រដ្ឋធានីសេអ៊ូល៖ សហរដ្ឋអាមេរិក កូរ៉េខាងត្បូង និង ជប៉ុន បានសម្រេចដាក់ទណ្ឌកម្ម ប្រឆាំងនឹងក្រុងព្យុងយ៉ាង ជុំវិញការបាញ់សាកល្បងមីស៊ីល ជាបន្ដបន្ទាប់ បង្កនូវហានិភ័យដល់ពិភពលោក។
សារព័ត៌មាន The Korea Times បានចេញផ្សាយ កាលពីថ្ងៃសុក្រ ទី២ ខែធ្នូ ថា កូរ៉េខាងត្បូង នៅថ្ងៃសុក្រ បានប្រកាសដាក់ទណ្ឌកម្មបន្ថែម ប្រឆាំងនឹងប្រទេសកូរ៉េខាងជើង ដើម្បីឆ្លើយតបទៅនឹងការគំរាមកំហែងសន្តិសុខ កាន់តែខ្លាំងឡើង ពីក្រុងព្យុងយ៉ាង ដោយការបាញ់មីស៊ីលរយៈចម្ងាយឆ្ងាយរបស់ខ្លួន កាលពីខែមុន។
ស្របគ្នានេះដែរ ជប៉ុន និង សហរដ្ឋអាមេរិក ជាសម្ពន្ធមិត្តរបស់កូរ៉េខាងត្បូង ក៏បានដាក់ទណ្ឌកម្ម ប្រឆាំងនឹងក្រុមមន្ដ្រីជាន់ខ្ពស់របស់កូរ៉េខាងជើង ពាក់ព័ន្ធនឹងកម្មវិធីអាវុធខុសច្បាប់របស់ប្រទេសកុម្មុយនីស្ដឯកោមួយនេះ។ រដ្ឋាភិបាលក្រុងវ៉ាស៊ីនតោន បានចាត់ទុកការបាញ់សាកល្បងមីស៊ីលផ្លោងរបស់ក្រុងព្យុងយ៉ាង ជា«ការបង្កនូវហានិភ័យយ៉ាងធ្ងន់ធ្ងរ ដល់តំបន់ និង ពិភពលោកទាំងមូល»។
ក្រសួងរតនាគារសហរដ្ឋអាមេរិក កាលពីថ្ងៃព្រហស្បតិ៍ បានកំណត់លើឈ្មោះបុគ្គល នៅក្នុងបញ្ជីទណ្ឌកម្មរបស់ខ្លួន រួមមាន លោកឧត្ដមសេនីយ៍ ចូល អ៊ីលហូ (Jon Il Ho) លោក យូ ជីន (Yu Jin) និង លោក គីម ស៊ូហ្គីល (Kim Su Gil)។ មន្ដ្រីជាន់ខ្ពស់កូរ៉េខាងជើង ទាំង៣រូបនេះ ក៏បានរងទណ្ឌកម្ម ពីសហភាពអឺរ៉ុប កាលពីខែមេសា ផងដែរ។
ទណ្ឌកម្មទាំងនេះ អាចអនុញ្ញាតឲ្យអាជ្ញាធរ មានសិទ្ធិបង្កកទ្រព្យសម្បត្ដិរបស់បុគ្គលទាំងនេះ នៅលើទឹកដីសហរដ្ឋអាមេរិក ហើយហាមឃាត់ដល់កិច្ចព្រមព្រៀងនានា ជាមួយនឹងមន្ដ្រីជាន់ខ្ពស់របស់កូរ៉េខាងជើង ទាំង៣នាក់នេះ ថែមទៀតផង។
ក្រសួងការបរទេសកូរ៉េខាងត្បូង បានប្រកាស អំពីការដាក់ទណ្ឌកម្មដល់បុគ្គលផ្សេងៗទៀត ចំនួន៧នាក់ រួមទាំង ជនជាតិសិង្ហបុរីម្នាក់ និង តៃវ៉ាន់ម្នាក់ ហើយអង្គភាពចំនួន៨ផ្សេងទៀត។ បុគ្គលទាំងនេះ ក៏ត្រូវរៀបចំរួចជាស្រេច ក្រោមទណ្ឌកម្មរបស់សហរដ្ឋអាមេរិក ដែលបានដាក់ចន្លោះពីខែមករា ឆ្នាំ២០១៨ ដល់ខែតុលា ឆ្នាំ២០២២។
ទន្ទឹមគ្នានេះដែរ ក្រសួងការបរទេសជប៉ុន ក៏បានបញ្ជាក់ ថា ក្រុងតូក្យូ បានដាក់ទណ្ឌកម្ម ប្រឆាំងនឹងអង្គភាពចំនួន៣ និង បុគ្គលម្នាក់ សម្រាប់ទណ្ឌកម្មថ្មី ដោយរាប់បញ្ចូលទាំង ក្រុមហ៊ុនឡាហ្សារុស គ្រូប (Lazarus Group) ដោយបានសង្ស័យ អំពីការវាយប្រហារ តាមបណ្ដាញអ៊ីនធើរណេត។
ដោយឡែក ចិន និងរុស្ស៊ី បានរារាំងដល់កិច្ចខិតខំប្រឹងប្រែង កាលពីពេលថ្មីៗនេះ ជុំវិញការដាក់ទណ្ឌកម្មបន្ថែម ពីអង្គការសហប្រជាជាតិ ប្រឆាំងនឹងកូរ៉េខាងជើង។ លើសពីនេះ ប្រទេសមហាអំណាចទាំង២នេះ ថែមទាំងបានអះអាង អំពីការបន្ធូរបន្ថយទណ្ឌកម្ម ដោយជំនួសមកវិញ សម្រាប់ការចាប់ផ្តើមកិច្ចចរចា ហើយចៀសវាងការប៉ះពាល់ដល់មនុស្សធម៌។ ប៉ុន្ដែក្រុងវ៉ាស៊ីនតោន បានផ្តោតទៅលើកិច្ចខិតខំប្រឹងប្រែងត្រីភាគី ជាមួយប្រទេសជប៉ុន និង កូរ៉េខាងត្បូង ក៏ដូចជា ដៃគូអឺរ៉ុប ផងដែរ។
ទណ្ឌកម្មចុងក្រោយនេះ បានធ្វើឡើង ក្រោយពេលកូរ៉េខាងជើង បានបាញ់សាកល្បងមីស៊ីលអន្ដរទ្វីប កាលពីថ្ងៃទី១៨ ខែវិច្ឆិកា ដែលជាផ្នែកមួយ នៃការបាញ់មីស៊ីល ច្រើនជាង៦០គ្រាប់ នៅឆ្នាំនេះ។ សកម្មភាពយ៉ាងគឃ្លើននេះ បានកើតឡើង ចំពេលមានការព្រួយបារម្ភ ថា កូរ៉េខាងជើង អាចនឹងបន្ដបាញ់សាកល្បងអាវុធមហាប្រល័យលោកបន្ថែមទៀត។
លោក អេនតូនី ប្លីនខែន (Antony Blinken) រដ្ឋមន្ដ្រីក្រសួងការបរទេសសហរដ្ឋអាមេរិក បានបញ្ជាក់ ថា «ការបាញ់សាកល្បងមីស៊ីលរបស់កូរ៉េខាងជើង បានគំរាមកំហែងដល់សន្ដិសុខពិភពលោក ហើយថា វិធានការដាក់ទណ្ឌកម្មចុងក្រោយបំផុត គូសបញ្ជាក់ អំពីការប្តេជ្ញាចិត្តប្រកបដោយនិរន្តរភាពរបស់យើង នៅក្នុងការលើកកម្ពស់នូវការទទួលខុសត្រូវ ក្នុងការឆ្លើយតបទៅនឹងល្បឿន មាត្រដ្ឋាន និង វិសាលភាព នៃការបាញ់មីស៊ីលផ្លោងរបស់ក្រុងព្យុងយ៉ាង»។
ក្រសួងរតនាគារសហរដ្ឋអាមេរិក បានបញ្ជាក់ ថា ការបាញ់សាកល្បងមីស៊ីលនេះ «បង្ហាញអំពីតម្រូវការ សម្រាប់ប្រទេសទាំងអស់ នៅក្នុងការអនុវត្តយ៉ាងពេញលេញនូវដំណោះស្រាយរបស់ក្រុមប្រឹក្សាសន្តិសុខ អង្គការសហប្រជាជាតិ» ដែលមានបំណង រារាំងដល់ប្រទេសកូរ៉េខាងជើង អំពីការទទួលបានបច្ចេកវិទ្យា សម្ភារ និង ប្រាក់ចំណូលដែលក្រុងព្យុងយ៉ាង ត្រូវការ សម្រាប់ការអភិវឌ្ឍសមត្ថភាពនុយក្លេអ៊ែរ និង មីស៊ីលផ្លោងរបស់ខ្លួន»។
ក្រសួងរតនាគារសហរដ្ឋអាមេរិក បានសង្កត់ធ្ងន់ ថា សហរដ្ឋអាមេរិក បានដាក់ទណ្ឌកម្ម លើមន្ដ្រីកូរ៉េខាងជើង រួមមាន លោក Jon Il Ho និង Yu Jin ដោយសារតែពួកគេ បានដើរតួនាទីយ៉ាងសំខនា់ នៅក្នុងការអភិវឌ្ឍន៍អាវុធ ប្រកបដោយគ្រោះថ្នាក់បំផុត (WMD) ខណៈពួកគេ កំពុងតែធ្វើជាប្រធាន និង អនុប្រធាន នាយកដ្ឋានឧស្សាហកម្មគ្រឿងសព្វាវុធរបស់កូរ៉េខាងជើង ចំពេលលោក Kim Su Gil ធ្វើជាប្រធានការិយាល័យនយោបាយកងទ័ព ចន្លោះពី២០១៨ ដល់ ២០២១ ហើយមានតួនាទីត្រួតពិនិត្យ លើការអនុវត្ដការសម្រេចចិត្ត ពាក់ព័ន្ធនឹងកម្មវិធីអាវុធប្រកបដោយគ្រោះថ្នាក់នេះ៕
