កាលពីពេលកន្លងទៅនេះ ក្រុមហ៊ុន Tesla ទើបបង្ហាញនូវរថយន្តភីកអាប់ដើរដោយថាមពលអគ្គិសនី Cybertruck របស់ខ្លួន ដែលរថយន្តស៊េរីថ្មីនេះមានរូបរាងដូចទៅនឹងរថយន្តជ័យរបស់ក្មេងលេង ថែមទាំងមានកំហុសមួយទៀតនៅត្រង់ថា វាភ្លាត់ស្នៀតឱ្យបែកកញ្ចក់នៅពេលកំពុងធ្វើតេស្តគ្រាប់បាល់ដែកនៅលើឆាកថ្ងៃបង្ហាញខ្លួន ទាំងដែលការពិតវាធ្វើពីដែកអ៊ីណុកអាចរងគ្រាប់កាំភ្លើងប្រភេទ 9mm បាន ហើយក៏ដូចគ្នាជាមួយដែកធ្វើយាន Starship របស់ SpaceX ដែរ។ និយាយរួមគឺវាមិនស៊ីគ្នាសោះ ប៉ុន្តែយ៉ាងណាក៏ដោយលោក Elon Musk និយាយថា វាជាអ្វីដែលត្រូវកែប្រែបន្ថែម។
តែយ៉ាងណាមិញ Cybertruck ដែលជារថយន្តភីកអាប់អគ្គិសនីក្រុមហ៊ុន Tesla បានបង្ហាញចេញកាលពីពេលកន្លងទៅ ទទួលបានការចាប់អារម្មណ៍ខ្លាំងពីសំណាក់មហាជន ដោយសារមានរូបរាងខុសពីរថយន្តភីកអាប់ដទៃទៀតលើទីផ្សារ និងដោយសារការប្រកួតសមត្ថភាពអូសទាញជាមួយរថយន្តភីកអាប់ F-150 របស់ Ford ផងដែរ។
រថយន្តភីកអាប់អគ្គិសនីនេះ គឺរចនារូបរាងឡើងដោយអ្នកឌីហ្សាញឈ្មោះ Franz von Holzhausen ដែលកន្លងមកលោកធ្លាប់ឌីហ្សាញរថយន្ត Tesla ជាច្រើនរួចមកហើយ រួមមាន Tesla Model S, Model 3, Model X, Model Y, Semi Truck និង Tesla Roadster ទៀតផង។
បើយោងតាមការចុះផ្សាយនៅក្នុងសារព័ត៌មាន Dailymail បានឲ្យដឹងថា ក្រោយចេញលក់រថយន្តភីកអាប់ប្លែកគេនេះ ភាគហ៊ុនរបស់ក្រុមហ៊ុន Tesla បានធ្លាក់ចុះគួរឲ្យកត់សម្គាល់ ពោលគឺធ្លាក់ចុះជាង ៦% ហើយបើគិតជាទឹកប្រាក់មានចំនួនប្រមាណជា ៧៦៨ លានដុល្លារនៃទំហំទ្រព្យសម្បត្តិសរុបរបស់លោក Elon Musk ដែលមានប្រមាណជា ២៣.៦ ពាន់លានដុល្លារ ចុះបញ្ជីដោយ Forbes ។ ប៉ុន្តែយ៉ាងណាមិញបើយោងតាមអ្នកវិភាគទីផ្សារ អន្តរជាតិបានឲ្យដឹងថា ការធ្វើបែបណារបស់ក្រុមហ៊ុន Tesla គឺជាការធ្វើទីផ្សារដោយប្រយោលនឹងមិនចាំបាច់ចំណាយប្រាក់ ដើម្បីធ្វើទីផ្សារទៅលើផ្នែកផ្សព្វផ្សាយច្រើនឡើយ ដោយសារតែក្រោយពីព្រឹត្តិការណ៍នៃការធ្វើតេស្តរថយន្តខាងលើនេះភ្លាម គ្រប់ទំព័រគេហទំព័រ ស្ទើរទូរទាំងពិភពលោកមមាញឹកយ៉ាងខ្លាំងក្នុងការចុះផ្សាយអំពីព្រឹត្តិការណ៍មួយនេះ ៕
Home ព័ត៌មានអន្តរជាតិ រថយន្តភីកអាប់អគ្គិសនីក្រុមហ៊ុន Tesla ធ្វើឲ្យអ្នកសារព័ត៌មានមមាញឹកខ្លាំង