ក្រុមចោរបានវាយកម្ទេចច្រកចូលទៅក្នុងសារមន្ទីរអាល្លឺម៉ង់ រួចលួចគ្រឿងពេជ្រតម្លៃជាង១.១ពាន់លានដុល្លារបានសម្រេច។
នៅក្នុងកាមេរ៉ាសុវត្ថិភាព ឃើញក្រុមចោរក្នុងឈុតខ្មៅ មានពិលបំភ្លឺផ្លូវ បានទម្លុះច្រកចូលទៅក្នុងសារមន្ទីរ Green Vault ស្ថិតក្នុងទីក្រុង Dresden ប្រទេសអាល្លឺម៉ង់ រួចលួចបានសម្រេចគ្រឿងអលង្កា៣ឈុតសល់ពីសតវត្សរ៍ទី១៨ដែលមិនអាចកាត់ថ្លៃបាន។
ក្រុមចោរគាស់ទ្វារនេះ បានលួចយកគ្រឿងអលង្កាដែលមានតម្លៃជាងគេបំផុតនៅក្នុងប្រវត្តិសាស្ត្រ ដែលរួមទាំងគ្រាប់ត្បូងពេជ្រ និងត្បូងកណ្តៀង ចេញពីសារមន្ទីរស្ថិតក្នុងចំណោមសារមន្ទីរវ័យចំណាស់ជាងគេបំផុតរបស់ពិភពលោក ស្ថិតនៅក្នុងព្រះបរមរាជវាំង Dresden ។
ក្រុមនគរបាល បានអះអាងថា ក្រុមចោរនេះមានគ្នាតិចតួចប៉ុណ្ណោះ ហើយនិងអាចចូលតាមចន្លោះប្រហែលជាងកន្លះម៉ែត្រតាមបង្អួចនៃសារមន្ទីរ Green Vault កាលពីយប់រំលងអាទ្រាត្រថ្ងៃអាទិត្យចូលព្រឹកថ្ងៃចន្ទកន្លងទៅ។
នៅក្នុងកាមេរ៉ាសុវត្ថិភាព ឃើញក្រុមចោរវាយកម្ទេចទូកម្កល់ទុកគ្រឿងអលង្កា និងប្រមូលគ្រឿងអលង្កាមិនអាចកាត់ថ្លៃបានទាំងនេះពីជ្រុងខាងកើតនៃសារមន្ទីរពេទ្យ កាលពីយប់រំលងអាធ្រាត្រចូលព្រឹកថ្ងៃចន្ទ ស្របពេលមេឃកំពុងតែផ្លេកបន្ទោរ។ កាមេរ៉ានេះដែរ ឃើញក្រុមចោរ២នាក់ វាយបំបែកបង្អួច ហើយសំឡេងប្រកាសអាសន្ន បានបន្លឺឡើងនៅមុនម៉ោង៥ព្រឹក ហើយក្រុមមន្ត្រីនគរបាល បានធ្វើដំណើរទៅដល់ទីនោះ នៅរយៈពេល៥នាទីក្រោយ ប៉ុន្តែក្រុមចោរ បានរត់គេចខ្លួនបាត់ស្រមោលអស់ទៅហើយ។
បច្ចុប្បន្នសារមន្ទីរ កំពុងតែធ្វើការអង្វក្រុមចោរទាំងអស់នេះថា មិនត្រូវបំផ្លាញ ឬរំលាយវត្ថុបុរាណជាប្រវត្តិសាស្ត្រមិនអាចកាត់ថ្លៃបានមួយនេះនោះទេ ដោយពួកគេបានអះអាងថា វាពិតជាមានតម្លៃខ្លាំងណាស់ទាំងខាងវប្បធម៌ និងប្រវត្តិសាស្ត្រ។
ក្រុមមន្ត្រី បានអះអាងថា គ្រឿងអលង្កាដែលបានលួចទៅបាត់នេះមិនអាចលក់តាមទីផ្សារបើកចំហរបាននោះទេ។ គ្រឿងអលង្កាដែលលួចយកទៅនេះ មានទាំងកន្លាស់.ក ឡេវអាវ និងក្បាលខ្សែក្រវាត់ ស្ថិតនៅក្នុងចំណោមវត្ថមានតម្លៃជាច្រើនទៀត។
សូមបញ្ជាក់ថា គ្រឿអលង្កាទាំងអស់នេះ មានអាយុកាលតាំងពីឆ្នាំ១៧២៣មកម្ល៉េះ ខណៈពេលដែលព្រះបរមរាជវាំង Dresden ជាកន្លែងដាក់តាំងគ្រឿងពេជ្រ ត្រូវបានកសាងលើកដំបូងក្នុងឆ្នាំ១៥៣៣៕
Home ព័ត៌មានអន្តរជាតិ គ្រឿងពេជ្រតម្លៃជាង១ពាន់លានដុល្លារត្រូវចោរលួចបានសម្រេចពិសារមន្ទីរអាល្លឺម៉ង់