ទិន្នន័យថ្មីបញ្ចេញដោយរដ្ឋាភិបាលម៉ិកស៊ិកកាលពីថ្ងៃចន្ទ បានបង្ហាញថា មនុស្សជាង៦ម៉ឺននាក់ បានបាត់ខ្លួន ចាប់តាំងពីសង្គ្រាមគ្រឿងញៀនកាលពីឆ្នាំ២០០៦រហូតមក។ក្រោមរដ្ឋបាលរបស់អតីតប្រធានាធិបតី Felipe Calderón ប្រទេសម៉ិកស៊ិក បានបើកការវាយប្រហារមកលើក្រុមជួញដូរគ្រឿងញៀន និងក្រុមឧក្រិដ្ឋជនផ្សេងទៀតនៅក្នុងឆ្នាំ២០០៦ ដោយបានបញ្ជូនទាហានសហព័ន្ធ ទៅបោសសំអាតរដ្ឋ Michoacan របស់លោក។ការបោសសំអាតឧក្រិដ្ឋជនគ្រឿងញៀននេះហើយ បានធ្វើឲ្យមនុស្សស្លាប់ជាង២០ម៉ឺននាក់ ក្នុងនោះលោកប្រធានាធិបតិ Andrés Manuel López Obrador បានទម្លាក់កំហុសនេះមកលើអ្នកឡើងកាន់តំណែងមុនរបស់លោក សម្រាប់ការសម្លាប់រង្គាលមួយនេះ។
ទិន្នន័យចាប់តាំងពីឆ្នាំ១៩៦៤មក បង្ហាញថា មនុស្សសរុប១៤៧.០៣៣នាក់ ត្រូវបានគេរាយការណ៍ថាបានបាត់ខ្លួននៅក្នុងប្រទេសមួយនេះ ហើយក្រុមអាជ្ញាធរ បានប្រទះឃើញសាកសពមនុស្ស៨៥.៣៩៦នាក់។នៅក្នុងចំណោមមនុស្សបាត់ខ្លួន៦១.៦៣៧នាក់ មនុស្ស៦០.០៥៣នាក់ បានបាត់ខ្លួន ចាប់តាំងពីឆ្នាំ២០០៦រហូតមក។លោក Karla Quintana គឺជាប្រធានការិយាល័យអត្រានុកូលដ្ឋានជាតិមនុស្សបាត់ខ្លួន បាននិយាយប្រាប់សន្និសីទកាសែតថា ទិន្នន័យផ្លូវការ នៃមនុស្សបាត់ខ្លួនចាប់តាំងពីឆ្នាំ១៩៦៤មក គឺមានចំនួន៦១.៦៣៧នាក់។ទិន្នន័យនេះដែរ បានបង្ហាញថា នៅក្នុងចំណោមជនរងគ្រោះទាំងអស់ មានកុមារ១១.០៧២នាក់ ហើយ២៥.៧ភាគរយបន្ថែមទៀតនៃអ្នកបាត់ខ្លួនគឺជាស្ត្រី។សូមបញ្ជាក់ថា មនុស្សយ៉ាងហោច៩.១៦៤នាក់ ត្រូវបានគេរាយការណ៍ថា បានបាត់ខ្លួននៅក្នុងឆ្នាំ២០១៩ ដែលជាឆ្នាំដំបូងនៃការកាន់អំណាចរបស់លោកប្រធានាធិបតី López Obrador ហើយបច្ចុប្បន្ន ក្រុមអាជ្ញាធរ កំពុងស្វែងរកជនរងគ្រោះនៅសេសសល់៥.១៨៤នាក់ទៀត។
ក្រុមមន្ត្រីបាននិយាយផងដែថា កិច្ចខិតខំថ្នាក់ជាតិ ដើម្បីស្វែងរកមនុស្សបាត់ខ្លួនរាប់ម៉ឺននាក់នៅក្នុងប្រទេសម៉ិកស៊ិក មកទល់នឹងពេលនេះ ពួកគេបានរកឃើញសាកសពមនុស្ស១.១២៤នាក់ នៅក្នុងផ្នូរចំនួន៨៧៣ ប៉ុន្តែពួកគេអាចផ្តល់អត្តសញ្ញាណបានត្រឹមតែ១ភាគ៣នៃសាកសពប៉ុណ្ណោះ អំឡុងការងារ១៣ខែដំបូងរបស់ពួកគេ៕
