រដ្ឋធានីមូស្គូ៖ ស្របពេលកម្លាំងទាហានក្រុងមូស្គូ កំពុងតែទទួលរងបរាជ័យជាបន្ដបន្ទាប់ នៅក្នុងសង្គ្រាមឈ្លានពាន នៅក្នុងប្រទេសអ៊ុយក្រែន នោះ បុរសខ្លាំង នៅរុស្ស៊ី បានចាប់ផ្ដើម ព្រមានដល់ពិភពលោកជាថ្មី អំពីការដើរដល់ទសវត្សរ៍ ប្រកបដោយគ្រោះថ្នាក់ធ្ងន់ធ្ងរ ចាប់តាំងពីសង្គ្រាមលោក លើកទី២មក។
បណ្ដាញទូរទស្សន៍ NBC News បានផ្សាយ កាលពីព្រឹក ថ្ងៃសុក្រ ទី២៨ ខែតុលា ថា លោក វ្ល៉ាឌីមៀ ពូទីន (Vladimir Putin) ប្រធានាធិបតីរុស្ស៊ី កាលពីថ្ងៃព្រហស្បតិ៍ បានព្រមាន ថា ពិភពលោកបានប្រឈមមុខនឹងទសវត្សរ៍ដ៏គ្រោះថ្នាក់បំផុត ចាប់តាំងពីសង្គ្រាមលោកលើកទី២ ខណៈមេដឹកនាំបណ្ដាប្រទេសបស្ចិមលោក ចបានព្យាយាមទប់ស្កាត់ការដួលរលំ ដែលមិនអាចចៀសបាន ពីការគ្រប់គ្រងពិភពលោករបស់សហរដ្ឋអាមេរិក និង សម្ពន្ធមិត្តរបស់ខ្លួន។
ប្រធានាធិបតី លោក វ្ល៉ាឌីមៀ ពូទីន បានបង្ហាញខ្លួនជាសាធារណៈដ៏យូរបំផុតមួយរបស់គាត់ ចាប់តាំងពីគាត់បានបញ្ជូនទាហាន ចូលលុកលុយ នៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈមក។ លោក ពូទីន បានផ្តល់សញ្ញា ថា គាត់មិនសោកស្តាយ ចំពោះអ្វីដែលគាត់ហៅថា «ប្រតិបត្តិការពិសេស» នោះដែរ។
មេដឹកនាំវិមានក្រឹមឡាំង លោក ពូទីន បានចោទប្រកាន់សហរដ្ឋអាមេរិក ពីការញុះញង់នាំឱ្យមានជម្លោះ នៅក្នុងប្រទេសអ៊ុយក្រែន។ លោក ពូទីន បានបន្ថែមថា លោកខាងលិច កំពុងតែលេង អ្វីដែលគាត់ហៅថា ជាការដើរតួជាល្បែងភូមិសាស្ត្រនយោបាយ ប្រកបដោយ «គ្រោះថ្នាក់ បង្ហូរឈាម និង ជាទង្វើដ៏កខ្វក់» កំពុងតែសាបព្រោះនូវភាពវឹកវរ នៅទូទាំងពិភពលោក។
មេដឹកនាំវិមានក្រឹមឡាំង រូបនេះ បានព្យាយាម បង្ហាញ អំពីភាពត្រឹមត្រូវ ចំពោះការលុកលុយរបស់រុស្ស៊ី ទៅលើប្រទេសអ៊ុយក្រែន ដែលជាសកម្មភាពមួយ ធ្វើឱ្យប្រទេសរបស់គាត់ ត្រូវនៅឯកោ ពីឆាកអន្តរជាតិ។ ប៉ុន្ដែនៅក្នុងចំណោមប្រទេស១៩៣ នៃមហាសន្និបាត អង្គការសហប្រជាជាតិ មានប្រទេសចំនួន១៤៣ រួមទាំង ប្រទេសអារ៉ាប៊ីសាអូឌី ជាសម្ពន្ធមិត្តដ៏យូរលង់ណាស់មកហើយជាមួយនឹងក្រុងមូស្គូ កាលពីថ្ងៃទី១២ ខែតុលា បានបោះឆ្នោតថ្កោលទោសរុស្ស៊ី ជុំវិញការកាត់យកតំបន់ចំនួន៤របស់អ៊ុយក្រែន មកធ្វើជាទឹកដីរបស់ខ្លួន។
ដោយឡែក ប្រទេសដែលបានបោះឆ្នោតប្រឆាំងនឹងការថ្កោលទោសនេះ មានតែ៥ប៉ុណ្ណោះ រួមទាំងរុស្ស៊ី ខ្លួនឯងផង និង ប្រទេសជាសម្ពន្ធមិត្ដចំនួន៤ទៀត មានដូចជា បេឡារុស (Belarus), នីការ៉ាហ្គ័រ (Nicaragua), កូរ៉េខាងជើង (North Korea) និង ស៊ីរី (Syria) ។ សូម្បីតែប្រទេសចិន ឥណ្ឌា និង អាហ្វ្រិកខាងត្បូង ...ជាដើម ក៏ស្ថិតក្នុងចំណោមប្រទេសចំនួន៣៥ ដែលបោះឆ្នោតអនុបវាទ។
ប្រធានាធិបតី លោក វ្ល៉ាឌីមៀ ពូទីន ក៏បានចោទប្រកាន់ដល់បស្ចិមលោក (បច្ឆិមលោក) អំពីការបង្កាច់បង្ខូចនុយក្លេអ៊ែរ ប្រឆាំងនឹងរុស្ស៊ី ដើម្បីបង្ខំសម្ពន្ធមិត្ត ឱ្យងាកចេញពីក្រុងម៉ូស្គូ។ ប្រទេសមហាអំណាចលោកខាងលិច បានបរិហារដល់ការគំរាមកំហែង អំពីការប្រើប្រាសអាវុធនុយក្លេអ៊ែរដ៏អាថ៌កំបាំង កាលពីពេលថ្មីៗនេះ បង្កឡើង ដោយវិមានក្រឹមឡាំង។
សម្ពន្ធមិត្តយោធារបស់អង្គការសន្ធិសញ្ញាអាត្លង់ទិកខាងជើង (ណាតូ ឬ អូតង់) កាលពីដើមសប្ដាហ៍នេះ បានថ្កោលទោស ដល់ការអះអាង ដោយគ្មានហេតុផល ពីរុស្ស៊ី ដែលបានលើកឡើង ថា អ៊ុយក្រែន អាចនឹងប្រើប្រាស់ «គ្រាប់បែកកខ្វក់» ដែលជាគ្រឿងបំផ្ទុះធម្មតា មានផ្ទុកសារធាតុវិទ្យុសកម្ម។ អង្គការសម្ពន្ធមិត្តយោធាដ៏ខ្លាំងក្លារបស់ពិភពលោកមួយនេះ បានចាត់ទុកការចោទប្រកាន់របស់ក្រុងមូស្គូ ជាលេសមួយ សម្រាប់ការឈានដល់ការប្រើប្រាស់អាវុធនុយក្លេអ៊ែរ ប្រឆាំងនឹងអ៊ុយក្រែន។
លោក ជេនស៍ ស្ដូលថែនប៊ឺគ (Jens Stoltenberg) អគ្គលេខាធិការ អង្គការណាតូ បានសង្កត់ធ្ងន់ ថា សមាជិកសម្ពន្ធមិត្តយោធារបស់អង្គការនេះ បានទាត់ចោលការចោទប្រកាន់របស់រុស្ស៊ី ប្រឆាំងនឹងអ៊ុយក្រែន។ ក្រុងមូស្គូ មិនត្រូវបង្កើតលេសបែបនេះ សម្រាប់ការបង្កើនជម្លោះបន្ថែមទៀត នោះឡើយ។
ប្រធានាធិបតីរុស្ស៊ី លោក ពូទីន ថ្លែងទៅកាន់វេទិកាក្លឹបពិភាក្សាប្រចាំឆ្នាំ Valdai ក្រោយពេលទាហានរបស់ក្រុងមូស្គូ បានទទួលរងបរាជ័យ ជាបន្ដបន្ទាប់ នៅក្នុងប្រទេសអ៊ុយក្រែន ហើយនាំឲ្យមានការផ្ទុះកំហឹង ដែលកំពុងតែកើនឡើង នៅក្នុងប្រទេស ជុំវិញយន្ដការកេណ្ឌទ័ពមួយផ្នែក មានចំនួន ៣សែននាក់ សម្រាប់ជួយដល់កិច្ចខិតខំប្រឹងប្រែង នៅក្នុងការធ្វើសង្គ្រាមរបស់លោក ពូទីន ។ មេដឹកនាំវិមានក្រឹមឡាំង រូបនេះ បានប្រាប់ទស្សនិកជនរបស់គាត់ ថា «យើងមិនដែលបាននិយាយជាញឹកញាប់ អំពីការប្រើប្រាស់អាវុធនុយក្លេអ៊ែររបស់រុស្ស៊ី នោះទេ។ យើងបានឆ្លើយតបតែជាមួយនឹងការផ្តល់យោបល់ ចំពោះការបញ្ចេញមតិ ដោយមេដឹកនាំប្រទេសលោកខាងលិចតែប៉ុណ្ណោះ»៕