កាលពីពេលកន្លងមកនេះ វៀតណាមបានធ្វើទំនើបកម្មយោធា ដោយពង្រីកថវិកាយោធា និងទិញសព្វាវុធទំនើបៗច្រើនសន្ធឹកសន្ធាប់ ត្រូវបានគេមើលឃើញថាជាការត្រៀមលក្ខណៈទប់ទល់ជាមួយមហាយក្សចិនដែលកំពុងកោងកាចក្នុងជម្លោះសមុទ្រចិនខាងត្បូងជាមួយខ្លួន។
ថ្មីៗនេះវៀតណាមត្រូវបានគេមើលឃើញថា បានបង្កើនសមត្ថភាពយោធារបស់ខ្លួនកាន់តែខ្លាំង តាមរយៈការទិញសព្វាវុធ ក៏ដូចជាចាប់ផ្ដើមរៀនផលិតនាវាមុជទឹក ដោយខ្លួនឯង ដូចជានាវាមុជទឹក Truong Sa 01 ជាដើម។ នេះបើតាមការដកស្រង់ការផ្សាយពីគេហទំព័រ Military Armed Force នៅថ្ងៃអង្គារ ទី១០ ខែធ្នូ ឆ្នាំ២០១៩។
នាវាមុជទឹកខ្នាតតូច Truong Sa 01 ត្រូវបានផលិតឡើងដោយអតីតសាស្ត្រាចារ្យខាងវិស្វកម្មនាវានៃសាកលវិទ្យាល័យ ទីក្រុងហាណូយ លោក Nguyen Quoc Hoa ហើយបច្ចុប្បន្នលោកបានក្លាយជាអ្នកជំនួញនាវាម្នាក់ នៅក្នុងខេត្ត Thai Binh។
គម្រោងផលិតនាវាមុជទឹក Truong Sa 01 ទទួលបានការគាំទ្រពីរដ្ឋាភិបាលវៀតណាម ដែលបាននិងកំពុងស្វះស្វែងអភិវឌ្ឍ សមត្ថភាពនាវាល្បាត និងនាវាមុជទឹក ស្របពេលកំពុងមានជម្លោះដែនទឹកជាមួយចិន នៅឯតំបន់សមុទ្រចិនខាងត្បូង។
នាវាមុជទឹកនេះ អាចបំលាស់ទីជាមួយទម្ងន់៨០តោន និងអាចមុជទៅក្រោមទឹកជំរៅ៦០ម៉ែត្រ ក្នុងរយៈ១៨ម៉ោង ព្រមទាំង អាចប្រតិបត្តិការបានចំងាយ ៨០០គីឡូម៉ែត្រ។
គួរបញ្ជាក់ដែរថា កន្លងមកវៀតណាមបានទទួលនាវាមុជទឹកចំនួន ៤ គ្រឿងរូចទៅហើយពីរដ្ឋាភិបាលក្រុងម៉ូស្គូ ដែលកន្លងមកវៀតណាមបានចុះកិច្ចសន្យាទិញនាវាមុជទឹកជាច្រើនគ្រឿង និងមានយន្តហោះប្រដេញផងដើម្បីពង្រឹងអំណាចយោធារបស់ខ្លួនផងដែរ។
