នៅប្រទេសឥណ្ឌាជារឿយៗបានកើតមានឡើងនូវគ្រោះអគ្គីភ័យឆេះរោងចក្រឬក៏រោងសិប្បកម្មដោយប្រាកដតែមនុស្សមួយលើកៗអស់មិនតិចនាក់នោះទេ។ចំពោះមូលហេតុក៏ព្រោះតែរោងចក្រជាច្រើននិងក្រុមផលិតតូចៗនៅក្នុងផ្ទះល្វែងស្ថិតនៅក្នុងទីក្រុងធំៗរបស់ឥណ្ឌាច្រើនតែតាំងនៅក្នុងសង្កាត់ចាស់ៗដែលមានមនុស្សរស់នៅណែនណាន់តាន់តាប់ភាគច្រើនជាប្រជាជនក្រីក្រដោយសារតែដីនៅតំបន់ទាំងនេះថោកនិងងាយរកកម្លាំងពលកម្ម។
ក្រុមផលិតបែបនេះច្រើនជួលពកលករកម្មករចំណាកស្រុកស៊ីប្រាក់ឈ្នួលថោកៗ ដែលដេកធ្វើការនៅនឹងកន្លែងតែម្តងដើម្បីសន្សំសំចៃលុយ។ការធូររលុងក្នុងការអនុវត្តច្បាប់អាគារនិងសុវត្ថិភាពច្រើនតែនាំអោយមានឧបទ្ទវហេតុស្លាប់មនុស្សច្រើនៗនៅឥណ្ឌា។
កាលពីថ្ងៃទី៨ខែធ្នូមនុស្សយ៉ាងហោចណាស់៤៣នាក់បានស្លាប់នៅក្នុងអគ្គិភ័យក្នុងរោងចក្រមួយនៅក្នុងរដ្ឋធានីញូវដែលល្លីរបស់ឥណ្ឌាកាលពីថ្ងៃអាទិត្យទី៨ធ្នូ ហើយចំនួនមនុស្សស្លាប់អាចនឹងកើនឡើងថែមទៀត នេះបើតាមអ្វីដែលប៉ូលិសបានប្រាប់ទីភ្នាក់ងារសារព័ត៌មានបារាំង។អគ្គិភ័យបានកើតឡើងនៅក្នុងសង្កាត់ចាស់របស់ទីក្រុងកន្លែងមានផ្លូវតូចចង្អៀតនិងមនុស្សរស់នៅជាន់គ្នា ហើយរោងចក្រនិងឃ្លាំងតូចចង្អៀត។នាយប៉ូលិសក្រុងបានប្រាប់អ្នកសារព័ត៌មានថា
«យើង....បានជួយសង្គ្រោះមនុស្សយ៉ាងតិច៥០នាក់។ពួកគេជាពលករនិងកម្មកររោងចក្រដែលកំពុងដេកនៅខាងក្នុងអាគារកំពស់៤ឬ៥ជាន់នេះ»។
ពួកមន្ត្រីពន្លត់អគ្គិភ័យបាននិយាយថាវាពិបាកចូលសង្គ្រោះនិងពន្លត់ភ្លើងដោយសារផ្លូវតូចចង្អៀត និងងងឹត។សារព័ត៌មានក្នុងស្រុកបានចុះផ្សាយថាអ្នកពន្លត់ភ្លើងលីសែងមនុស្សចេញតាមច្រកតូចៗទៅកាន់រថយន្តសង្គ្រោះ។ពួកមន្ត្រីអគ្គិភ័យបានអោយដឹងថា អាគារដែលឆេះផ្ទុកកាតាបក្មេងរៀន និងវត្ថុវេចខ្ចប់ តែគេនៅមិនទាន់ដឹងមូលហេតុនៃអគ្គិភ័យនេះនៅឡើយ៕