ស្ងាត់ៗ កូរ៉េខាងជើង បានបង្ហាញសាច់ដុំសាជាថ្មីប្រកាសទៅដល់ពិភពលោកតាមរយ:ការបាញ់បង្ហោះមីស៊ីល កាលពីយប់ម្សិលមិញនេះ ។ នេះបើតាមការប្រកាសរបស់យោធាកូរ៉េខាងត្បូង ប៉ុន្តែមិនបានផ្ដល់ព័ត៌មានលម្អិតទាក់ទងគ្រាប់ផ្លោងនេះឡើយ។ ការបាញ់នេះ ធ្វើឡើងខណៈអាមេរិកផ្ដើមអបអរថ្ងៃបុណ្យ Thanksgiving ដែលជាថ្ងៃឈប់សម្រាកដ៏ធំមួយរបស់ប្រជាជនអាមេរិក។
យោងតាមការចុះផ្សាយរបស់សារព័ត៌មាន KCNA បានឱ្យដឹងទៀតថា ការធ្វើតេស្ដមីស៊ីលកាលពីម្សិលមិញនេះ ត្រូវបានធ្វើឡើងក្រោមការត្រួតពិនិត្យ និងបញ្ជាដោយផ្ទាល់ពីលោក គីម ជុងអ៊ុន។ មិនតែប៉ុណ្ណោ លោក គីម ក៏បានបង្ហាញពីការពេញចិត្តពេញថ្លើម ចំពោះជោគជ័យនៃការធ្វើតេស្ដមីស៊ីលនេះដែរ ខណៈអ្នកជំនាញមួយចំនួនយល់ថា ការបាញ់សាកល្បងមីស៊ីលនេះជាសារមួយផ្ញើជូនលោក ដូណាល់ ត្រាំ ដើម្បីក្រើនរំលឹកពីកាលបរិច្ឆេទដែលលោក គីម កំណត់ត្រឹមចុងឆ្នាំ២០១៩នេះ ជុំវិញកិច្ចចរចានុយក្លេអ៊ែរ សំដៅបញ្ជៀសកុំឱ្យស្ថានភាពនៅលើឧបទ្វីបកូរ៉េ វិលត្រឡប់ទៅរកស្ថានការណ៍ដូចឆ្នាំ២០១៧ ជាពេលដែលទីក្រុងព្យុងយ៉ាងបាញ់បោះមីស៊ីល និងអាវុធនុយក្លេអ៊ែរជាបន្តបន្ទាប់។
គួរបញ្ជាក់ថាយោងតាមសារព័ត៌មាន KCNA បានដកស្រង់សម្តីលោក គីម ដោយនិយាយថា៖ «ជោគជ័យជាចំហនេះ គឺជា កាដូមួយកាន់តែមានតម្លៃដែលក្រុមអ្នកវិទ្យាសាស្ត្រ និងក្រុមអ្នកបច្ចេកទេសការពារជាតិកំពុងបង្ហាញដល់ក្រុមមេដឹកនាំសំខាន់ៗ និងបក្សនោះ។
រូបភាពជាច្រើនបង្ហាញឲ្យឃើញមីស៊ីលនោះ ដោយកូរ៉េខាងជើង បានបាញ់មីស៊ីលនោះ ហោះចេញពីទឹកឡើងទៅលើអាកាស ដោយបានបណ្តាលឲ្យមានផ្សែងខ្មួលខ្មាញ់នៅពីលើផ្ទៃសមុទ្រ។
ទូរទស្សន៍របស់រដ្ឋ បានបង្ហាញឲ្យឃើញនូវអ្វីដែលខ្លួនអះអាងគឺរូបភាពរបស់មីស៊ីលនៅក្រោមផ្ទៃទឹកដែលត្រូវបានបាញ់ចេញពីនាវាចម្បាំងដោយប្រើបច្ចេកវិទ្យាគន្លឹះដើម្បីបាញ់៕