រាជធានីបាងកក៖ សមាជិកសភា និង ព្រឹទ្ធសភាអភិរក្សនិយមរបស់ប្រទេសថៃ ភាគច្រើន មិនបានបោះឆ្នោតគាំទ្រដល់មេដឹកនាំគណបក្សឆ្ពោះទៅមុខ (Move Forward Party) ហៅកាត់ MFP ឲ្យក្លាយជានាយករដ្ឋមន្ដ្រី ដោយសារតែពួកគេព្រួយបារម្ភ អំពីគោលនយោបាយរបស់គណបក្សឈ្នះឆ្នោតមួយនេះ ចង់ធ្វើវិសោធនកម្ម លើមាត្រា១១២ ប៉ុន្ដែឥឡូវ គណបក្សភឿថៃ បានអះអាងជាថ្មី អំពីលទ្ធភាពបង្កើតរដ្ឋាភិបាលថ្មី។
សារព័ត៌មានរបស់ថៃ Bangkok Post បានចេញផ្សាយ កាលពីថ្ងៃចន្ទ ទី៣១ ខែកក្កដា ឆ្នាំ២០២៣ ថា លោក ភូមថាម វេចាយ៉ាឆៃ (Phumtham Wechayachai) អនុប្រធានគណបក្សភឿថៃ បានអះអាងជាថ្មី កាលពីថ្ងៃចន្ទ ថា សមាជិកសភាជាប់ឆ្នោតទាំង៥០០នាក់ និង សមាជិកព្រឹទ្ធសភា ដែលត្រូវបានតែងតាំង ចំនួន២៤៩នាក់ អាចនឹងគាំទ្រដល់ការបង្កើតរដ្ឋាភិបាលចម្រុះថ្មី ក្រោមលក្ខខណ្ឌ ថា រដ្ឋាភិបាលថ្មីនេះ នឹងមិនមានវត្ដមានរបស់គណបក្សឆ្ពោះទៅមុខ (MFP) ចូលរួម ។ ករណីនេះ នឹងត្រូវតែសម្រេច នៅក្នុងកិច្ចពិភាក្សា នាសប្តាហ៍នេះ នៅមុនសភាទាំង២ប្រជុំរួម ដែលត្រូវរំពឹងទុក នឹងធ្វើឡើង នៅថ្ងៃសុក្រ។
លោក ភូមថាម វេចាយ៉ាឆៃ បានបញ្ជាក់ ថា «គណបក្សភឿថៃ បានបញ្ជាក់ នៅក្នុងកិច្ចពិភាក្សា មួយ ជាមួយសមាជិកសភាជាប់ឆ្នោត មកពីគណបក្សផ្សេងៗទៀត ហើយសមាជិកព្រឹទ្ធសភា ដោយពួកគេបានអះអាង ថា ពួកគេនឹងបោះឆ្នោត ជ្រើសរើសបេក្ខជន មកពីគណបក្សភឿថៃ ឲ្យក្លាយជានាយករដ្ឋមន្ដ្រី ប្រសិនបើគណបក្សឆ្ពោះទៅមុខ ត្រូវដកចេញពីរដ្ឋាភិបាលចម្រុះថ្មី។ បញ្ហានេះ កំពុងតែធ្វើឲ្យយើង ប្រឈមមុខខ្លាំងបំផុត។ ដូច្នេះសម្ពន្ធភាពចម្រុះទាំង៨គណបក្ស ក៏នឹងជួបពិភាក្សាគ្នា អំពីបញ្ហានេះផងដែរ»។
លោកអនុប្រធានគណបក្សភឿថៃ រូបនេះ បានបន្ដ ថា គណបក្សភឿថៃ នឹងកោះប្រជុំរួមមួយ ជាមួយបណ្ដាមេដឹកនាំគណបក្សឆ្ពោះទៅមុខ និង គណបក្សជាសម្ពន្ធមិត្តចំនួន៦ផ្សេងទៀត នៅថ្ងៃពុធ ខណៈនៅថ្ងៃព្រហស្បតិ៍ សមាជិកសភា មកពីគណបក្សភឿថៃ ក៏នឹងជួបប្រជុំផងដែរ។ ដោយឡែកការប្រជុំរួមរបស់សមាជិកសភា និង ព្រឹទ្ធសភា អាចនឹងត្រូវធ្វើឡើង នៅថ្ងៃសុក្រ សម្រាប់ការបោះឆ្នោតជ្រើសរើសនាយករដ្ឋមន្ត្រីជាថ្មី។
ពាណិជ្ជកម្ម
នៅក្នុងការបោះឆ្នោតសកលរបស់ប្រទេសថៃ កាលពីថ្ងៃទី១៤ ខែឧសភា ឆ្នាំ២០២៣ គណបក្សឆ្ពោះទៅមុខ (MFP) បានទទួលសំឡេងច្រើនជាងគេ ដោយបានឈ្នះអាសនៈសភាចំនួន១៥១នាក់ នៅក្នុងរដ្ឋសភា។ ប៉ុន្ដែក្រោយបរាជ័យ មិនទទួលបានសំឡេងគាំទ្រគ្រប់គ្រាន់ ពីសមាជិកសភា និង ព្រឹទ្ធសភា កាលពីថ្ងៃទី១៣ ខែកក្កដា ខណៈនៅថ្ងៃទី១៩ ខែកក្កដា សភាបានច្រានចោលនូវការតែងតាំងជាថ្មីរបស់គាត់រួចមក លោក ភីថា លីមចារឿនរ៉ាត (Pita Limjaroenrat) មេដឹកនាំគណបក្សឆ្ពោះទៅមុខ បានអនុញ្ញាតឲ្យគណបក្សភឿថៃ ដែលជាសម្ពន្ធមិត្តធំទី២ ដោយមានអាសនៈចំនួន១៤១នាក់ នៅក្នុងរដ្ឋសភា ដឹកនាំការបង្កើតរដ្ឋាភិបាលថ្មី។
សមាជិកសភាជាប់ឆ្នោត មកពីគណបក្សនយោបាយជាច្រើន ដោយមានមេដឹកនាំរបស់ខ្លួន ជាមន្ដ្រីជាន់ខ្ពស់ នៅក្នុងរដ្ឋាភិបាលចាំផ្ទះរបស់លោកនាយករដ្ឋមន្ដ្រី ប្រាយុទ្ធ ចាន់-អូ-ចា (Prayut Chan-o-cha) មេដឹកនាំរដ្ឋប្រហារយោធា និង សមាជិកព្រឹទ្ធសភា ត្រូវបានតែងតាំង មានការព្រួយបារម្ភ អំពីចេតនារបស់គណបក្ស MFP នៅក្នុងការធ្វើវិសោធនកម្ម លើមាត្រាទី១១២ នៃក្រមព្រហ្មទណ្ឌ ត្រូវបានគេស្គាល់ ថា វាជាច្បាប់ប្រមាថព្រះមហាក្សត្រ។
លោក ភូមថាម វេចាយ៉ាឆៃ អនុប្រធានគណបក្សភឿថៃ បានបង្ហោះ អំពីគោលនយោបាយសេដ្ឋកិច្ចរបស់គណបក្សភឿថៃ នៅលើបណ្ដាញសង្គម Twitter កាលពីថ្ងៃចន្ទ ថា គាត់បាននិយាយសំដៅទៅគណបក្សភឿថៃ ដោយរំពឹងទុក ថា នឹងក្លាយជាអ្នកដឹកនាំរដ្ឋាភិបាលថ្មី។ គោលនយោបាយនេះ រួមមាន ប្រាក់ចំនួន១០ ០០០បាត (លុយថៃ) ឬស្មើនឹងប្រហែល ២៩១ដុល្លារអាមេរិក សម្រាប់កាបូបឌីជីថលរបស់អ្នកបោះឆ្នោតទាំងអស់, ប្រាក់ឈ្នួលប្រចាំថ្ងៃអប្បបរមា ចំនួន៦០០បាត ឬស្មើនឹងប្រហែល ១៧ដុល្លារ នៅក្នុងរយៈពេល៤ឆ្នាំ, ប្រាក់បៀវត្សរ៍ប្រចាំខែអប្បបរមា ចំនួន ២០ ០០០បាត ឬស្មើនឹងប្រហែល ៥៨៣ដុល្លារអាមេរិក សម្រាប់បុគ្គលិក ដែលមានសញ្ញាបរិញ្ញាបត្រ និង ប្រាក់ចំណូលគ្រួសារអប្បបរមា ចំនួន ២០ ០០០បាត។
ជាមួយគ្នានេះ លោក ណុបផាដុន ផាតតាម៉ា (Noppadon Pattama) តំណាងរាស្ដ្រ មកពីគណបក្សភឿថៃ បានបញ្ជាក់ ថា គណបក្សភឿថៃ ទំនងជានឹងតែងតាំងលោក ស្រេតថា ថាវីស៊ីន (Srettha Thavisin) ជាបេក្ខជននាយករដ្ឋមន្ត្រី សម្រាប់ការបោះឆ្នោតរបស់សភាទាំង២ នៅថ្ងៃសុក្រ។គាត់រំពឹង ថា លោក ស្រេតថា ថាវីស៊ីន នឹងទទួលបានសំឡេងគាំទ្រ ភាគច្រើន ពីសភាទាំង២ ភ្លាមៗតែម្ដង។
លោក ស្រេតថា ថាវីស៊ីន (Srettha Thavisin) ជាអ្នកជំនាញសេដ្ឋកិច្ច និង ពាណិជ្ជកម្ម។ អតីតប្រធានក្រុមហ៊ុនអភិវឌ្ឍន៍អចលនទ្រព្យដ៏ធំបំផុតរបស់ប្រទេសថៃ Sansiri Pcl វ័យ៦០ឆ្នាំរូបនេះ ក៏ជាមនុស្សដ៏គួរឲ្យទុកចិត្តបំផុតរបស់លោក ថាក់ស៊ីន ស៊ីណាវ៉ាត្រា នាយករដ្ឋមន្ដ្រីថៃ ដែលត្រូវបានពួកយោធា ធ្វើរដ្ឋប្រហារបណ្ដេញ ចេញពីអំណាច នៅក្នុងអំឡុងឆ្នាំ២០០៦។
បើទោះជាយ៉ាងណាក៏ដោយ តំណាងរាស្ដ្រ មកពីគណបក្សភឿថៃ រូបនេះ បានច្រានចោលសំណើរបស់គណបក្ស MFP សម្រាប់សម្ពន្ធមិត្តទាំងអស់ ត្រូវរង់ចាំ រយៈពេល១០ខែ សម្រាប់អាណត្តិរយៈពេល៥ឆ្នាំរបស់សមាជិកព្រឹទ្ធសភា ចំនួន២៤៩នាក់ នាពេលបច្ចុប្បន្ន ដែលត្រូវបានតែងតាំង នឹងត្រូវបញ្ចប់។ នេះមានន័យ ថា ព្រឹទ្ធសភា នឹងមិនអាចចូលរួមជាមួយសមាជិកសភាជាប់ឆ្នោត ទាំង៥០០នាក់ សម្រាប់ការបោះឆ្នោតជ្រើសរើសនាយករដ្ឋមន្ត្រី បាននោះឡើយ។ ប៉ុន្ដែសកម្មភាពបែបនេះ នឹងធ្វើឲ្យប្រជាជន ធុញទ្រាន់នឹងការបង្កើតរដ្ឋាភិបាលថ្មី៕
