រដ្ឋធានីវ៉ាស៊ីនតោន៖ ក្រោយពេលកម្លាំងទាហានរបស់ក្រុងមូស្គូ បានប្រើប្រាស់ដ្រូន វាយប្រហារទៅលើទីក្រុងនានា របស់អ៊ុយក្រែន នោះមក ក្រុងកៀវ បានកំណត់អត្ដសញ្ញាណដ្រូន នោះ ត្រូវបានផលិត នៅអ៊ីរ៉ង់ ហើយឥឡូវនេះ បណ្ដាប្រទេសបស្ចិមលោក បានចោទប្រកាន់ទៅលើទីក្រុងតេអ៊ីរ៉ង់ បំពារបំពាន លើកិច្ចព្រមព្រៀងនុយក្លេអ៊ែរ ឆ្នាំ២០១៥ រវាងអ៊ីរ៉ង់ និង ប្រទេសមហាអំណាច នៅលើពិភពលោក។
សារព័ត៌មាន Ukrinform បានចេញផ្សាយ កាលពីព្រឹក ថ្ងៃអង្គារ ទី១៨ ខែតុលា ថា ក្រុងវ៉ាស៊ីនតោន បានអះអាង ថា សហរដ្ឋអាមេរិក បានព្រមព្រៀងជាមួយនឹងសម្ពន្ធមិត្តលោកខាងលិច ថា ការផ្គត់ផ្គត់ដ្រូនអត្ដឃាតរបស់អ៊ីរ៉ង់ ទៅឲ្យប្រទេសរុស្ស៊ី បានរំលោភទៅលើទណ្ឌកម្មរបស់អង្គការសហប្រជាជាតិ។
កម្លាំងទាហានរុស្ស៊ី កាលពីថ្ងៃចន្ទ បានវាយប្រហារយ៉ាងសន្ធាប់ ទៅលើទីក្រុងនានារបស់អ៊ុយក្រែន រួមទាំង រដ្ឋធានីកៀវ ដោយការប្រើប្រាស់មីស៊ីល ការវាយប្រហារតាមអាកាស និង យន្ដហោះគ្មានមនុស្សបើក ឬដ្រូន ដែលគេជឿ ថា ត្រូវបានផលិត នៅក្នុងប្រទេសអ៊ីរ៉ង់។
ក្រសួងការបរទេសសហរដ្ឋអាមេរិក បានបញ្ជាក់ ថា ក្រុងវ៉ាស៊ីនតោន ឯកភាពជាមួយនឹងការវាយតម្លៃរបស់បារាំង និង ចក្រភពអង់គ្លេស ថា ដ្រូននោះ រំលោភលើដំណោះស្រាយរបស់ក្រុមប្រឹក្សាសន្ដិសុខ អង្គការសហប្រជាជាតិ លេខ២២៣១។ ដំណោះស្រាយនេះ ជាប់ពាក់ព័ន្ធនឹងកិច្ចព្រមព្រៀងនុយក្លេអ៊ែររបស់អ៊ីរ៉ង ដោយហាមឃាត់ដល់ប្រទេសអ៊ីរ៉ង់ ផ្ទេរបច្ចេកវិទ្យាយោធា។
អ៊ុយក្រែន បានកំណត់អត្តសញ្ញាណដ្រូន ឬ យានអវកាសគ្មានមនុស្សបើក (UAV) ជាអាវុធរបស់អ៊ីរ៉ង់ ឈ្មោះ សាហេដ-១៣៦ (Shahed-136)។ យន្ដហោះគ្មានមនុស្សបើកទាំងនោះ ត្រូវគេហៅថា ដ្រូនកាមីកាហ្សេ (Kamikaze) តាមយកតាមអាកាសយានិកយន្ដហោះចម្បាំងរបស់ជប៉ុន ហោះបំពេញបេសកកម្មអត្ដឃាត នៅក្នុងសង្គ្រាមលោកលើកទី២។
លោក វេដិន ផាថែល (Vedant Patel) អ្នកនាំពាក្យក្រសួងការបរទេសអាមេរិក បានបញ្ជាក់ កាលពីថ្ងៃចន្ទ ថា «នៅមុននេះបន្តិច សម្ពន្ធមិត្តរបស់យើង រួមមាន បារាំង និង ចក្រភពអង់គ្លេស បានសន្និដ្ឋានជាសាធារណៈថា ការផ្គត់ផ្គង់យន្ដហោះគ្មានមនុស្សបើក ឬ ដ្រូនរបស់ឱ្យអ៊ីរ៉ង់ ទៅឱ្យប្រទេសរុស្ស៉ី ជាការបំពានលើដំណោះស្រាយក្រុមប្រឹក្សាសន្តិសុខ អង្គការសហប្រជាជាតិ លេខ ២២៣១...ហើយនេះជាអ្វី ដែលយើងឯកភាព»។
ក្រសួងការបរទេសអាមេរិក បានវាយតម្លៃ ថា រុស្ស៉ីបានប្រើយន្ដហោះគ្មានមនុស្សបើក ឬដ្រូនអ៊ីរ៉ង់ សម្រាប់វាយប្រហារ ទៅលើទីក្រុងកៀវ កាលពីថ្ងៃចន្ទ ខណៈក្រុងតេអ៊ីរ៉ង់ បានអះអាង ថាខ្លួន មិនបានលក់ ឬ ផ្ដល់ដ្រូន ប្រភេទនេះ ទៅឱ្យក្រុងមូស្គូ៕