រាជធានីបាងកក៖ ស្របពេលតុលាការធម្មនុញ្ញ និង សភាទាំង២របស់ប្រទេសថៃ កាលពីថ្ងៃពុធ បានអនុវត្ដនីតិវិធីរៀងៗខ្លួនព្រមគ្នា នៅក្នុងថ្ងៃតែមួយ ដកហូតឋានៈសមាជិកសភាពីមេដឹកនាំគណបក្សឆ្ពោះទៅមុខ ហើយបិទផ្លូវគាត់ ធ្វើដំណើរឆ្ពោះទៅកាន់កាប់តំណែងនាយករដ្ឋមន្ដ្រី នោះមក ប្រជាជនថៃយ៉ាងច្រើន បានប្រមូលផ្ដុំគ្នា នៅទីលានប្រជាធិបតេយ្យ ហើយរិះគន់យ៉ាងខ្លាំង ដល់ស្ថាប័នទាំងនេះ។
សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃព្រហស្បតិ៍ ទី២០ ខែកក្កដា ថា ក្រុមបាតុករ រាប់ពាន់នាក់ កាលពីរាត្រី ថ្ងៃពុធ បានប្រមូលផ្ដុំគ្នា នៅទីលានប្រជាធិបតេយ្យ បញ្ចេញកំហឹងរបស់ពួកគេ ប្រឆាំងនឹងការរារាំងលោក ភីថា លីមចារឿនរ៉ាត (Pita Limjaroenrat) ប្រធានគណបក្សឆ្ពោះទៅមុខ (Move Forward Party) ហៅកាត់ MFP សម្រាប់ការឈរឈ្មោះ ជានាយករដ្ឋមន្ត្រី នៅក្នុងការបោះឆ្នោតជុំទី២របស់សភា។
ការប្រមូលផ្តុំគ្នាតវ៉ា ដោយសន្តិវិធីដ៏ធំនេះ បានធ្វើឡើង បន្ទាប់ពីថ្ងៃដ៏គួរឱ្យភ្ញាក់ផ្អើល នៅក្នុងសភា ខណៈលោក ភីថា បានបាត់បង់ឋានៈ ជាសមាជិកសភា ក្រោយពេលតុលាការធម្មនុញ្ញបានបញ្ជាឱ្យផ្អាក ជាបណ្ដោះអាសន្ន ដោយរង់ចាំការសម្រេចជាក្រោយ។ លុះពេលគាត់បានដើរពីសភារួចមក សមាជិកសភា និង ព្រឹទ្ធសភា មានទំនោរទៅរកក្រុមអភិក្សយោធានិយម បានបោះឆ្នោត មិនអនុញ្ញាតឱ្យគាត់ ត្រូវតែងតាំង ជានាយករដ្ឋមន្ត្រី សម្រាប់ការបោះឆ្នោត នៅជុំទី២។
ស្របគ្នានេះដែរ ក៏មានហ្វូងមនុស្សមួយចំនួន បានប្រមូលផ្តុំគ្នា នៅជិតសភា នាថ្ងៃពុធ ហើយពួកគេបានធ្វើដំណើរទៅកាន់វិមានប្រជាធិបតេយ្យ នៅវេលាម៉ោងប្រហែល៥ល្ងាច នាថ្ងៃដដែលនោះ។ ក្រុមបាតុករ បានកាន់បដាក្រណាត់ធំ សរសេរ ថា នាយករដ្ឋមន្ត្រី លោក ភីថា ជាឆន្ទៈរបស់ប្រជាជន។
ក្រុមបាតុករខ្លះ បានអះអាង ថា តុលាការធម្មនុញ្ញ កំពុងតែក្លាយជាយន្ដការ សម្លាប់រដ្ឋាភិបាល ដែលបានកើត ចេញពីលទ្ធិប្រជាធិបតេយ្យ។ ដោយឡែក ក្រុមអ្នកធ្វើរដ្ឋប្រហារយោធា បែរជាត្រូវដើរលេងដោយសេរី។ ចាប់ពីពេលនេះតទៅ យើងត្រូវតែបន្តនូវការតស៊ូតមិតគ្រប់ទម្រង់ ពោលគឺដើរទៅគោះតាមទ្វារផ្ទះរបស់សមាជិកព្រឹទ្ធសភា ឬ ចុចកណ្ដឹងនៅផ្ទះរបស់ពួកគេ ដើម្បីក្រើនរំឭកដល់សមាជិសភាទាំងនោះ ត្រូវតែដឹងគុណ ចំពោះជាតិមាតុភូមិ ហើយបង្វែរអារម្មណ៍ មករកស្លឹកឈើថ្មីៗវិញ»។
ពាណិជ្ជកម្ម
លោក អាណុន ណាមផា (Anon Nampa) មេធាវីសិទ្ធិមនុស្ស រួមនឹងក្រុមសកម្មជនគាំទ្រលទ្ធិប្រជាធិបតេយ្យផ្សេងៗទៀត បានជំរុញឱ្យក្រុមបាតុករ ធ្វើជាសាក្សី ធានា ថា គណបក្សភឿថៃ ឥឡូវនេះ កំពុងតែប៉ុនប៉ង បង្កើតរដ្ឋាភិបាល មិនត្រូវក្បត់ជាមួយនឹងប្រជាជន ងាកទៅចូលរួមជាមួយគណបក្សផ្សេងទៀត ដែលខ្លួនកំពុងតែប្រឆាំងនោះឡើយ។ ស្របគ្នានេះដែរ ក្រុមបាតុករ ក៏បានធ្វើពិធីបុណ្យសពរបស់សមាជិកព្រឹទ្ធសភា ដែលត្រូវបានតែងតាំងដោយពួកយោធា ដាក់ពេញមឈូស និង ធ្វើពិធីបូជាសព។
ក្រុមបាតុករ បានអានសេចក្តីថ្លែងការណ៍មួយ ដោយបានគូសបញ្ជាក់ អំពីការទាមទាររបស់ពួកគេ ចំនួន៣ចំណុច រួមមាន៖ ១-សមាជិកព្រឹទ្ធសភា ត្រូវតែលាលែងពីតំណែង ២-គណបក្សទាំង៨ស្ថិតក្នុងសម្ពន្ធភាពត្រូវរួមគ្នាជាធ្លុងមួយ និង ៣-សម្ពន្ធភាពគណបក្សទាំង៨មិនត្រូវបោះបង់ចោលនូវសំណើគោលនយោបាយ ដែលបានសន្យាជាមួយនឹងប្រជាពលរដ្ឋ។
ក្រោយការខកខាត មិនបានបោះឆ្នោត ជ្រើសរើសនាយករដ្ឋមន្ដ្រីថ្មី នៅថ្ងៃពុធ ទី១៩ ខែកក្កដានោះ សភារបស់ប្រទេសថៃ នឹងត្រូវបន្ដនីតិវិធីរបស់ខ្លួន ជ្រើសរើសតំណែងកំពូលរបស់ស្ថាប័ននីតិប្រតិបត្ដិមួយនេះ នៅថ្ងៃទី២៧ ខែកក្កដា ខាងមុខ៕