…ម្យ៉ាងដែរក្នុងរយៈពេលប៉ុន្មានថ្ងៃចុងក្រោយមកនេះពិភពលោកយើងបានកើតមាននូវរឿងរ៉ាវសង្គ្រឺតធ្មេញដាក់គ្នារវាងប្រទេសមួយទៅប្រទេសមួយ…ដូចជាអាមេរិកជាមួយអ៊ីរ៉ង ឯឥណ្ឌូនេស៊ីក៏បានក្អកគ្រហែមដាក់ចិនដែរ។កាលពីថ្ងៃអង្គារទី០៧មករា កងទ័ពអាកាសឥណ្ឌូនេស៊ី បានបញ្ជូនយន្តហោះប្រយុទ្ធ៤គ្រឿងទៅកាន់ព្រំដែនសមុទ្រចិនខាងត្បូង ក្នុងការប្រឈមមុខជាមួយចិនប៉េកាំង បន្ទាប់ពីរដ្ឋាភិបាលក្រុងហ្សាការតាតវ៉ាប្រឆាំងនឹងវត្តមាននាវារដ្ឋាភិបាលនិងទូកនេសាទចិននៅក្នុងដែនទឹកដែលឥណ្ឌូនេស៊ីអះអាងថាជាតំបន់សេដ្ឋកិច្ចផ្តាច់មុខរបស់ខ្លួន។ការប្រឈមមុខគ្នានេះបានចាប់ផ្តើមឡើងកាលពីពាក់កណ្តាលខែធ្នូឆ្នាំមុន នៅពេលនាវាឆ្មាំសមុទ្រចិនមួយបានអមការពារទូកនេសាទចិនជាច្រើននៅក្នុងដែនទឹកនៅឯនាយឆ្នេរកោះណាតូណារបស់ឥណ្ឌូនេស៊ី ជាហេតុនាំអោយឥណ្ឌូនេស៊ីកោះហៅឯកអគ្គរដ្ឋទូតចិនមកស្តាប់ការតវ៉ា។
អ្នកនាំពាក្យក្រសួងការបរទេសចិន លោកហ្កេង សួង បាននិយាយកាលពីថ្ងៃ៧មករាថា រដ្ឋាភិបាលចិនបាន«បើកចំហបណ្តាញការទូត»ជាមួយឥណ្ឌូនស៊ី ចាប់តាំងពីមានឧបទ្ទវហេតុចុងក្រោយនេះនិងថា«ប្រទេសទាំងពីរគួររួមគ្នាទទួលខុសត្រូវចំពោះការថែរក្សាសន្តិភាពនិងស្ថិរភាពតំបន់»។កាលពីសប្តាហ៍មុន លោកហ្កេង សួង ក៏បាននិយាយថា ចិនបានមានអធិបតេយ្យភាពលើប្រជុំកោះស្ព្រ៉ាតលីនិងដែនទឹករបស់វា ហើយទាំងចិននិងឥណ្ឌូនេស៊ីមានសកម្មភាពនេសាទជាធម្មតានៅទីនោះ។កោះណាតូណា ស្ថិតនៅភាគនិរតីនៃប្រជុំកោះស្ព្រ៉ាតលី។តែប្រធានាធិបតីឥណ្ឌូនេស៊ី បាននិយាយក្នុងកិច្ចប្រជុំគណៈរដ្ឋមន្ត្រីកាលពីថ្ងៃចន្ទទី៦មករាថា «នឹងមិនមានការចរចាទេនៅពេលវាពាក់ព័ន្ធនឹងអធិបតេយ្យភាពរបស់យើង»។ចំណែករដ្ឋមន្ត្រីសម្របសម្រួលក្នុងគណៈរដ្ឋមន្ត្រីដែលទទួលបន្ទុកគ្រប់គ្រងប្រភពធនធាននិងការវិនិយោគ បានប្រាប់អ្នកយកព័ត៌មាន ថា អធិបតេយ្យភាពរបស់ឥណ្ឌូនេស៊ីមិនអាចចរចាបានទេ ទោះជាចិនមានសារៈសំខាន់ចំពោះសេដ្ឋកិច្ចឥណ្ឌូនេស៊ីយ៉ាងណាក្តី។អាជ្ញាធរក្រុងហ្សាការតាបានអោយដឹងថា ឥណ្ឌូនេស៊ីបានបញ្ជូននាវាចម្បាំងជាច្រើនគ្រឿងនិងទូកនេសាទ១២០គ្រឿងទៅល្បាតនៅសមុទ្រមានការប្រទាញប្រទង់នេះ។
ហ្វាចា អាឌ្រីយ៉ាន់តូ អ្នកនាំពាក្យកងកម្លាំងអាកាស បាននិយាយថាយន្តហោះF-16ចំនួន៤គ្រឿងបានហោះពីលើកោះ តែលោកបាននិយាយសម្រាលអំពីការប្រឈមមុខណាមួយជាមួយចិនដោយថា«ពួកវាគ្រាន់តែហោះល្បាតដើម្បីការពារតំបន់អធិបតេយ្យភាពរបស់យើង។យើងមិនបានបញ្ជាអោយធ្វើសង្គ្រាមជាមួយចិនទេ»៕
