ក្រុមអ្នកវិទ្យាសាស្ត្រ បាននរកឃើញថា ម្ចាស់ក្សត្រីនៅក្នុងប្រវត្តិសាស្ត្រចូលចិត្តធ្វើសង្គ្រាមជាងស្តេចរហូតដល់ទៅ៣៨.៨ភាគរយឯណោះ។នៅពេលដែលលោក Steven Pinker ដែលជាអ្នកនិពន្ធ និងជាចិត្តវិទូសញ្ជាតិកាណាដា ប្រកាសថា បុរសចូលចិត្តញុះញង់ឲ្យមានសង្គ្រាម និងការប្រល័យពូជសាសន៍ស្ទើតែទាំងអស់នៅលើពិភពលោកនោះ ក្រុមអ្នកស្រាវជ្រាវសហរដ្ឋអាមេរិក បានធ្វើតេស្តផ្លូវការ ថាតើមាននូវសន្តិភាពពិតប្រាកដដែរឬទេ ក្រោមការដឹកនាំរបស់មេដឹកនាំស្រី ប៉ុន្តែលទ្ធផល បានបង្ហាញពីភាពផ្ទុយគ្នាស្រឡះចំពោះការលើកឡើងរបស់លោក Pinker ពោលគឺមេដឹកនាំស្រី ចូលចិត្តធ្វើសង្គ្រាមច្រើនជាងមេដឹកនាំប្រុស។
នៅក្នុងរឿងព្រេង ទេវកថា និងរឿងនិទាន មានតែស្តេចទេដែលជាអ្នកប្រកាសសង្គ្រាម និងចូលរួមច្បាំងនៅលើសមរភូមិសង្គ្រាមដ៏អស្ចារ្យ ហើយនិងមានតែម្ចាស់ក្សត្រីទេ ដែលចង់ឲ្យមានសន្តិភាព ជាជាងចង់បង្កសង្គ្រាម។ ប៉ុន្តែការសិក្សាថ្មី បានបង្ហាញថាម្ចាស់ក្សត្រីចូលចិត្តធ្វើសង្គ្រាមខ្លាំងណាស់អស់រយៈពេលរាប់សិបសតវត្សរ៍កន្លងមកនេះ ពោលគឺចូលចិត្តធ្វើសង្គ្រាមជិត៣៩ភាគរយច្រើនជាងស្តេច។ការសិក្សារបស់អ្នកវិទ្យាសាស្ត្រ Oeindrila Dube មកពីសាកវិទ្យាល័យ Chicago បានធ្វើការវិភាគលើការសម្រេចចិត្តរបស់របស់ស្តេច និងម្ចាស់ក្សត្រីអឺរ៉ុប ដែលបានគ្រងរាជ្យសម្បត្តិចន្លោះឆ្នាំ១៤៨០និងឆ្នាំ១៩១៣នៃគ.ស ដែលមានស្តេច និងម្ចាស់ក្សត្រីគ្រប់គ្រងរហូតដល់ទៅ១៩៣អង្គ នៅតាមបណ្តាប្រទេសចំនួន១៨។នៅក្នុងអត្ថបទមួយចុះផ្សាយលើទំព័រកាសែត Daily Mail បានឲ្យដឹងថា រយៈពេល៤០០ឆ្នាំនៃប្រវត្តិសាស្ត្រអឺរ៉ុប ម្ចាស់ក្សត្រីគឺចូលចិត្តធ្វើសង្គ្រាមខ្លាំងណាស់ ដែលរួមទាំងម្ចាស់ក្សត្រី Catherine ដែលបានធ្វើឲ្យរុស្ស៊ីក្លាយជាប្រទេសបង្កសង្គ្រាម ម្ចាស់ក្សត្រី Elizabeth I របស់ចក្រភពអង់គ្លេស ដែលបានផ្តួលរំលំកងនាវាអេស្ប៉ាញ Armadaក្នុងឆ្នាំ១៥៨៨ ហើយនិងម្ចាស់ក្សត្រី Isabella I ដែលបានដឹកនាំអេស្ប៉ាញគ្របដណ្តប់ពិភពលោកនអំឡុងសតវត្សរ៍ទី១៥ និងទី១៦។
ក្រុមអ្នកស្រាវជ្រាវរកឃើញថា ជាង១៩៣រជ្ជកាលគ្រប់គ្រងដោយម្ចាស់ក្សត្រី គឺស្មើនឹង៣៩ភាគរយច្រើនចូលចិត្តធ្វើសង្គ្រាមជាងស្តេច។ មិនត្រឹមតែប៉ុណ្ណោះនោះទេ ក្រុមអ្នកស្រាវជ្រាវ បានរកឃើញទៀតថា រដ្ឋដែលគ្រប់គ្រងដោយម្ចាស់ក្សត្រី ច្រើនតែធ្លាក់នៅក្នុងជម្លោះ និងសង្គ្រាម ជាជាងរដ្ឋដែលដឹកនាំដោយស្តេច៕
