រដ្ឋធានីមូស្គូ៖ នៅក្នុងសង្គ្រាមយ៉ាងសាហាវឃោរឃៅ កំពុងតែបន្ដវាយរុញច្រានគ្នាទៅវិញទៅមក អូសបន្លាយ អស់រយៈពេល២៣២ថ្ងៃកន្លងមកនេះ គិតត្រឹម ថ្ងៃទី១៣ ខែតុលា នៅតែស្វែងរកពន្លឺ នៃការបញ្ចប់ជម្លោះ មិនទាន់ឃើញ ខណៈការសម្លាប់ជីវិតមនុស្ស កាន់តែច្រើន កំពុងតែបន្ដ ឥឡូវនេះ ប្រធានាធិបតីរុស្ស៊ី កំពុងតែសង្ឃឹមលើប្រមុខរដ្ឋតួកគី ធ្វើជាអាជ្ញាកណ្ដាល ដើម្បីស្វែងរកការចរចាសន្ដិភាព បញ្ចប់ជម្លោះដ៏រ៉ាំរ៉ៃនេះ។
សារព័ត៌មាន Arab News បានចេញផ្សាយ កាលពីព្រឹក ថ្ងៃព្រហស្បតិ៍ ទី១៣ ខែតុលា ថា ទីប្រឹក្សាគោលនយោបាយបរទេស វិមានក្រឹមឡាំង បានបញ្ជាក់ ថា «ប្រសិនបើមានការចរចាសន្ដិភាពណាមួយកើតឡើង នោះទំនងជា នឹងកើតឡើង នៅលើទឹកដីតួកគី ដូចជា នៅក្នុងទីក្រុងអ៊ីស្ដាន់ប៊ូល (Istanbul) ឬ រដ្ឋធានីអង់ការ៉ា (Ankara)។ លោក រ៉េសេប តាយយីប អេដូហ្គេន (Recep Tayyip Erdogan) ប្រធានាធិបតីតួកគី ប្រហែជានឹងស្នើនូវអ្វីដែលសំខាន់ជាផ្លូវការ នៅក្នុងអំឡុងជំនួបចរចាជាមួយនឹងសមភាគីរុស្ស៊ី លោក ពូទីន នៅក្នុងទីក្រុងអាស្ដាណា (Astana) រដ្ឋធានីកាហ្សាក់ស្ថាន។
មន្ដ្រីវិមានក្រឹមឡាំង រូបនេះ បានបញ្ជាក់ ថា ក្រុងមូស្គូ រំពឹងថា ប្រធានាធិបតីតួកគី នឹងធានានូវការធ្វើជាអាជ្ញាកណ្ដាល ដល់ការចរចាសន្ដិភាព រវាងរុស្ស៊ី និង អ៊ុយក្រែន នៅក្នុងជំនួបរបស់គាត់ ជាមួយលោក វ្ល៉ាឌីមៀ ពូទីន (Vladimir Putin) ប្រធានាធិបតីរុស្ស៊ី នាថ្ងៃព្រហស្បតិ៍ ស្ថិតក្នុងប្រទេសកាហ្សាក់ស្ថាន (Kazakhstan) ។
លោក យូរី អ៊ូសាកូវ (Yury Ushakov) ទីប្រឹក្សាវិមានក្រឹមឡាំងរបស់ប្រធានាធិបតីរុស្ស៊ី បានប្រាប់ដល់ក្រុមអ្នករាយការណ៍ព័ត៌មាន នៅក្នុងទីក្រុងមូស្គូ ប្រទេសរុស្ស៊ី កាលពីថ្ងៃទីពុធ ថា តួកគី ទំនងជានឹងលើកឡើង អំពីគំនិតចរចាសន្ដិភាព នៅក្នុងប្រទេសអ៊ុយក្រែ ហើយប្រធានាធិបតី លោក អេដូហ្គេន ប្រហែលជានឹងស្នើសុំជាផ្លូវការ នៅក្នុងជំនួជាមួយនឹងលោក ពូទីន ផងដែរ។
ដោយឡែក ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡែនស្គី កាលពីពេលថ្មីៗនេះ បានចេញក្រឹត្យមួយ ដោយបានបញ្ជាក់ថា ចរចាតែជាមួយនឹងរុស្ស៊ី លើកលែងលោក វ្ល៉ាឌីមៀ ពូទីន មេដឹកនាំវិមានក្រឹមឡាំង។ ប៉ុន្ដែក្រុមមន្ដ្រីក្រុងមូស្គូ បានអះអាង ថា រុស្ស៊ី មិនប្រកាន់ ថា ការចរចាជាមួយនឹងលោក ហ្សេឡែនស្គី ប្រធានាធិបតីអ៊ុយក្រែន បច្ចុប្បន្ន ឬ មេដឹកនាំក្រុងកៀវ បន្ទាប់ពីគាត់នោះឡើយ៕