…កាលពីលោកណាជីប រ៉ាហ្សាក់អង្គុយនៅលើកៅអីជានាយករដ្ឋមន្ត្រីនៃប្រទេសម៉ាឡេស៊ី អំពើពុករលួយទាំងប៉ុន្មានដែលលោកបានប្រព្រឹត្តិប្រៀបបានជាមានខែលមួយមកបិទបាំងយ៉ាងអញ្ចឹង…លុះដល់លោកធ្លាក់ពីអំណាចសំណុំរឿងចោទប្រកាន់ពីបទពុករលួយគរដូចដំបូកនៅក្នុងតុលាការ។ មិនត្រឹមតែរូបលោករ៉ាហ្សាក់ប៉ុណ្ណោះទេ ដែលទទួលរងនូវការចោទប្រកាន់សូម្បីតែលោកស្រីរ៉ូម៉ា ម៉ាន់ស័រជាភរិយាក៏ទទួលរងនូវការចោទប្រកាន់ដូចគ្នាដែរ។
លោកស្រី រ៉ូម៉ា ម៉ាន់ស័រ ភរិយារបស់អតីតនាយករដ្ឋមន្ត្រីម៉ាឡេស៊ីលោកណាជីប រ៉ាហ្សាក់បានទៅដល់តុលាការក្រុងគូឡាឡាំពួកាលពីថ្ងៃពុធថ្ងៃទី៥ខែកុម្ភៈដើម្បីប្រឈមនឹងការចោទប្រកាន់ពីបទពុករលួយជុំវិញការពាក់ព័ន្ធរបស់លោកស្រីនៅក្នុងគម្រោងបន្ទះពន្លឺថាមពលព្រះអាទិត្យ។លោកស្រី រ៉ូម៉ា ម៉ាន់ស័របានមកដល់តុលាការ ដោយជិះរថយន្តខ្មៅមួយជាមួយនឹងរថយន្តសង្គ្រោះបន្ទាន់មួយគ្រឿង។ លោកស្រីបានទទួលរងនូវការចោទប្រកាន់ចំនួន៣ករណីដែលទាក់ទងនឹងអំពើពុករលួយនិងទទួលប្រាក់សំណូក។ការចោទប្រកាន់ទាំងអស់នេះ ត្រូវបានធ្វើឡើងក្រោមច្បាប់របស់គណៈកម្មការប្រឆាំងអំពើពុករលួយម៉ាឡេស៊ីឆ្នាំ ២០០៩ ។
លោកស្រី ម៉ាន់ស័រប្រឈមការជាប់ពន្ធនាគាររហូតដល់ ២០ ឆ្នាំនិងពិន័យជាប្រាក់ប្រសិនបើលោកស្រីត្រូវបានសំរេចឱ្យជាប់ទោសនោះ៕
