…ពិតជាទទួលរងនូវការបំផ្លាញយ៉ាងវិនាសកម្មជួនគ្នាមែន…ប្រទេសអូស្ត្រាលីមានចោរតិរច្ឆានដុតបំផ្លាញព្រៃឈើអស់រាប់ម៉ឺនហិកតា…ចំណែកនៅឯប្រទេសអាហ្វ្រិកខាងកើតផលដំណាំរាប់ម៉ឺនហិកតាត្រូវបានបំផ្លាញដោយហ្វូងសត្វកណ្តូប។
ដើមឆ្នាំ ២០២០ នេះ ពិភពលោកទាំងមូលហាក់ជួបហេតុការណ៍អាក្រក់ៗជាបន្តបន្ទាប់ មានដូចជាករណីភ្លើងឆេះព្រៃនៅក្នុងប្រទេសអូស្ត្រាលី ផ្ទុះភ្នំភ្លើង តូអាល់នៅក្នុងប្រទេសហ្វីលីពីន ទឹកជំនន់នៅក្នុងប្រទេសឥណ្ឌូនេស៊ី និងករណីផ្ទុះការរាតត្បាតជំងឺរលាកផ្លូវដង្ហើមថ្មីបង្កឡើងដោយវីរុសកូរ៉ូណានៅក្នុងប្រទេសចិនដើម។ ស្រប ប្រទេសនៅតំបន់អាស៊ី កំពុងតែជួបប្រទះបញ្ហាទាំងនេះ ប្រទេសនៅតំបន់អាហ្វ្រិកខាងកើតឯណោះវិញក៏កំពុងតែរងទុក្ខយ៉ាងខ្លាំងដែរ ក្រោយមានហ្វូងសត្វកណ្ដូបរាប់លានក្បាលបានចេញមកស្របពេលគ្នា និងនាំគ្នាស៊ីផលដំណាំរបស់ក្រុមកសិករហិនហោចខ្ទេចខ្ទី។បើយោងតាមសារព័ត៌មានបរទេសបានឲ្យដឹងថា សត្វកណ្តូបរាប់លានក្បាលចេញមកព្រមគ្នា ហើរនៅលើផ្ទៃអាកាសក្នុងប្រវែងប្រមាណជា ១៥០ គីឡូម៉ែត្រ ជារៀងរាល់ថៃ្ង ហើយពួកវាបានចុះមកស៊ីដំណាំដូចជាពោត ល្ពៅ និងសណ្តែករបស់ប្រជាកសិករយ៉ាងគំហុក ហើយបរិមាណដំណាំដែលពួកវាបានស៊ីក្នុងមួយថ្ងៃនោះ បើអ្នកជំនាញធ្វើការប្រៀបធៀបទៅគឺស្មើនឹងបរិមាណអាហារសម្រាប់ផ្គត់ផ្គង់មនុស្សចំនួន ៣៥ ០០០ នាក់ក្នុងមួយថ្ងៃដូចគ្នាដែរ។
ប្រទេសដែលកំពុងទទួលរងការគំរាមគំហែងដោយហ្វូងសត្វកណ្តូបនេះមានដូចជា ប្រទេសសុម៉ាលី អេត្យូពី និងកេនយ៉ា ក្នុងនោះកេនយ៉ាជាប្រទេសដែលរងនូវផលប៉ះពាល់ជាងគេ ដោយគិតមកទល់នឹងពេលនេះផលដំណាំក្នុងផ្ទៃដីប្រមាណជា ៧០ ០០០ ហិចតា ក្នុងប្រទេសកេនយ៉ាត្រូវបានបំផ្លាញខ្ទេចខ្ទីអស់ហើយដោយហ្វូងសត្វកណ្ដូប៕
