លោក Bruce Gagnon (ប្រ៊ូស ហ្គាក់ណុន) គឺជាសហស្ថាបនិក និងជាអ្នកសម្របសម្រួលកម្មវិធីបណ្តាញសកលលោកប្រឆាំងនឹងអាវុធនុយក្លេអ៊ែរ និងកម្លាំងនុយក្លេអ៊ែរនៅទីអវកាស( Global Network Against Weapons & Nuclear Power in Space) បាននិយាយា សង្គ្រាមនុយក្លេអ៊ែរនៅទីអវកាស នឹងក្លាយជាគ្រោះថ្នាក់ធំបំផុតសម្រាប់អារ្យធម៌មនុស្សលោកក្នុងមួយប៉ព្រិចភ្នែកប៉ុណ្ណោះ ខណៈពេលដែលផែនដីនឹងត្រូវកក ហើយនិងប្រែក្លាយដូចជាទីក្រុងហ៊ីរ៉ូស៊ីម៉ា របស់ជប៉ុន។
ប្រធានាធិបតីសហរដ្ឋអាមេរិក លោកដូណាល់ ត្រាំ បាននិយាយម្តងហើយម្តងទៀតថា លោកសង្ឃឹមជឿជាក់ថា នឹងបង្កើតកងកម្លាំងយោធាទី៦របស់អាមេរិក គឺកងកម្លាំងអវកាស ក្នុងឆ្នាំ២០២០ខាងមុខនេះ នៅក្នុងចំណោមកងកម្លាំងជាច្រើនទៀត ដើម្បីការពារផ្កាយរណបនៅទីអវកាស ពីការយីយារបស់ប្រទេសដ៍ទៃ។
អ្នកខ្លះមានជំនឿថា យានអវកាសយោធា ត្រូវបានផលិតរួចទៅហើយ ដោយសារតែពួកគេបានប្រទះឃើញថាសហោះនៅទូទាំងសហរដ្ឋអាមេរិក ក្នុងរយៈពេលជាច្រើនខែកន្លងមកនេះ។
ប៉ុន្តែលោក Bruceគិតថា វាអាចនឹងបើកទ្វារសម្រាប់សង្គ្រាមត្រួតត្រាដែនអវកាសថ្មី ដែលផលវិបាកនឹងគ្រោះថ្នាក់បំផុតសម្រាប់មនុស្សលោក។
លោកបានពន្យល់ប្រាប់កាសែត Daily Star Online ថា បើសិនជាសង្គ្រាមផ្ទុះឡើងនៅពីលើផែនដី នោះអ្វីៗនឹងត្រូវកម្ទេចចោលទាំងអស់ក្នុងរយៈពេលប៉ុន្មានថ្ងៃប៉ុណ្ណោះ។
លោកបន្តថា ទីក្រុងនឹងត្រូវឆេះ ព្រៃឈើនឹងត្រូវឆេះ ភពនឹងត្រូវឆេះគ្មានសល់។ លែងមានទៀតហើយចំណីអាហារ អ្នកមិនអាចរស់បានទៀតទេ អ្វីៗសុទ្ធតែពុលទាំងអស់ អ្វីៗសុទ្ធតែមានជាតិវិទ្យុសកម្ម យើងនឹងត្រូវស្លាប់ទាំងអស់គ្នា។
លោក Bruceបាននិយាយពីវិធីដែលការផលិតចំណីអាហារនឹងត្រូវបញ្ឈប់ជាបន្ទាន់ ដោយសារតែបរិយាកាសរងការឆាបឆេះ ហើយនិងធ្វើឲ្យប៉ះពាល់ដល់ផលដំណាំទាំងអស់។ មូលហេតុនេះហើយ នឹងនាំឲ្យមនុស្សសម្រុកទៅកាន់ផ្សារទំនើប ហើយនៅទីបញ្ចប់ពួកគេនឹងត្រូវដាច់ស្បៀង។
លោក Bruceបានចោទសួរជាសំនួរថា តើវានឹងអាចចំណាយពេលយូរបានប៉ុន្មាន? តើយើងនឹងអាចស៊ូបានរយៈពេលប៉ុន្មានក្រោយពីសង្គ្រាមនេះផ្ទុះឡើង?ប្រហែលជាបានត្រឹម២-៣ថ្ងៃ។ មិនយូរជាងនេះទេ ឬអាចឆាប់ជាងនេះក៏ថាបាន។
លោក Bruceបាននិយាយថា ក្រោយផ្សែងបង្កឡើងដោយសារភ្លើងឆេះ ហើយនិងបំណែកហោះចូលបរិយាកាស វានឹងបិទបាំងព្រះអាទិត្យ ហើយដល់ពេលនោះ ផែនដីនឹងត្រូវកក ដោយសារតែលែងមើឃើញព្រះអាទិត្យតទៅទៀត៕
Home ព័ត៌មានអន្តរជាតិ អ្នកវិទ្យាសាស្ត្រ៖ សង្គ្រាមនុយក្លេអ៊ែរនៅទីអវកាសនឹងសម្លាប់មនុស្សក្នុងមួយប៉ព្រិចភ្នែក ហើយផែនដីនឹងត្រូវកក