រដ្ឋធានីកៀវ៖ ជាមួយនឹងសង្គ្រាម អស់រយៈពេលជាង២៣០ថ្ងៃកន្លងមកនេះ មានសេចក្ដីរាយការណ៍ ពីមន្ដ្រីក្រុងកៀវ អះអាង ពីទាហានរុស្ស៊ី បានស្លាប់ នៅលើសមរភូមិប្រយុទ្ធ កាលពីម្សិលមិញ មានចំនួនកើនឡើង រហូតដល់៥០០នាក់។
សារព័ត៌មាន Ukrinform បានចេញផ្សាយ កាលពីថ្ងៃសុក្រ ទី១៤ ខែតុលា ថា អគ្គសេនាធិការកងទ័ពអ៊ុយក្រែន បានបង្ហោះ នៅលើទំព័របណ្ដាញសង្គមហ្វេសប៊ុករបស់ខ្លួន ថា កម្លាំងការពារទឹកដីរបស់ក្រុងកៀវ បានសម្លាប់ទាហានរុស្ស៊ី កើនឡើង ដល់៦៤ ៣០០នាក់ ដោយរាប់បញ្ចូលទាំងការស្លាប់ថ្មី កាលពីម្សិលមិញ ចំនួន៥០០នាក់ផង។ ចំនួនទាហានរុស្ស៊ី បាតបង់បង់ទាំងនេះ គឺគិតចាប់តាំងពីការផ្ទុះសង្គ្រាម នាថ្ងៃទី២៤ ខែកុម្ភៈ រហូតមកដល់ថ្ងៃទី១៤ ខែតុលា។
ក្រៅពីការបាត់បង់កងទ័ពនោះ រុស្ស៊ី ក៏បានខូចខាតគ្រឿងយុទ្ធោបករណ៍ជាច្រើនបន្ថែមទៀត រួមមាន រថក្រោះ ចំនួន ២ ៥២១គ្រឿង, រថពាសដែក ចំនួន ៥ ១៧២គ្រឿង, ប្រព័ន្ធបាញ់កាំភ្លើងធំ ចំនួន ១ ៥៦៦គ្រឿង, ប្រព័ន្ធបាញ់គ្រាប់រ៉ុក្កែត MLRS ចំនួន៣៦២គ្រឿង, ប្រព័ន្ធការពារប្រឆាំងនឹងយន្ដហោះ ចំនួន ១៨៦គ្រឿង, យន្ដហោះចម្បាំង ២៦៨គ្រឿង, ឧទ្ធម្ភាគចក្រ ចំនួន ២៤០គ្រឿង, គ្រូសមីស៊ីល ចំនួន ៣១៦ដើម, នាវាចម្បាំងតូចធំ ១៦គ្រឿង, យានយន្ដដឹកសាំង ៣ ៩៤៤គ្រឿង និង សម្ភារសឹកផ្សេងៗទៀត។
ទោះជាយ៉ាងណា សេចក្ដីរាយការណ៍នេះ នៅមិនទាន់មានប្រភពឯករាជ្យណាមួយ បញ្ជាក់ ជុំវិញការអះអាងរបស់អ៊ុយក្រែន អំពីការសម្លាប់ទាហាន និង កម្ទេចគ្រឿងយុទ្ធោបករណ៍របស់រុស្ស៊ី នៅឡើយ។ ដោយឡែក ក្រុងមូស្គូ ក៏នៅមិនទាន់មានប្រតិកម្មភ្លាមៗ អំពីការលើកឡើង ពីមន្ដ្រីក្រុងកៀវ នោះដែរ៕
