ទីក្រុងតៃប៉ិ៖ ប្រធានាធិបតីតៃវ៉ាន់ ជាអ្នកមានចិត្តក្លាហាន ហ៊ានចេញមុខប្រឆាំងនឹងលោក ស៊ី ជិនពីង ប្រធានាធិបតីចិន បានប្រកាសលាលែង ពីប្រធានបក្ស DPP ក្រោយពេលគណបក្សរបស់លោកស្រី បានចាញ់ការបោះឆ្នោត ប៉ុន្ដែលោកស្រី បានបញ្ចុះបញ្ចូលលោក ស៊ូ តេងចាង (Su Tseng-chang) នាយករដ្ឋមន្ដ្រី ឲ្យបន្ដនៅធ្វើជាថ្នាក់ដឹកនាំបក្ស ក្រោយពេលគាត់ដាក់ពាក្យលាលែង ពីតំណែង។
សារព័ត៌មាន Taiwan News បានចេញផ្សាយ កាលពីថ្ងៃអាទិត្យ ទី២៧ ខែវិច្ឆិកា ថា លោកស្រី សៃ អ៊ីងវ៉ឹន (Tsai Ing-weng) បញ្ជាក់ កាលពីថ្ងៃសៅរ៍ ថា លោកស្រី នឹងដាក់លាលែង ពីតំណែងជាប្រធានគណបក្សវឌ្ឍនភាពប្រជាធិបតេយ្យ (DPP) ក្រោយពេលគណបក្សរបស់លោកស្រី បានឈ្នះត្រឹមតែ៤ក្រុង និង ១ខណ្ឌ នៅក្នុងការបោះឆ្នោតថ្នាក់មូលដ្ឋាន។
បើតាមសារព័ត៌មាន The Liberty Times បានរាយការណ៍ ថា លោក ស៊ូ តេងចាង (Su Tseng-chang) នាយករដ្ឋមន្ដ្រីតៃវ៉ាន់ ក៏បានដាក់ពាក្យលាលែង ចេញពីតំណែងរបស់គាត់ ផងដែរ។ ប៉ុន្ដែលោកស្រីប្រធានាធិបតី បានបញ្ចុះបញ្ចូលគាត់ រហូតព្រមព្រៀង នៅបន្ដកាន់កាប់តំណែងរបស់គាត់។
នៅក្នុងការបោះឆ្នោតថ្នាក់មូលដ្ឋាននោះ គណបក្ស DPP នៅតែរក្សាបានការគ្រប់គ្រងត្រឹមតែទីក្រុង ចំនួន៤និង ១ខណ្ឌ នៅតំបន់ភាគខាងត្បូង រួមមាន កាវស៊ុង (Kaohsiung), តៃណាន (Tainan), ពីងទុង (Pingtung) និង ខណ្ឌឈៀយី (Chiayi) ខណៈឈ្នះត្រឹមតែខណ្ឌផែងហ៊ូ ( Penghu) ពីគណបក្សគួមីនតាំង (Kuomintang) ហៅកាត់ KMT ។ ប៉ុន្ដែគណបក្ស DPP បានចាញ់ការគ្រប់គ្រងទីក្រុងតាវយួន (Taoyuan) និង ទីក្រុងគីលុង (Keelung) ធ្លាក់ទៅលើគណបក្ស KMT ហើយទីក្រុងស៊ីនជូ (Hsinchu) បានទៅលើគណបក្សប្រជាជនតៃវ៉ាន់ ខណៈចាញ់ការគ្រប់គ្រងទីក្រុងតៃប៉ិ ហើយជ័យជម្នះបានទៅលើគណបក្ស KMT។
ថ្លែងនៅក្នុងសន្និសីទសារព័ត៌មានមួយ លោកស្រី ប្រធានាធិបតី បានបញ្ជាក់ ថា លទ្ធផលបោះឆ្នោត មិនទទួលបានដូចអ្វីដែលលោកស្រី រំពឹងទុកនោះឡើយ។ ដូច្នេះលោកស្រី ចាំបាច់ត្រូវតែទទួលខុសត្រូវ និង លាលែងពីថ្នាក់ដឹកនាំគណបក្ស។ លោកស្រី បានបន្ដ ថា បញ្ហានៅតែមានគម្លាតគួរឱ្យកត់សម្គាល់ រវាងអភិបាលកិច្ចរបស់គណបក្ស DPP នៅថ្នាក់មូលដ្ឋាន និង ការរំពឹងទុករបស់សាធារណជន៕