[wai id="8"]
[wai id="7"]
ចលនាបាតុកម្មប្រជាធិបតេយ្យយ៉ាងផុសផុល នៅទីក្រុងបាងកកប្រទេសថៃ ប៉ុន្មានខែមកនេះ កាលពីថ្ងៃចន្ទ ទី ១៩តុលា លោកប្រាយុទ្ធ ចាន់អូចា នាយករដ្ឋមន្ត្រីថៃ បានប្រកាសថា លោកនឹងបើកការប្រជុំគណរដ្ឋមន្ត្រី ដើម្បីស្នើសុំទៅកាន់សភាជាតិថៃ ឲ្យបើកសម័យប្រជុំពិសេសមួយ ដើម្បីស្វែងរកដំណោះស្រាយទៅនឹងវិបត្តិនេះ។
កាលពីយប់ថ្ងៃទី២១ខែតុលា ក្រុមបាតុកររាប់ពាន់នាក់បាននាំគ្នាប្រមូលផ្តុំនៅមុខស្តូបជ័យជម្នះនៅកណ្តាល ទីក្រុងបាងកក ហើយនាំគ្នាដដ្ហែក្បួនចូលទៅកាន់ទីស្តីការគណៈរដ្ឋមន្ត្រី។ តំណាងក្រុមបាតុករបានប្រកាសថា នាយករដ្ឋមន្ត្រីប្រាយុទ្ធ ចាន់អូចា ត្រូវតែលាលែងចេញពីតំណែងក្នុងរយៈពេល៣ថ្ងៃខាងមុខទៀត។
ពាណិជ្ជកម្ម
ឱសានវាទរបស់មេដឹកនាំក្រុមបាតុករបានបញ្ជូនទៅកាន់ទីស្តីការគណៈរដ្ឋមន្ត្រី ។ ក្រុមបាតុករបានប្រកាសថា ពួកគាត់បានផ្ញើលិខិត ទៅកាន់នាយករដ្ឋមន្ត្រីតាមរយៈតំណាងរបស់លោក។ មេដឹកនាំក្រុមបាតុករ លោក Patsaravalee Tanakitvibulpon បានលើកឡើងថា «សង្គ្រាមរបស់យើង នឹងមិនបញ្ចប់នោះឡើយ បើនាយករដ្ឋមន្ត្រីប្រាយុទ្ធ មិនចុះចេញពីតំណែង។ ប្រសិនបើរយៈពេល៣ថ្ងៃ នាយករដ្ឋមន្ត្រីប្រាយុទ្ធ មិនព្រមលាលែងចេញពីតំណែងនោះ លោកនឹងត្រូវប្រឈមការក្រោកឈរឡើងធើ្វមហាបាតុកម្មពីពលរដ្ឋ»។
មានមនុស្សជាង ៥ម៉ឺននាក់ ភាគច្រើនជាសិស្ស និស្សិត បានប្រមូលផ្តុំគ្នាជាច្រើនកន្លែង នៅក្នុងក្រុងបាងកក បើទោះបីជាដឹងថាប្រឈមនឹងការបង្ក្រាប ឬ ការចាប់ខ្លួនពីសំណាក់អាជ្ញាធរក៏ដោយ។ ក្រៅពីនៅក្រុងបាងកក ចលនាបាតុកម្មសិស្សនិស្សិតថៃនេះ ក៏បានរីករាលដាលផងដែរ នៅតាមខេត្តក្រុងធំនានា មិនថាភាគខាងជើង ឬភាគខាងត្បូងប្រទេស ដូចជានៅខេត្តសុងក្លា ខេត្តណាខនប៉ាធំ ខេត្តឈៀងម៉ៃ និងខេត្តឧប៊ុនរ៉ាចាថានីជាដើម។
យុវជនថៃ បានទាមទារ ៤ចំណុចធំៗ ទីមួយគឺត្រូវដោះលែងមេចលនាបាតុកម្មប្រជាធិបតេយ្យទាំងអស់ ទីពីរគឺត្រូវធ្វើកំណែទម្រង់រដ្ឋធម្មនុញ្ញ ស្តារប្រជាធិបតេយ្យឡើងវិញ ទី៣គឺត្រូវធ្វើកំណែទម្រង់ស្ថាប័នព្រះមហាក្សត្រកុំឲ្យមានឥទ្ធិពលមកលើនយោបាយដឹកនាំប្រទេស ហើយចុងក្រោយ គឺលោកប្រាយុទ្ធ ចាន់អូចា ត្រូវតែចុះចេញពីតំណែង។
គួរបញ្ជាក់ដែរថា ថ្លែងនៅក្នុងសន្ទរកថាទៅកាន់ប្រជាជាតិ នៅថ្ងៃពុធនេះ លោកប្រយុទ្ធ ចាន់អូចា បានធ្វើការកត់សម្គាល់យ៉ាងដូច្នេះថា «ខ្ញុំនឹងចាត់វិធានការណ៍ ដើម្បីបន្ធូបន្ថយស្ថានការណ៍នាពេលបច្ចុប្បន្ន។ ឥឡូវនេះ ខ្ញុំកំពុងត្រៀមដកចេញវិញនូវវិធានការណ៍បន្ទាន់ក្នុងទីក្រុងបាងកក ហើយខ្ញុំនឹងចេញបទបញ្ជាភ្លាមៗតែម្តង ប្រសិនបើមិនមានអំពើហឹង្សាកើតឡើងទេនោះ»។ ជាមួយគ្នានេះ នាយករដ្ឋមន្ត្រីថៃរូបនេះ បានសង្កត់ធ្ងន់ ទៀតថា «ឥឡូវនេះយើងត្រូវដើរថយក្រោយបន្តិច ដើម្បីចាកចេញពីជម្រាលរអិល ដែលអាចរុញច្រានដល់ភាពវឹកវរ»។