បំណែកដៃ-ជើងរបស់បុរសផ្ល័ររីដាម្នាក់ត្រូវបានរកឃើញនៅក្នុងពោះក្រពើទម្ងន់៤៥០ផោន ។ បំណែកសាកសពរបស់លោក Michael Ford II អាយុ៤៥ឆ្នាំ បានអណ្តែតផងដែរ នៅលើព្រែកតាមផ្លូវក្នុងក្រុមហ៊ុនរ៉ែហ្វូស្វាត Mosaicស្ថិតនៅក្នុងស្រុក Polk County កាលពីថ្ងៃទី២៨ ខែមិថុនាកន្លងទៅ។
កម្មករម្នាក់ក៏បានប្រទះឃើញសត្វក្រពើមួយក្បាលនៅក្បែរនោះ ហើយក្រពើមួយក្បាលនេះ ទំនងជាមានខ្លួនមនុស្សនៅក្នុងមាត់របស់វា។គណកម្មការនេសាទ និងសត្វព្រៃ ត្រូវបានទូរស័ព្ទឲ្យទៅកាន់កន្លែងកើតហេតុ ជាកន្លែងដែលពួកគេ បានដាក់អន្ទាក់ចាប់ក្រពើមួយក្បាលនេះ និងសម្លាប់វាចោល។ការវះពោះសត្វក្រពើនេះ បានរកឃើញដៃ និងជើងរបស់លោក Fordនៅក្នុងពោះរបស់វា។យោងតាមការអះអាងរបស់គណកម្មការនេសាទ និងសត្វព្រៃ បានឲ្យដឹងថា ក្រពើមួយក្បាលនេះ មានបណ្តោយ១២ហ្វ៊ូត និងមានទម្ងន់ប្រហែល៤៥០ផោន។ ពាក់ព័ន្ធនឹងឧប្បតិ្តហេតុនេះ បានធ្វើឲ្យមានការចោទជាសំនួរភ្លាមៗថាតើ លោក Ford ត្រូវបានសម្លាប់ដោយសត្វក្រពើ ឬគាត់ស្លាប់រួចទៅហើយ ពេលដែលគាត់ត្រូវសត្វក្រពើស៊ីជាចំណី។លោក Ford មិនមែនជាកម្មករនៅក្នុងក្រុមហ៊ុន Mosaic នោះទេ ហេតុដូច្នេះហើយ គេនៅមិនទាន់ប្រាកដថាតើគាត់នៅលើដីឬយ៉ាងណា។ រថយន្តរបស់លោក ត្រូវបានរកឃើញផងដែរនៅក្នុងបរិវេនក្រុមហ៊ុន។ខណៈពេលដែលអ្នកស្រុកដើរឆ្លងកាត់ទីនោះដើម្បីស្ទួចត្រី ក្លាយជារឿងធម្មតាទៅហើយនោះ ឪពុករបស់លោក Fordបាននិយាយថា កូនប្រុសរបស់គាត់មិនដែលស្ទួចត្រីម្តងណាឡើយនៅក្នុង១ជីវិតរបស់គាត់។ លោក Fordបានបាត់ខ្លួនអស់រយៈពេល៤ថ្ងៃ មុនពេលដែលសាកសពរបស់លោក ត្រូវបានរកឃើញ។
ទោះបីជាយ៉ាងណាក៏ដោយនៅក្នុងសប្តាហ៍នេះ រឿងអាថ៌កំបាំងរយៈពេល៥ខែពាក់ព័ន្ធនឹងការស្លាប់របស់លោក Fordត្រូវបានស្រាយ ពេលដែលការិយាល័យពិនិត្យសុខភាពស្រុក បានអះអាងថា លោក Fordបានស្លាប់ដោយសារតែឡើងជាតិពុលរបស់ថ្នាំមេថាមហ្វេតាមីន។រយៈពេល១០ថ្ងៃមុនពេលគេប្រទះឃើញគាត់ស្លាប់ លោក Fordត្រូវបានចាប់ខ្លួនពីបទលួចគាស់ផ្ទះ ហើយលួចគ្រឿងបន្លាស់រថយន្ត តែត្រូវដោះលែងវិញជាមួយនឹងប្រាក់តម្កល់៦ពាន់ដុល្លារ៕
Home ព័ត៌មានអន្តរជាតិ ភ្ញាក់ផ្អើលខ្លាំងពេលវះពោះក្រពើទម្ងន់៤៥០ផោនឃើញមានដៃ-ជើងមនុស្សនៅក្នុងពោះរបស់វា