចំពេលមានការចោទប្រកាន់ថា ការិយាល័យរបស់លោក បានផ្តល់ប្រាក់ និងអំណោយដ៏គួរឲ្យសោកស្តាយ ដល់អ្នកគាំទ្រដោយរំលោភលើច្បាប់ បោះឆ្នោតរបស់ប្រទេស។ បន្ទាប់ពីការលាលែងពីតំណែងរបស់លោក រដ្ឋមន្ត្រីក្រសួងពាណិជ្ជកម្ម មិនទាន់បានប៉ុន្មានថ្ងៃផង ស្រាប់តែលោក Katsuyuki Kawai រដ្ឋមន្ត្រីក្រសួងយុត្តិធម៌ នៅថ្ងៃទី៣១ ខែតុលា ឆ្នាំ២០១៩ បានសុំលាលែងចេញពីតំណែង បន្ទាប់ពីរងការចោទថា ភរិយារបស់លោកបានបំពានច្បាប់បោះឆ្នោត។
ការសម្រេចនេះ បន្ទាប់ពីទស្សនាវដ្តី Shukan Bunshun tabloid បានចេញផ្សាយដោយចោទប្រកាន់ថា ភរិយារបស់រដ្ឋមន្ត្រីខាងលើ គឺលោកស្រី Anri Kawai ថាបានចំណាយលុយឱ្យបុគ្គលិកប្រចាំថ្ងៃលើសការកំណត់ដោយច្បាប់ ក្នុងអំឡុងលោកស្រីកំពុងឃោសនារកសំឡេងឆ្នោតនៅសភា។ លោកស្រីក៏ត្រូវគេរាយការណ៍ថា បានទិញទឹកចិត្តពលរដ្ឋផងដែរ។