រដ្ឋធានីកៀវ៖ នៅក្នុងអំឡុងយុទ្ធនាការវាយបករបស់ក្រុងកៀវ នោះ កងទ័ពការពារទឹកដីរបស់អ៊ុយក្រែន កាលពីថ្ងៃអាទិត្យ បានរាយការណ៍ អំពីការធ្វើបច្ចុប្បន្នភាពចំពោះការខូចខាតរបស់រុស្ស៊ី នៅក្នុងរយៈពេល២៤ម៉ោងកន្លងមកនេះ ដោយក្រុងមូស្គូ បានបាត់បង់កងទ័ព ចំនួន៦០០នាក់ និង គ្រឿងយុទ្ធភណ្ឌជាច្រើន មានជាអាទិ៍ រថក្រោះ ចំនួន៤គ្រឿង រថពាសដែកចំនួន១១គ្រឿង ប្រព័ន្ធកាំភ្លើងផ្លោង ចំនួន២០គ្រឿង ប្រព័ន្ធបាញ់គ្រាប់រ៉ុក្កែត ចំនួន៧គ្រឿង ប្រព័ន្ធការពារដែនអាកាសចំនួន៣គ្រឿង និង ដ្រូនចំនួន១៩គ្រឿង។
សារព័ត៌មានរបស់សហរដ្ឋអាមេរិក Newsweek បានចេញផ្សាយ កាលពីថ្ងៃអាទិត្យ ទី៩ ខែកក្កដា ដោយដកស្រង់ប្រភពពីអគ្គសេនាធិការកងទ័ពអ៊ុយក្រែន បានអះអាង ថា រុស្ស៊ី បានបាត់បង់ទាហាន ចំនួន ២៣៤ ០៤០នាក់ គិតចាប់តាំងពីថ្ងៃទី២៤ ខែកុម្ភៈ ឆ្នាំ២០២២ រហូតមកដល់ថ្ងៃទី៩ ខែកក្កដា ឆ្នាំ២០២៣ ។ ក្រៅពីនេះ គ្រឿងចម្បាំងរបស់រុស្ស៊ី ត្រូវបានកម្ទេច នៅលើសមរភូមិ មានតម្លៃរាប់ពាន់លានដុល្លារអាមេរិក មានដូចជា យន្ដហោះចម្បាំង ចំនួន៣១៥គ្រឿង, ឧទ្ធម្ភាគចក្រចម្បាំង ចំនួន៣០៩គ្រឿង, នាវាចម្បាំងតូចធំ ចំនួន១៨គ្រឿង, រថក្រោះ ចំនួន ៤០៧៨គ្រឿង, រថពាសដែក ចំនួន ៧៩៦៤គ្រឿង, ប្រព័ន្ធកាំភ្លើងផ្លោង ចំនួន ៤៣៦៦គ្រឿង, ប្រព័ន្ធបាញ់គ្រាប់រ៉ុក្កែតចម្រុះ ចំនួន៦៦៨គ្រឿង, ប្រព័ន្ធការពារប្រឆាំងនឹងយន្ដហោះចំនួន៤១៣គ្រឿង , រថយន្ដយោធា និង រថយន្ដដឹកប្រេង ចំនួន ៦ ៩២៩គ្រឿង, ដ្រូន ចំនួន ៣ ៦៨៥គ្រឿង, គ្រឿងចក្រពិសេស ចំនួន៦២៨គ្រឿង និង មីស៊ីលគ្រូស ចំនួន ១២៧១ដើម។
ដោយឡែក ក្រសួងការពារជាតិរុស្ស៊ី បានបញ្ជាក់ នៅក្នុងការធ្វើបច្ចុប្បន្នភាពរបស់ខ្លួន កាលពីថ្ងៃអាទិត្យ ថា កងទ័ពអ៊ុយក្រែន បានបាត់បង់រថក្រោះ និង រថពាសដែក ចំនួន ១០ ៦០៤គ្រឿង។
សេចក្ដីរាយការណ៍របស់ភាគីជម្លោះទាំង២នេះ បានកើតឡើង ស្របពេលរដ្ឋាភិបាលក្រុងកៀវ បានប្រារព្ធទិវាទី៥០០ នៃសង្គ្រាមទ្រង់ទ្រាយធំ ប្រឆាំងនឹងរុស្ស៊ី។ ភាគីជម្លោះទាំង២ បានបាត់បង់គ្រឿងយុទ្ធភណ្ឌយ៉ាងច្រើន នៅក្នុងសង្គ្រាមឈ្លានពានរបស់ក្រុងមូស្គូ។
បើទោះជាយ៉ាងណាក៏ដោយ របាយការណ៍ទាំងនេះ គ្រាន់តែជាការអះអាងរបស់ភាគីអ៊ុយក្រែន និង រុស្ស៊ី តែប៉ុណ្ណោះ ប៉ុន្ដែមិនមានប្រភពឯករាជ្យណាមួយ បញ្ជាក់នោះឡើយ។ ភាគីជម្លោះទាំង២ តែងតែលាក់បាំង អំពីតួលេខគ្រោះថ្នាក់របស់កងទ័ពខ្លួន ស្លាប់ និង រងរបួស៕