កាលពីពេលថ្មីៗនេះ មានយន្ដហោះដឹកអ្នកដំណើរមួយគ្រឿង របស់ក្រុមហ៊ុនអាកាសចរណ៍ Bek Air ដែលមានមនុស្ស ១០០ នាក់នៅលើយន្ដហោះ បានធ្លាក់នៅជិតទីក្រុងអាល់ម៉ាទី ប្រទេសកាហ្សាក់ស្ថាន។ Sputnik ចេញផ្សាយនៅថ្ងៃទី២៧ ខែធ្នូ ឆ្នាំ២០១៩ នេះ ។
អាជ្ញាធរកាហ្សាក់ស្ថានបានបញ្ជាក់ប្រាប់អ្នកសារព័ត៌មាននានាថាយន្តហោះរបស់អាកាសចរណ៍ Bek Air មួយនេះត្រូវបានគេមើលឃើញថា បានធ្លាក់ចំពីលើអគារកម្ពស់ ០២ជាន់ដែលស្ថិតនៅក្បែរអាកាសយានដ្ឋាន ក្រោយការព្យាយាមហោះឡើងខុសបច្ចេកទេស។
យន្ដហោះខាងលើមានគោលដៅចេញដំណើរពីទីក្រុង Almaty ឆ្ពោះទៅកាន់រដ្ឋធានី ណួរស៊ុលតាន់ (Nur-Sultan) នៃប្រទេសកាហ្សាក់ស្ថាន ប៉ុន្តែស្រាប់តែបាត់ចេញពីប្រព័ន្ធរ៉ាដា ក្រោយហោះឡើងបន្តិច ហើយភ្លាមៗមិនទាន់មានការបញ្ជាក់ពីមូលហេតុធ្លាក់នៅឡើយទេ ខណៈព័ត៌មានបឋមអះអាងថា យន្ដហោះនេះមានបញ្ហាពេលហោះឡើង ។
គួរបញ្ជាក់ដែរថា ចំពោះមូលហេតុពិតនៃការធ្លាក់យន្តហោះខាងលើនេះគេនៅពុំទាន់បញ្ជាក់យ៉ាងណានៅឡើយទេ កំពុងស្ថិតនៅក្នុងការស៊ើបអង្គេត ។