សត្វខ្លាមួយក្បាលបានចាប់ហែកស៊ីក្មេងប្រុសអាយុ៥ឆ្នាំម្នាក់ និងធ្វើឲ្យមិត្តរបស់គេអាយុ៤ឆ្នាំម្នាក់ទៀត រងរបួសយ៉ាងធ្ងន់ធ្ងរ ពេលដែលពួកគេកំពុងលេងនៅក្រៅផ្ទះស្ថិតនៅក្នុងភូមិមួយកន្លែងរបស់ប្រទេសឥណ្ឌា។
សាកសពសល់ពាក់កណ្តាលខ្លួនរបស់ក្មេងប្រុស Chetan អាយុ៥ឆ្នាំ ត្រូវបានប្រទះឃើញនៅក្នុងចម្កាអំពៅស្ថិតនៅចម្ងាយប្រហែលជាង៣០០ម៉ែត្រពីភូមិ Prempuri រដ្ឋ Uttar Pradesh ដោយប្រអប់ដៃទាំង២របស់ក្មេងប្រុស ត្រូវដាច់ចេញពីខ្លួន ខណៈដែលមិត្ត Nishuរបស់គេត្រូវបានរួសរាន់បញ្ជូនទៅកាន់មន្ទីរពេទ្យ ក្រោយត្រូវខ្លាខាំចំកញ្ចឹងក.ធ្វើឲ្យរបួសយ៉ាងធ្ងន់ធ្ងរ។ក្មេងប្រុសទាំង២បានស្រែកសុំឲ្យគេជួយ ក្រោយពួកគេឃើញសត្វខ្លានៅក្នុងភូមិ។ វាគឺជាការវាយប្រហារលើកទី២ហើយត្រឹមរយៈពេល២ថ្ងៃប៉ុណ្ណោះ ជាហេតុធ្វើឲ្យមានការភ្ញាក់ផ្អើលយ៉ាងខ្លាំងនៅក្នុងរដ្ឋ Uttar Pradesh ។ក្រុមអ្នកភូមិ បានចាប់ផ្តើមស្វែងរកក្មេងប្រុស Chetan បន្ទាប់ពីការវាយប្រហារកាលពីថ្ងៃចន្ទ មុនពេលដែលប្រទះឃើញសាកសពរបស់ក្មេងប្រុស។សេចក្តីរាយការណ៍បានឲ្យដឹងថា ផ្នែកខាងខ្នង ដៃ និងក្បាលរបស់ក្មេងប្រុស បានបាត់ ខណៈដែលប្រអប់ដៃ បានដាច់ចេញពីខ្លួនរបស់គេ។គួរឲ្យដឹងថា ក្មេងប្រុសអាយុ៥ឆ្នាំម្នាក់ទៀត ឈ្មោះ Rohan ត្រូវបានខាំពាំយកទៅដោយសត្វខ្លានៅក្នុងភូមិ Akbarpur Chauganva ដែលមានចម្ងាយឆ្ងាយពីនេះប្រហែល៦៤០គ.ម កាលពីថ្ងៃអាទិត្យ មុនពេលក្មេងប្រុស ត្រូវបានសង្គ្រោះវិញ ដោយក្រុមគ្រួសារបស់គេ។
ក្រុមអាជ្ញាធរឥណ្ឌាបាននិយាយថា ពួកគេបានដាក់អន្ទាក់ដើម្បីចាប់ខ្លា ហើយនិងបើកការស៊ើបអង្កេតលើករណីសម្លាប់ក្មេងប្រុសនេះក្រោយការវាយប្រហាររបស់សត្វខ្លាហើយក្រុមមន្ត្រីរុក្ខាប្រម៉ាញ់ក៏បានបង្កើនការដើរល្បាតរបស់ពួកគេផងដែរ ដើម្បីតាមឃ្លាំមើលការបង្ហាញខ្លួនរបស់សត្វខ្លា។យោងតាមសេចក្តីរាយការណ៍ពីកាសែត The Times of Indiaបានឲ្យដឹងថាមាននូវករណីវាយប្រហារពីសត្វខ្លា៦លើករួចមកហើយនៅក្នុងរដ្ឋ Uttar Pradesh កាលពីខែមុន៕
