បញ្ហានៃការធ្វើរបងព្រំដែន អាមេរិក និងម៉ិចស៊ិកកូ ជាគោលនយោបាយទី១របស់ប្រធានាធិបតីអាមេរិកដូណាល់ ត្រាំដែលកិច្ចការងារនោះបានប្រឈមនឹងមានវិវាទយ៉ាងខ្លាំងជាមួយ ប្រធានរដ្ឋសភា ដែលបានប្រកាស មិនចំណាយប្រាក់សម្រាប់ ជញ្ជាំងព្រំដែននោះ លោកត្រាំបានប្រើប្រាស់មធ្យោបាយផ្សេងដើម្បីសម្រេចនូវគោលនយោបាយរបស់ខ្លួន ។ កាលពីពេលកន្លងទៅនេះគេនៅចាំបានថា លោកប្រធានាធិបតីអាមេរិក បានឈានរហូតទៅដល់ការឡើងតុលាការផងដែរ ។
ចៅក្រមសហព័ន្ធអាមេរិកម្នាក់នៅថ្ងៃអង្គារសប្ដាហ៍នេះ (ពេលវេលានៅវ៉ាស៊ីនតោន) បានចេញបទបញ្ជាមួយដើម្បីរារាំងប្រធានាធិបតីលោក ដូណាល់ ត្រាំ ក្នុងការបង្វិលប្រាក់ ៣.៦ពាន់លានដុល្លារ យកទៅសាងសង់ជញ្ជាំងព្រំដែនរវាងអាមេរិក និងម៉ិចស៊ីកូ។ នេះបើតាមការចេញផ្សាយដោយសារព័ត៌មាន CNA នៅព្រឹកថ្ងៃពុធ ទី១១ ខែធ្នូ ឆ្នាំ២០១៩។
លោក ដេវីដ ប្រ៊ីយ៉ូនស៍ (David Briones) ដែលជាចៅក្រមសហព័ន្ធម្នាក់នៃទីក្រុង អ៊ែលផេសូ (El Paso) នៃរដ្ឋតិចណាស់ (Texas) គឺជាអ្នកចេញបញ្ជាខាងលើនៅក្នុង សេចក្ដីសម្រេចមួយមានកម្រាស់ ២១ទំព័រ ហើយការសម្រេចចិត្តបែបនេះ នឹងបង្កឧបសគ្គដល់រដ្ឋបាលលោក ត្រាំ ដែលបានសន្យាថានឹងសាងសង់ជញ្ជាំងព្រំដែនប្រវែង ៧២៥គីឡូម៉ែត្រ នៅតាមបណ្ដោយព្រំដែនជាប់ម៉ិចស៊ីកូ នៅត្រឹមខែវិច្ឆិកា ឆ្នាំ២០២០ ពោលគឺចំពេលដែលការបោះឆ្នោតប្រធានាធិបតីអាមេរិក នឹងត្រូវធ្វើឡើង។
គួរបញ្ជាក់ផងដែរថា ក្នុងការបោះឆ្នោតប្រធានាធិបតីអាមេរិកកន្លងទៅលោកដូណាល់ត្រាំ បានលើកឡើងពីគម្រោង សាង សង់ជញ្ជាំងនៅតំបន់ព្រំដែនអាមេរិក និងម៉ិចស៊ិកនេះឡើង ដោយលោកថា អាចជួយបញ្ឈប់លំហូរជនអន្ដោប្រវេសន៍ខុសច្បាប់ និងការជួញដូរគ្រឿងញៀនពីប្រទេសម៉ិចស៊ីក ចូលអាមេរិក៕