[wai id="5"]
[wai id="7"]
ស្របពេលដែលចំនួនករណីឆ្លងជំងឺ COVID-19បន្តកើនឡើងរហូតដល់ជាង៩៤.០០០នាក់ និងករណីស្លាប់កើនឡើង ជាង៣.២០០នាក់ នៅទូទាំងសកលលោក ក្តីកង្វល់របស់សាធារណជន បានជំរុញឲ្យប្រជាជនចាប់ផ្តើមត្រៀមខ្លួនសម្រាប់ ហានិភ័យដ៏អាក្រក់បំផុតបង្កឡើងដោយសារតែវីរុសមួយនេះ។
រូបថត និងវីដេអូ កាលពីពេលថ្មីៗនេះដែលត្រូវបានបង្ហោះលើព័ត៌មានសង្គម ឃើញរាននៅតាមផ្សារទំនើបទូទាំងពិភពលោក ទទេរស្អាត ខណៈពេលដែលប្រជាជនសម្រុកទិញចំណីអាហារ និងសម្ភារផ្គត់ផ្គងស្អាត ដើម្បីស្តុកទុក។
ពាណិជ្ជកម្ម
ថ្វីត្បិតតែមជ្ឈមណ្ឌលគ្រប់គ្រងជំងឺ(CDC)បានប្រកាសថា ជំងឺ COVID-19ទំនងជាបង្កឲ្យមានការរីលរាលដាលឆ្លងសកល ហើយការគំរាមកំហែងសុខភាពសាធារណៈ ដោយសារវីរុសនេះ ស្ថិតក្នុងកម្រិតខ្ពស់បំផុតយ៉ាងណាក្តី ក៏ហានិភ័យចំពោះ សាធារណជនអាមេរិក នៅមានកម្រិតទាបនៅឡើយ។
យោងតាមសេចក្តីរាយការណ៍ពីកាសែតThe Guardian បានឲ្យដឹងថា ផ្សារទំនើបសហរដ្ឋអាមេរិក បានត្រៀមខ្លួន ចំពោះ លទ្ធភាពដែលពលរដ្ឋ ចាប់ផ្តើមទិញទំនិញស្តុកទុក ដូចជាចំណីអាហារ និងសម្ភារប្រើប្រាស់ប្រចាំថ្ងៃជាដើម ស្របពេលមានក្តី កង្វល់ពីការរីលរាលឆ្លងនៃជំងឺ COVID-19។
នៅសហរដ្ឋអាំមេរិក ផ្សារទំនើបដូចជាផ្សារ Costco បានមើលឃើញរួចទៅហើយពីផលប៉ះពាល់នៃ វីរុសមកលើទម្លាប់ ដើរផ្សាររបស់អតិថិជន។
លោក Thad Kleszcz ដែលជាអ្នកចាត់ការទូទៅផ្សារទំនើប Costco ស្ថិតនៅក្នុងរដ្ឋកាលីហ្វ័រញ៉ា សហរដ្ឋអាមេរិក បាននិយាយប្រាប់កាសែត Los Angeles Timesថា សាប៊ូលាងដៃកម្ចាត់មេរោគ លែងមានទៀតហើយនៅទីនេះ។ យើងអត់មានវានោះទេនៅក្នុងស្តុក ពីព្រោះថាវាបានដាច់ស្តុកបាត់ទៅហើយ។
លោក Kleszcz បានឲ្យដឹងថា យើងមិនទាន់ដាច់ស្តុកនោះទេ កាលពីរយៈពេលប៉ុន្មានសប្តាហ៍មុន ប៉ុន្តែយើងដាច់ស្តុក ក្រោយការប្រកាសករណីស្លាប់របស់បុរសម្នាក់ រស់នៅរដ្ឋវ៉ាស៊ីងតោន ដោយសារជំងឺ COVID-19។
លោកបន្តទៀតថា សម្ភារប្រើប្រាស់ប្រចាំថ្ងៃដូចជាទឹកសុទ្ធ ក្រដាសជូតដៃ គ្រាប់ធុញ្ញជាតិ និងចំណីអាហារច្រកកែវ មានអតិថិជនមកទិញស្ទើរតែដាច់ស្តុកទៅហើយ។
យោងតាមវែបសាយ Ready.govដែលជាវែបសាយផ្លូវការរបស់ក្រសួងសន្តិសុខជាតិអាមេរិក បានឲ្យដឹងថា ការទិញស្តុកទុក គឺមានប្រយោជន៍ខ្លាំងណាស់ក្នុងស្ថានភាពគ្រោះអាសន្ន ដូចដែលធ្លាប់កើតមានកាលពីមុន នៅពេលដែលមានការរីករាលដាល សកលនៃបញ្ហាសុខភាព។
ជាការត្រៀមខ្លួនទប់ទល់ជាមួយនឹងវិបត្តិសុខភាពសកល វែបសាយមួយនេះ បានណែនាំឲ្យពលរដ្ឋអាមេរិក ទិញទំនិញស្តុក ទុកសម្រាប់រយៈពេល២សប្តាហ៍ ពិសេសគឺទំនិញចាំបាច់ ដូចជាទឹកសុទ្ធ និងចំណីអាហារ។
សូមបញ្ជាក់ថា ស្ថានភាពស្រដៀងគ្នានេះ បានកើតមានឡើងផងដែរនៅតាមបណ្តាលប្រទេសជាច្រើន ដែលមានករណីឆ្លង និងស្លាប់ដោយសារជំងឺ COVID-19 ក្នុងនោះរួមទាំងនៅអង់គ្លេស និងម៉ាឡេស៊ី ផងដែរ នៅពេលដែលប្រជាពលរដ្ឋភ្លូកទឹក ភ្លូកដីទៅទិញទំនិញស្តុកទុកនោះ៕
[wai id="6"]
