កាលពីរយៈពេល៤៥ឆ្នាំមុន អាកាសយានដ្ឋានអន្តរជាតិ Nicosia ស្ថិតនៅក្នុងប្រទេសស៊ីប គេបានមើលឃើញយន្តហោះដឹកអ្នកដំណើរចុងក្រោយគេ បានចុះចតនៅទីនោះ។ ចាប់តាំងពីពេលនោះមក អាកាសយានដ្ឋានមួយនេះ ត្រូវបានគេបោះបង់ចោល ហើយរឿងតែមួយគត់ដែលមានការផ្លាស់ប្តូរនៅទីនេះ ចាប់តាំងពីឆ្នាំ១៩៧៤រហូតមក គឺគំនូនៅលើជញ្ជាំងអគារព្រលានយន្តហោះ និងស្នាមច្រេះជាប់នៅលើតួយន្តហោះ។
យន្តហោះ Trident Sun នៅតែអត់កម្រើកចតនៅលើផ្លូវមកទល់នឹងពេលនេះ ជាកន្លែងដែលវាមកសំចតចុងក្រោយគេ ដើម្បីបញ្ជាក់ថា ព្រលានយន្តហោះមួយនេះ ត្រូវបានគេបំភ្លេចចោលទៅហើយ។
ព្រលានយន្តហោះនេះ ធ្លាប់ជាមជ្ឈមណ្ឌលដឹកជញ្ជូនដ៏មមារញឹកមួយរបស់ប្រទេសស៊ីប ដោយសារតែវាស្ថិតនៅលើកោះដែលជាគោលដៅទេសចរណ៍ដ៏ទាក់ទាញមួយ។
ចំណតបច្ចេកវិទ្យាខ្ពស់ បានដាក់ឲ្យប្រើប្រាស់នៅក្នុងឆ្នាំ១៩៦៨ រួមមានទាំងភោជនីយដ្ឋាន និងហាងទំនើប ដើម្បីបម្រើជូនអ្នកដំណើរដែលធ្វើដំណើរមកដល់ប្រទេសស៊ីប។
ឆ្នេរសមុទ្រដ៏ស្រស់បំព្រង ទីក្រុងតាំងពីមជ្ឈិមសម័យ និងបរិកាសលើកោះគ្មានគូផ្ទឹម បានធ្វើឲ្យទីនេះក្លាយជាគោលដៅទេសចរណ៍ដ៏ទាក់ទាញបំផុត ក្នុងចំណោមភ្ញៀវទេសចរជាតិ និងអន្តរជាតិ ក៏ដូចជាជនល្បី ដែលរួមទាំងតារាសម្តែង Elizabeth Taylor, Richard Burton និងតារាម៉ូដែល Brigitte Bardot ។
ប៉ុន្តែយុគសម័យមាស បានដល់ទីបញ្ចប់ភ្លាមៗនៅក្នុងឆ្នាំ១៩៧៤ ពេលដែលអាកាសយានដ្ឋាន Nicosia បានប្តូរពីច្រកចេញចូលរបស់ប្រទេសស៊ីប ប្រែទៅជាចំណុចផ្ទុះអំពើហិង្សានៃជម្លោះក្នុងស្រុកទៅវិញ។
ប្រទេសស៊ីប បានជួបភាពតានតឹងរវាងក្រុមស៊ីប-ក្រិក និងក្រុមស៊ីប-តួកគី ក្រោយពេលដែលពួកគេទទួលបានឯករាជ្យពីអង់គ្លេសក្នុងឆ្នាំ១៩៦០។
ប៉ុន្តែឆ្នាំ១៩៧៤ បានក្លាយជាឆ្នាំដ៏សំខាន់ជាងគេបំផុត។ នៅខែកក្កដា អំឡុងរដូវកាលវិស្សមកាលនារដូវក្តៅ ក្រុមជាតិនិយមក្រិក បានផ្តួលរំលំប្រធានាធិបតីស៊ីប ។ នៅថ្ងៃបន្តបន្ទាប់ អាកាសយានដ្ឋាន Nicosia ត្រូវបានប្រើប្រាស់មួយរយៈពេលដើម្បីដឹកជញ្ជូនទាហានចូលមកពីប្រទេសក្រិក។ អាកាសយានដ្ឋាននេះ បានក្លាយជាឈុតឆាកនៃភាពវឹកវរ អំឡុងពេលនោះផងដែរ ពេលដែលក្រុមភ្ញៀវទេសចរ និងជនបរទេសផ្សេងទៀត បានរត់ភៀសខ្លួនចេញពីជម្លោះហិង្សា។
នៅក្នុងរយៈពេលប៉ុន្មានថ្ងៃនៃរដ្ឋប្រហារ ប្រទេសតួកគី បានឈ្លានពានស៊ីប ហើយអាកាសយានដ្ឋានមួយនេះ រងការខូខាតយ៉ាងធ្ងន់ធ្ងរដោយសារការទម្លាក់គ្រាប់បែក។ តំបន់គ្មានកងទ័ព ត្រូវបានបង្កើតឡើង ហើយអាកាសយានដ្ឋាន Nicosia ស្ថិតនៅកណ្តាល ដែលនាំឲ្យគេបោះបង់ចោលវាទាំងស្រុង។ ជើងហោះហើរពាណិជ្ជកម្មចុងក្រោយគេ បានចាកចេញពីអាកាសយានដ្ឋាន ឆ្ពោះទៅកាន់ទីក្រុងឡុងដ៍ កាលពីឆ្នាំ១៩៧៧ ក្រោយការអនុញ្ញាតពិសេសរបស់អង្គការសហប្រជាជាតិ៕
Home ព័ត៌មានអន្តរជាតិ ព្រលានយន្តហោះខ្នាតយក្សទាំងមូលបែរជាទុកចោលដោយគ្មានការស្តាយស្រណោះបែបនេះទៅវិញ