រាជធានីបាងកក៖ មេបក្សប្រឆាំងឈ្នះឆ្នោត នៅក្នុងប្រទេសថៃ ក្រោយដឹងខ្លួន អំពីឋានៈជាសមាជិកសភារបស់ខ្លួន ត្រូវបានតុលាការធម្មនុញ្ញរបស់ប្រទេសថៃ ព្យួរជាបណ្ដោះអាសន្ន ក៏បានដើរចេញពីវិមានរដ្ឋសភា ទាំងភាពអង់អាចក្លាហាន និង ពោលពាក្យដ៏ចាក់ដោតបំផុត ទៅកាន់សមាជិកសភាទាំងអស់ ហើយវាជាសម្ដីអូសទាញបេះដូងរបស់ប្រជាជាតិផងដែរ។
សារព័ត៌មានរបស់ថៃ The Nation បានចេញផ្សាយ កាលពីព្រឹក ថ្ងៃព្រហស្បតិ៍ ទី២០ ខែកក្កដា ឆ្នាំ២០២៣ ថា ដោយសារតែដឹង ថា ឋានៈជាសមាជិកសភារបស់ខ្លួន ត្រូវបានតុលាការធម្មនុញ្ញ រួចមក លោក ភីថា លីមចារឿនរ៉ាត (Pita Limjaroenrat) ប្រធានគណបក្សឆ្ពោះទៅមុខ (Move Forward Party) ហៅកាត់ MFP ក៏បានគោរពតាមសេចក្ដីសម្រេចនោះ។ ភ្លាមៗនោះ គាត់បានដើរចេញ ពីវិមានរដ្ឋសភា កាលពីថ្ងៃពុធ។ ប៉ុន្ដែមេបក្សប្រឆាំងឈ្នះឆ្នោតរូបនេះ បានជំរុញទៅដល់សមាជិកសភាទាំងអស់ ត្រូវតែមើលថៃទាំប្រជាជនថៃ។
មេបក្សឈ្នះឆ្នោត វ័យ៤២ឆ្នាំរូបនេះ បានថ្លែងទៅកាន់សភាទាំង២ ថា គាត់នឹងគោរពតាមការសម្រេចរបស់តុលាការធម្មនុញ្ញ។ សកម្មភាពរបស់គាត់ បានកើតឡើង ស្របពេលសមាជិកសភា នៅតែកំពុងតែជជែកវែក ដេញដោលគ្នាដ៏តានតឹង ថាតើលោក ភីថា អាចនឹងត្រូវតែងតាំង ជាបេក្ខជននាយករដ្ឋមន្ត្រី សម្រាប់ការបោះឆ្នោតរបស់សភា ជាលើកទី២ដែរឬយ៉ាងណានោះ។ ប៉ុន្ដែ ភ្លាមៗនោះ គាត់ក៏បានដើរចេញ ពីវិមានរដ្ឋសភា ទាំងភាពអង់អាចក្លាហានបំផុត។
ចៅក្រមចំនួន៧រូប នៅក្នុងចំណោមចៅក្រមរបស់តុលាការធម្មនុញ្ញ ទាំង៩រូប បានសម្រេចព្យួរជាបណ្ដោះអាសន្ន សម្រាប់ឋានៈសមាជិកសភារបស់លោក ភីថា កាលពីថ្ងៃពុធ (ទី១៩ ខែកក្កដា) ស្របពេលស្ថាប័នកំពូលមួយនេះ កំពុងតែពិភាក្សាដេញដោលគ្នា ទៅលើការចោទប្រកាន់ អំពីការកាន់កាប់ភាគហ៊ុនរបស់គាត់ នៅក្នុងក្រុមហ៊ុន iTV ដែលលែងដំណើរការជាប្រព័ន្ធផ្សព្វផ្សាយ អស់រយៈពេលជាយូរមកហើយនោះ។ ការសម្រេចចិត្តបែបនេះ បានកើតឡើង ក្រោយពេលគណៈកម្មការរៀបចំការបោះឆ្នោតរបស់ប្រទេសថៃ បានលើកយកករណីនេះ ប្ដឹងទៅតុលាការធម្មនុញ្ញ និង ផ្ដល់អនុសាសន៍ឲ្យដកហូតឋានៈសមាជិកសភារបស់លោក ភីថា។
លោក ភីថា លីមចារឿនរ៉ាត ប្រធានគណបក្សឆ្ពោះទៅមុខ បានថ្លែង នៅមុនពេលគាត់បានដើរចេញ ពីវិមានរដ្ឋសភា ថា «ខ្ញុំសូមឆ្លៀតយកឱកាសនេះ លាដល់សមាជិក សមាជិកាសភា ហើយខ្ញុំសង្ឃឹម ថា យើងនឹងជួបគ្នាជាថ្មី»។
នៅមុនការចាកចេញនោះ លោក ភីថា ថ្លែងជាមួយនឹងសម្ដីដ៏មានន័យបំផុត ដោយបានស្នើសុំដល់តំណាងរាស្ដ្រទាំងអស់ ត្រូវតែប្រើប្រាស់ប្រព័ន្ធសភា មើលថែទាំងប្រជាជន ខណៈអវត្ដមានរបស់គាត់។ បន្ថែមពីលើនេះ មេបក្សប្រឆាំងឈ្នះឆ្នោត រូបនេះ បានក្រើនរំឭក ដល់សមាជិកសភាទាំងអស់ ថា «ប្រទេសថៃ បានផ្លាស់ប្ដូរ ចាប់តាំងពីការបោះឆ្នោត នៅថ្ងៃទី១៤ ខែឧសភា មកម្ល៉េះ»។
ក្រោយពេលថ្លែងលា ទៅកាន់សមាជិក សមាជិកាសភារួចមក លោក ភីថា ក៏បានទាញយកប័ណ្ណសមាជិកសភារបស់គាត់ ចេញពីខ្លួន រួចហើយដាក់លើតុ នៅមុនពេលគាត់បានដើរចេញ ជាមួយនឹងសំឡេងទះដៃយ៉ាងខ្លាំង លាន់ឮពេញវិមានរដ្ឋសភា។
លោកមេបក្សឆ្ពោះទៅមុខ រូបនេះ បានបញ្ជាក់ នៅលើបណ្ដាញសង្គម Instagram នៅមុននេះ ថា «ប្រព័ន្ធបច្ចុប្បន្ន ច្បាស់ណាស់ ថា ខ្ញុំពិតជាមិនអាច យកឈ្នះលើបេះដូងរបស់អ្នកទាំងអស់ ដើម្បីឲ្យមានចំនួនគ្រប់គ្រាន់ សម្រាប់ការបោះជំហានឆ្ពោះទៅមុខ ដឹកនាំប្រទេសជាតិបាន នាពេលនេះឡើយ ហើយប្រហែលជាមិនគ្រប់គ្រាន់ សម្រាប់ការស្នើឈ្មោះរបស់ខ្ញុំ នៅក្នុងជុំទីពីរ សម្រាប់ការបោះឆ្នោតជ្រើសរើសនាយករដ្ឋមន្ត្រី »។
សមាជិកសភា និង ព្រឹទ្ធសភា បានចំណាយពេលជាច្រើនម៉ោង សម្រាប់ការពិភាក្សាដេញដោលគ្នាដ៏តានតឹង ថាតើការតែងតាំងបេក្ខភាពនាយករដ្ឋមន្ដ្រីថៃ នឹងត្រូវអនុញ្ញាតឱ្យប្តូរឈ្មោះរបស់លោក ភីថា សម្រាប់ការបោះឆ្នោតជុំទី២ ស្របពេលបទប្បញ្ញត្តិរបស់សភា ហាមឃាត់នូវការតែងតាំងឡើងវិញ សម្រាប់អ្នកបានរងបរាជ័យ នៅក្នុងការបោះឆ្នោតលើកទី១ នៅក្នុងសម័យប្រជុំសភា៕