យ៉ាងហោចណាស់ក៏មានមនុស្សម្នាក់ស្លាប់ និង ១២នាក់រងរបួស នៅក្នុងគ្រោះអគ្គិភ័យ ឆេះនាវាផ្ទុកយន្តហោះ Kuznetsov កាលពីថ្ងៃទី ១២ ខែធ្នូ នៅក្នុងតំបន់ Murmansk ប្រទេសរុស្ស៊ី។
សារព័ត៌មាន Tass បានផ្សាយថា «សាកសពម្នាក់ត្រូវបានរក ឃើញនៅកន្លែងកើតហេតុ និង ២នាក់ទៀតនៅបាត់ខ្លួននៅឡើយ។ ក្រៅពីនេះ មានអ្នករងរបួស ១២នាក់ ភាគច្រើនថប់ដង្ហើម ដោយផ្សែងពុល ។ ការឆាបឆេះនេះ បានកើតឡើង កាលពីថ្ងៃទី ១២ ខែធ្នូ ក្នុងពេលដែល នាវាផ្ទុកយន្តហោះ Kuznetsov កំពុងតែជួសជុល។ ភ្លាមៗនោះ អណ្តាតភ្លើងបានរាលដាលយ៉ាងឆាប់រហ័ស ក្នុងបរិវេណ១២០ម៉ែត្រការ៉េ ។ប្រភពព័ត៌មាន បានឲ្យដឹងថា ការឆាប់ឆេះកើតចេញពីទីតាំង ស្តុកឧស្ម័ន នៅលើនាវាផ្ទុកយន្តហោះ។ ជាភពសំណាង ពេលគ្រោះអគិ្គភ័យបានកើតឡើង មិនមានអាវុធនៅលើនាវាផ្ទុកយន្តហោះនោះឡើយ ។
កម្លាំងពន្លត់អគ្គិភ័យ ពីរនាក់ រងរបួសនៅក្នុងពេលបំពេញការងារ។កន្លងមក នាវាផ្ទុកយន្តហោះនេះ ត្រូវ ដងសន្ទូច(ក្រែន) បាក់ចំ បណ្តាលឲ្យខូចខាតយ៉ាងខ្លាំង។ កាលពីឆ្នាំ២០១៦ នាវាផ្ទុកយន្តហោះ នេះ បានបំពេញភារកិច្ចនៅក្នុងប្រទេសស៊ីរី ដោយពេលនោះ មានយន្តហោះពីរគ្រឿង នៅលើនាវានេះ ត្រូវបាត់បង់ ក្រោយរយៈ ពេល ៣សប្តាហ៍ ចូលរួមធ្វើសង្គ្រាមនៅប្រទេសស៊ីរី៕